«ەل ءىشى – ونەر كەنىشى» دەگەندەي, اتالعان ۇلتتىق جوبا ەل ىشىنەن تالانتتى بۇلدىرشىندەردى تاۋىپ, ولاردىڭ جولىن ونەر الەمىنە اشىپ كەلەدى. سونداي-اق, بالالاردىڭ ءان شىعارماشىلىعىن دامىتۋ جانە قولداۋ, بالالاردىڭ مۋزىكالىق ءبىلىم الۋىنا جانە تاربيەسىنە قاتىستى سۇراقتارعا قوعامنىڭ نازارىن اۋدارۋ جانە جالپى ادامدىق قۇندىلىقتاردى اشۋ مەن دامىتۋ ماقساتىندا ۇيىمداستىرىلىپ وتىرعان جوبانىڭ العاشقى كەزەڭى پاۆلودار قالاسىنان باستاۋ الدى. وسى ۋاقىتقا دەيىن پاۆلودار, وسكەمەن, الماتى قالالارىندا ۇيىمداستىرىلعان «بالا داۋىسى – 2017!» ۇلتتىق بايقاۋى سەنبى كۇنى تاراز قالاسىندا ءوتتى. بالالارىن ۇلتتىق ونەرگە باۋلىعان اتا-انالار بۇل كۇنى قالالىق مادەنيەت ءۇيىن بەتكە الىپ, بۇلدىرشىندەردىڭ ونەرىنە كۋا بولدى.
بۇل بايقاۋ – قانداي دا ءبىر كوممەرتسيالىق ماقساتتاردى كوزدەمەيتىن قازاقستاندىق برەندكە اينالۋ جانە استانا, الماتى قالالارى مەن ەلىمىزدەگى بارلىق وبلىس ورتالىقتارىن قامتيتىن جوبا. سونداي-اق, ايقىن تولەپبەرگەن, ماقپال يسابەكوۆا سياقتى بەلگىلى ەسترادا انشىلەرى دە تالانتتى بالالارمەن جۇمىس ىستەيدى ەكەن. وسىلاي دەگەن جوبا مەنەدجەرى تولعاناي حاسەن «بالا داۋىسى – 2017!» بايقاۋىنىڭ ارتىقشىلىقتارى جونىندە دە اڭگىمەلەدى.
«ەگەر بايقاۋعا قاتىسۋشى بالالار سانى 500-دەن اسسا, 2 جەڭىمپاز انىقتالادى. جەڭىمپاز بالالارعا ەلىمىزدەگى ونەر سالاسىنداعى جوعارى وقۋ ورىندارىنا تۇسۋگە مۇمكىندىك بار. سونداي-اق, فرانتسيا مەملەكەتىنىڭ استاناسى پاريج قالاسىنا ساياحاتقا جولداما بەرىلەدى. تاعى ايتا كەتەتىن ءبىر جايت, فينالعا شىققان ءاربىر بالامەن ءبىزدىڭ ماماندار جۇمىس ىستەيدى», دەيدى تولعاناي حاسەن.
تاراز قالاسىندا وتكەن «بالا داۋىسى – 2017!» ۇلتتىق بايقاۋىنا 172 تالاپكەر ءبۇلدىرشىن قاتىستى. بايقاۋ بارىسىندا قازىلار القاسىنىڭ شەشىمىمەن 12 جاسار ديار باقىت جۇزدەن جۇيرىك شىعىپ, جەڭىمپاز اتاندى. الداعى ۋاقىتتا جەڭىمپازبەن بىرگە «اسىل» توبىنىڭ ءانشىسى اقەركە بۇركىتباي بىرلەسە جۇمىس ىستەيتىن بولادى. ال ماراپاتتاۋ كەزەڭىندە دياردىڭ اناسى اسەم ماحاشەۆا ءسوز الىپ, جوبا جەتەكشىلەرى مەن ۇيىمداستىرۋشىلارعا العىسىن ءبىلدىردى.
ايتا كەتەيىك, اتالعان بايقاۋدىڭ العاشقى جىلىندا اۋليەاتانىڭ نامىسىن قورعاعان ايلۋن زاۋشوۆا جەڭىمپاز اتانعان بولاتىن. ەندى دياردىڭ جۇلدىزى جارقىرادى. تاراز توپىراعىنان تاعى ءبىر تالانتتى ونەرپاز ونەر الەمىنە قانات قاقتى.
«بالا داۋىسى – 2017!» ۇلتتىق بايقاۋى ەندى شىمكەنت قالاسىندا جالعاسادى. سونداي-اق, ەلىمىزدىڭ وزگە دە وڭىرلەرىندە بولىپ, ەل ىشىندەگى ونەرلى بالالاردى ەلگە تانىتۋدا ەسەلى ەڭبەك ەتەدى.
حاميت ەسامان, «ەگەمەن قازاقستان»