جارىستا ەلىمىزدىڭ تۇكپىر-تۇكپىرىنەن كەلگەن سپورتشىلار, سونىمەن قاتار, ارمەنيا, گرۋزيا, ازەربايجان, قىرعىزستان, رەسەي مەملەكەتتەرىنەن كەلگەن بارلىعى 280-نەن استام جاس بالۋان باق سىنادى.
جارىستىڭ سالتاناتتى اشىلۋ ءراسىمى لازەرلىك شوۋمەن باستالىپ, ارنايى كەلگەن قۇرمەتتى قوناقتاردىڭ تىلەگىمەن جالعاستى. قر سپورت جانە مادەنيەت مينيسترلىگىنىڭ باس حاتشىسى قۋاتجان ۋاليەۆ, الماتى قالاسى اكىمىنىڭ ورىنباسارى ارمان قىرىقباەۆ, كسرو ەڭبەك سىڭىرگەن سپورت شەبەرى, وليمپيادا ويىندارىنىڭ جۇلدەگەرى داۋلەت تۇرلىحانوۆ جاس بالۋاندارعا العىسىن ءبىلدىرىپ, ساتتىلىك تىلەدى. ولار داڭقتى بالۋان جاقسىلىق ۇشكەمپىروۆتى 1984 جىلدان باستاۋ العان ءداستۇرلى تۋرنيرىمەن قۇتتىقتاپ, «Hyundai Creta» تەمىر تۇلپارىن سىيعا تارتتى.
ەكى كۇنگە سوزىلعان باسەكەدە قازاق پالۋاندارى 5 التىن, 6 كۇمىس جانە 9 قولا مەدالدى ەنشىلەپ, جالپىكوماندالىق ەسەپتە كوش باستادى. جالپى جارىس قورىتىندىسى بويىنشا جاۋىرىنى جەرگە تيمەگەن الپامىس داستانبەك (قازاقستان, 50 كگ), ەرنۇر فيداحمەتوۆ (قازاقستان, 55 كگ), ەرنار فيداحمەتوۆ (قازاقستان, 60كگ), مەرەي بەكەنوۆ (قازاقستان, 66كگ), بەكا مامۋكاشۆيلي (گرۋزيا, 74 كگ), تەمۋري تسكۋاسەليدزە (گرۋزيا, 84 كگ), ەلمار ۋكالي (قازاقستان, 96 كگ), زۆيادي پاتاريدزە (گرۋزيا, 120 كگ) سىندى بالۋاندار التىن جۇلدەگەر اتاندى. جەڭىمپازدار مەن جۇلدەگەرلەر ديپلوم, مەدال, سونداي-اق, باعالى ۇيالى تەلەفوندارمەن ماراپاتتالدى.
ء«بىز ءومىرىمىزدى سپورتقا ارنادىق, ماقساتتارىمىزعا جەتۋ ءۇشىن ايانباي ەڭبەك ەتتىك. ەلباسى مەن ەلىمىزدىڭ قولداۋىنىڭ ارقاسىندا وسىنداي ناتيجەگە جەتىپ, حالىقتىڭ ءۇمىتىن اقتادىق. مەملەكەتىمىز سپورتتىڭ دامۋىنا بارلىق جاعداي جاساپ وتىر. سپورتتىق الاڭدار مەن سپورت تۇرلەرىنەن تەگىن سەكتسيالار كوپتەپ اشىلىپ جاتىر. مۇنىڭ بارلىعى ەل بىرلىگىنىڭ ارقاسىندا. باۋىرجان بايبەك مىرزاعا وسى ءتۋرنيردى ۇيىمداستىرۋعا كومەك كورسەتكەنى ءۇشىن العىسىمدى بىلدىرەمىن. تۋرنير تەك مەن ءۇشىن ەمەس, سىزدەر ءۇشىن, بالالاردىڭ بولاشاعى مەن ءوسىپ كەلە جاتقان ۇرپاق ءۇشىن. جاس پالۋاندارىمىزدىڭ حالىقارالىق دودالاردا جوعارى دارەجەدە ونەر كورسەتىپ توپ جارۋىنا تىلەكتەسپىن», دەدى جاقسىلىق ۇشكەمپىروۆ.
اتالعان تۋرنير الماتى قالاسىنىڭ دەنە شىنىقتىرۋ جانە سپورت باسقارماسىنىڭ, قر مادەنيەت جانە سپورت مينيسترلىگىنىڭ, قازاقستان كۇرەس فەدەراتسياسىنىڭ قولداۋىمەن گرەك-ريم كۇرەسىن جاستار اراسىندا دارىپتەۋ, كورشىلەس ەلدەر سپورتشىلارى اراسىندا دوستىق قارىم-قاتىناستى نىعايتۋ, «قر سپورت شەبەرى» ءنورماتيۆىن ورىنداۋ, قر مەملەكەتتىك قۇراما كومانداسىنا ۇزدىكتەردى ىرىكتەۋ ماقساتىندا ۇيىمداستىرىلعان.
ارمان وكتيابر,
«ەگەمەن قازاقستان»