قارجى جانە بيۋدجەت كوميتەتىنىڭ توراعاسى راشيت احمەتوۆ سالىق ساياساتىن جەتىلدىرۋ قازىرگى كەزدەگى وزەكتى ماسەلەلەردىڭ ءبىرى ەكەنىنە نازار اۋداردى جانە ول كولەڭكەلى ەكونوميكا دەڭگەيىن تومەندەتۋگە, بيۋدجەت تۇسىمدەرىن ۇلعايتۋعا, بيزنەستى ينۆەستيتسيالاۋعا ىنتالاندىرۋ مەن اكىمشىلىك كەدەرگىلەردى قىسقارتۋعا باعىتتالعانىن ايتتى.
«قازاقستان پرەزيدەنتى ن.ءا. نازارباەۆتىڭ «بەس ينستيتۋتتىق رەفورمانى ىسكە اسىرۋ جونىندەگى 100 ناقتى قادام» ۇلت جوسپارىندا جاناما سالىقتاردى وندىرۋ تەتىكتەرىن جەتىلدىرۋ, مىندەتتى تۇردە كىرىس پەن شىعىستىڭ سالىقتىق ەسەبىن جۇرگىزۋ جونىندەگى قولدانىستاعى سالىق ءتارتىبىن وڭتايلاندىرۋ مىندەتتەرى قويىلدى. مەملەكەت باسشىسى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا سالىق-بيۋدجەت ساياساتىن جاڭا ەكونوميكالىق احۋالعا بەيىمدەۋ قاجەتتىگىن اتاپ وتكەن بولاتىن. سالىق ساياساتىن بيزنەستىڭ «كولەڭكەدەن» شىعۋىنا ىنتالاندىرۋعا جانە شيكىزاتتىق ەمەس سەكتورداعى سالىق بازاسىن كەڭەيتۋگە باعىتتاۋ كەرەك», - دەدى سەناتور.
ول سونداي-اق قولدانىستاعى سالىق جەڭىلدىكتەرىن وڭتايلاندىرۋ, جالپىعا بىردەي دەكلاراتسيالاۋ قارساڭىندا ارناۋلى سالىق تارتىپتەرىن قايتا قاراۋ قاجەتتىگىن ايتتى. سالىق اكىمشىلەندىرۋ تەتىكتەرى دە جاقسارتۋدى تالاپ ەتەدى. سوعان بايلانىستى ۇكىمەتتە «سالىق جانە بيۋدجەتكە تولەنەتىن مىندەتتى تولەمدەر تۋرالى» (سالىق كودەكسى) جاڭا كودەكس ازىرلەنىپ جاتىر.
شارا بارىسىندا سالىق ساياساتى مەن شاعىن جانە ورتا بيزنەس سۋبەكتىلەرىنە سالىق اۋىرتپالىقتارى, سونداي-اق سالىق اكىمشىلەندىرۋلەرىن ودان ءارى جەتىلدىرۋ ماسەلەلەرى تالقىلاندى.
قارجى جانە بيۋدجەت كوميتەتى وتىرىسقا قاتىسۋشىلارمەن بىرلەسە وتىرىپ دوڭگەلەك ۇستەل قورىتىندىسى بويىنشا ۇكىمەتكە جىبەرىلەتىن ۇسىنىستاردى ازىرلەدى.