ءىس-شاراعا جوعارعى سوتتىڭ, باس پروكۋراتۋرانىڭ, ىشكى ىستەر, ادىلەت, دىن ىستەرى جانە ازاماتتىق قوعام مينيسترلىكتەرىنىڭ, سونىمەن قاتار وبلىستىق قۇقىق قورعاۋ جانە سوت جۇيەسىنىڭ وكىلدەرى, تۇزەۋ مەكەمەلەرىنىڭ باسشىلارى, قۇقىقتانۋشى عالىمدار جانە باسقا دا ۋاكىلەتتى تۇلعالار قاتىستى.
كوشپەلى وتىرىس اياسىندا قولدانىستاعى قىلمىستىق-اتقارۋ كودەكسىنىڭ ەرەجەلەرىن اتقارۋدى جەتىلدىرۋدەگى اعىمدار, وزەكتى ماسەلەلەر مەن كەلەشەگى, پروباتسيا سالاسىنداعى زاڭناماعا مونيتورينگ جۇرگىزۋ بارىسىندا قىلمىستىق سوت تورەلىگىنىڭ قايتا الەۋمەتتەندىرۋ اسەرىن ارتتىرۋ, «قازاقستان رەسپۋبليكاسىنىڭ تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» زاڭدى ىسكە اسىرۋدىڭ كەيبىر قورىتىندىلارى, سونداي-اق پەنيتيتسيار جۇيەسىنىڭ ماسەلەلەرى تالقىلاندى.
سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى سەرىك اقىلباي 2014 جىلعى شىلدەدە قابىلدانعان قىلمىستىق-اتقارۋ كودەكسى سوتتالۋشىلاردىڭ قۇقىقتارى مەن زاڭدى مۇددەلەرىن قورعاۋ جانە قىلمىستىق جازالاۋدى ورىنداۋ تيىمدىلىگى دەڭگەيىن ايتارلىقتاي كوتەرگەنىن اتاپ ءوتتى.
«قىلمىستىق-اتقارۋ كودەكسىمەن قاتار ءبىز جاڭا قىلمىستىق-پروتسەستىك جانە قىلمىستىق كودەكستەرىن دە قابىلدادىق. كودەكستەردە كورىنىس تاپقان كوپتەگەن وزگەرىستەر قوعامدىق تارتىپتى قامتاماسىز ەتۋدەگى مەملەكەتتىڭ ءرولى, سوت ءىسىنىڭ ءار ساتىسىندا ادامنىڭ كونستيتۋتسيالىق قۇقىقتارى مەن بوستاندىقتارىن قورعاۋشىسى رەتىندە ءبىزدىڭ ازاماتارىمىزدىڭ قۇقىقتىق ساناسىنا كەشەندى وزگەرىستەر اكەلدى. بۇل رەفورمالاردىڭ بارىسىندا بەس ساتىلى سوت جۇيەسىنەن ءۇش ساتىلىعا ءوتۋ ارقىلى بىز سوت جۇيەسىن رەفورمالاعانىمىزدى ايتا كەتۋ كەرەك», - دەدى سەناتور.
سەناتور قىلمىستىق-اتقارۋ جۇيەسىنە قاتىستى زاڭدار قابىلداۋ بارىسىندا دەپۋتاتتار زاڭدىلىق, گۋمانيزم جانە ادىلەت قاعيدالارىن نەگىزگە الاتىنىن اتاپ ءوتتى. «ونى 20 مىڭعا جۋىق سوتتالۋشى قامتىلعان گۋممانيستىك اكت رەتىندە قازاقستان رەسپۋبليكاسىنىڭ «تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» زاڭىنىڭ قابىلدانۋى دايەكتەي الادى.
قىلمىستىق-اتقارۋ كودەكسى قىلمىستىق جازالاۋدى ورىنداۋ تيىمدىلىگىن ارتتىردى, جازالاۋشى جۇكتەمەنى ازايتا وتىرىپ, جازالاۋدىڭ تاربيەلەۋ-الدىن الۋ قىزمەتىن كۇشەيتتى. زاڭدارمەن جۇمىس اياسىندا سوتتالۋشىلاردىڭ نەگىزگى قۇقىقتارى مەن مەكەمە اكىمشىلىگىنىڭ مىندەتتەرىن ناقى بەكىتۋگە تىرىستىق», - دەپ اتاپ ءوتتى كوميتەت توراعاسى.
بۇگىنگى كەزدەسۋدىڭ ماقساتى - قۇقىقتىق تاجىريبەنى تالداۋ, قىلمىستىق-اتقارۋ جۇيەسىنىڭ وزەكتى ماسەلەلەرىن تۇزەۋ مەكەمەلەرىنە بارىپ, كوزبەن كورە وتىرىپ تالقىلاۋ. «بارلىق دايەكتەلگەن ۇسىنىستار پرەزيدەنت جانىنداعى قۇقىقتىق ساياسات كەڭەسىنىڭ جانە پارلامەنت پالاتالارىنىڭ وتىرىستارىندا ايتىلاتىن بولادى. بىردە-ءبىر ۇسىنىس پارلامەنتتىك راسىمدەر بولىگىندە قاراۋسىز قالمايدى», - دەدى سەرىك اقىلباي.