الماتى قالاسىنىڭ اكىمى باۋىرجان بايبەك قۇتتىقتاۋ سوزىندە قازاقستان پرەزيدەنتى نۇرسۇلتان نازارباەۆتىڭ «ەگەمەن قازاقستان» گازەتىندەگى جاريالانعان «بولاشاققا باعدار: رۋحاني جاڭعىرۋ» ماقالاسىندا مادەنيەت پەن جەكە ۇلتتىق كودتى ساقتاۋعا ۇلكەن نازار اۋدارعانىن ايتا كەلىپ, تەك سوڭعى ەكى جىل ىشىندە عانا الماتىدا 5 ايتىس, سونىمەن قاتار اقىنداردىڭ «التىن دومبىرا» فەستيۆالى ءوتىپ, ءداستۇرلى مۋزىكانىڭ «الاتاۋ» مۋلتيمەديالىق جانە قولونەرشىلەردىڭ جاڭا ورتالىعى, الماتى قالاسىنىڭ مىڭجىلدىق تاريحي مۇراجايى اشىلعانىن دا تىلگە تيەك ەتتى.
بۇگىنگى تاڭدا قالا تۇرعىندارى مەن قوناقتارى الماتىدا جايلاسقان وسىناۋ مادەنيەت پەن ونەر وتاۋلارى ارقىلى قازاق حالقىنىڭ ەجەلگى ءداستۇر-سالتتارىمەن بۇرىنعىدان دا كەڭىنەن تانىسا الادى.
«مەملەكەت باسشىسى ەلىمىز تاۋەلسىزدىككە قول جەتكىزگەن كۇننەن باستاپ ءتول قۇندىلىقتارىمىزدى ناسيحاتتاۋ ارقىلى ۇلتتىق سانانى جاڭعىرتۋدى باسىم باعىت رەتىندە ايقىنداپ بەردى. سونىڭ ارقاسىندا حالقىمىز ۇمىت بولا باستاعان تىلىمەن, وزىندىك مادەنيەتىمەن, سالت-داستۇرىمەن قايتا قاۋىشتى, –دەگەن قالا اكىمى ءسوزىن بىلاي جالعادى. – مەملەكەت تاراپىنان ۇلتتىق سپورت تۇرلەرىنە, ونىڭ ىشىندە كوكپار, الامان بايگە, اۋدارىسپاق, تەڭگە ءىلۋ, جامبى اتۋ, اسىق اتۋ, توعىزقۇمالاق, قازاق كۇرەسى سىندى ايشىقتى ءىس-شارالارعا جۇيەلى تۇردە قولداۋ كورسەتىلىپ كەلەدى. وسى جىلدىڭ اياعىنا دەيىن الماتى يپپودرومىندا جۇلدەلىك قورى 80 ملن تەڭگەنى قۇرايتىن 89 بايگە وتەدى. الماتىدا «الماتى بارىسى» مەن «الەم بارىسى» سايىستارىنىڭ ءوتۋى دە سپورت اۋەسقويلارى جانە جالپى حالقىمىز ءۇشىن ەرەكشە سىي بولماق.
ءوز كەزەگىندە قر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان الماتىنىڭ ەلىمىزدىڭ ۇلتتىق سپورت تۇرلەرى بويىنشا سايىستار ءجيى وتەتىن ەلىمىزدىڭ سپورتتىق جانە رۋحاني ورتالىعىنا اينالعانىنا توقتالدى.
«ۇلتتىق سپورت – اتا-بابالارىمىزدان قالعان ءارى بارشا الەمگە ماقتانىشپەن كورسەتە الاتىن ءبىزدىڭ اسىل مۇرامىز. سوڭعى جىلدارى قازاقتىڭ ۇلتتىق سپورت تۇرلەرى تەك قازاقستاندا عانا ەمەس, شەتەلدە دە قارقىندى دامىپ, ەلىمىزدىڭ ابىروي-بەدەلىن ارتتىرا تۇسۋدە. ونىڭ جارقىن مىسالى, «ەكسپو-2017» اياسىندا كوكپاردان وتەتىن الەم چەمپيوناتى دەر ەدىم», دەدى بەكبولات تىلەۋحان.
الماتىدا ءوتىپ جاتقان « ۇلى دالا ويىندارى» رەسپۋبليكالىق فەستيۆالىنە قاتىسۋشىلار سپورتتىڭ 12 ءتۇرى بويىنشا سايىسقا تۇسەدى, ولاردىڭ ىشىندە, 4 شاقىرىمدىق تاي جارىس, 7 شاقىرىمدىق قۇنان بايگە, 13 شاقىرىمدىق توپ بايگە, جايداق بايگەلەر, 21 شاقىرىمدىق الامان بايگە, كوكپار, اۋدارىسپاق, تەڭگە ءىلۋ, توعىزقۇمالاق, اسىق اتۋ, جامبى اتۋ, قازاق كۇرەسى سياقتى ۇلتتىق سپورت تۇرلەرى بار. بيىلعى جۇلدەلىك قور 24 ملن تەڭگەنى قۇرايدى.
نەگىزگى ويىندارمەن قاتار, فەستيۆال قوناقتارى اڭشىلىق-ساياتشىلىق ونەرگە قاتىستى بۇركىتتىڭ, تازى ءيتتىڭ ون سان تۇرىمەن تانىسادى. قولونەر شەبەرلەرى دايىنداعان تۇرمىستىق بۇيىمداردىڭ كورمەسىن تاماشالايدى. ەسكە سالار تاعى ءبىر جايت – وتكەن عاسىردىڭ 1930 جىلى نەگىزى قالانعان الماتى يپپودرومىندا « ۇلى دالا ويىندارى» فەستيۆال وسىمەن قاتارىنان ەكىنشى مارتە وتۋدە.
تالعات ءسۇيىنباي, «ەگەمەن قازاقستان»