قازاقستان پوليتسياسىنىڭ شيرەك عاسىرلىق مەرەيتويىنا ماڭعىستاۋلىق ءتارتىپ ساقشىلارى بەلسەندى ءىس-قيمىلمەن, تىنىشتىقتى قامتاماسىز ەتۋدەگى دايىندىقپەن كەلدى. ولار جۇمىسقا دەگەن جاۋاپكەرشىلىكپەن بىرگە, ەل مەن جەردىڭ كوركەيۋىنە, گۇلدەنۋىنە ءوز ۇلەستەرىن قوسۋدى ازاماتتىق پارىز سانايدى. ىزگى شارالاردىڭ ءبىرى جاڭاوزەن قالالىق ىشكى ىستەر باسقارماسىندا كورىنىس تاپتى, ولار 25 جىلدىق مەرەكەگە ارنالعان ءىس-شارالاردى الدىمەن باستاپ, باسقارما اۋلاسىنا اعاشتار وتىرعىزىپ, نىسان اينالاسىن تازارتتى. جاڭاوزەننىڭ كوركىنە كورىك قوسامىن دەپ جۇمىلعان جۇمىسقا پوليتسەي ساپىنداعى 25 جاس بۋىن مەن 25 جىل قۇقىق قورعاۋ سالاسىندا ەڭبەك ەتىپ جۇرگەن اعا بۋىن وكىلدەرى جانە جاڭاوزەن قالالىق ءىىب قىزمەتكەرلەرى قاتىستى. – بۇل شارانىڭ ماقساتى – جاڭادان كەلگەن جاس ءتارتىپ ساقشىلارىنا 25 جىل ىشكى ىستەر ورگانىندا ەڭبەك ءوتىلى بار اعا بۋىنداردىڭ تەك وزدەرىنىڭ قىزمەتتەرىندە عانا ەمەس, قوعامدىق جۇمىستارعا دا اتسالىساتىندىعىن ۇعىندىرۋ, جاستاردى پاتريوتتىق تاربيەگە باۋلۋ. جاسى ۇلكەن اعا بۋىن وكىلدەرىنەن ۇلگى-ونەگە الىپ, ءوز ەڭبەكتەرىنە ادالدىعىن, حالىقتىڭ ىشكى ىستەر ورگانىنا دەگەن سەنىمدىلىگىن نىعايتۋ بولاتىن, – دەيدى جاڭاوزەن قالالىق ءىىب باستىعى, پوليتسيا پولكوۆنيگى امانگەلدى اسقار ۇلى. اعا بۋىننىڭ ونەگەلى ىسىنە جاس پوليتسەيلەر دە ريزا. «تەك بۇل عانا ەمەس, كوپتى كورگەن اعا-اپالارىمىزدان الاتىن پاتريوتتىق تاربيەمىز دە, تاجىريبەمىز دە, ۇلگى-ونەگەمىز دە ءالى كوپ دەپ سانايمىن», – دەيدى جاس بۋىننىڭ وكىلى, جاڭاوزەن قالالىق ءىىب ءاپت ينسپەكتور پوليتسەيى ق.قاتتىبەكوۆ. جاڭاوزەندىك ءتارتىپ ساقشىلارى قوعامعا پايدالى ءىس اتقارا وتىرىپ, ارىپتەستەرىن مەرەكەمەن قۇتتىقتاپ, ەلىمىزگە تىنىشتىق تىلەگەن اقجارما تىلەكتەرىن جولدادى.
گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى