«قر مادەنيەت جانە اقپارات مينيسترلىگىنىڭ تاپسىرىسى بويىنشا «قازاقفيلم» كينوستۋدياسى «Sataifilm» كومپانياسىمەن بىرلەسىپ, مامىردىڭ 15-16-سى كۇندەرى اقان ساتاەۆتىڭ ەڭ اۋقىمدى «تۇمار» كوركەم فيلمىنە كاستينگ جاريالايدى», - دەلىنگەن رەجيسسەر اقان ساتاەۆتىڭ ينستاگرامداعى پاراقشاسىندا.
اتالعان حابارلامادا كاستينگتىڭ مىنا مەكەن جايدا وتەتىندىگىن ايتىلعان: استانا قالاسى, ءىلياس ەسەنبەرلين كوشەسى 10, «جاستار» تەاترى. ساعات 9-00-دەن 18-00-گە دەيىن. جاس ساناتى: 16-جاسقا دەيىن, ۇلتىنا شەكتەۋ جوق.
اقان ساتاەۆ «تۇمار» ءفيلمىن تۇسىرەتىندىگىن وسىدان ەكى ايدان استام ۋاقىت بۇرىن قر مادەنيەت جانە سپورت مينيسترلىگىنىڭ كەڭەيتىلگەن وتىرىسىندا ءمالىم ەتكەن بولاتىن.
«وسى جىلى ءبىز مادەنيەت مينيسترلىگىمەن بىرلەسىپ «تۇمار» تاريحي ءفيلمىن ءتۇسىرۋدى باستاعالى وتىرمىز. ساپالى دۇنيە شىققان جاعدايدا ول وتاندىق كورەرمەننىڭ دە, شەتەلدىك اۋديتوريانىڭ دا قىزىعۋشىلىعىنا يە بولا الاتىنىنا سەنىمدىمىن. تۇمار پاتشايىم - الەمدىك تاريحتىڭ بارىسىنا ىقپال ەتكەن تۇلعا. كينوپروكاتىمىزدىڭ گەوگرافياسىن كەڭەيتۋ ءۇشىن مۇنداي جوبالاردى جاساۋ كەرەك دەپ سانايمىن. سەبەبى, بۇل ەلدىڭ حالىقارالىق ءيميدجىنىڭ قالىپتاسۋىنا وڭ اسەر ەتەدى», - دەگەن ەدى رەجيسسەر.
سونىمەن ءفيلمنىڭ ءتۇسىرىلىم جۇمىستارى 2017 جىلدىڭ قازان ايىندا باستالىپ, 2018 جىلدىڭ اقپان ايىنا دەيىن قازاقستان اۋماعىندا جۇرگىزىلەدى. تاريحي جوبانىڭ اۆتورلارى: ءاليا نازارباەۆا مەن تيمۋر جاقسىلىقوۆ.
ايتا كەتەيىك, ساق پاتشايىمى تۇماردىڭ ەسىمى ەجەلگى جازبالاردا توميريس دەپ كورسەتىلگەن. ب.ز.د. 530-529 جىلدارى ميديا پاتشاسى كير كوپتەگەن ەلدەردى وزىنە باعىندىرىپ, «ازيا ءامىرشىسى» اتاعىنا يە بولىپ, ۇلى دالاعا قارسى جورىققا شىقتى. شايقاستاردىڭ بىرىندە كير پاتشاسى ءتوميريستىڭ جۇبايى رۇستەمدى ءولتىرىپ, تۇماردىڭ بالاسى سىپىردى قولعا تۇسىرگەن. تۇتقىندا ءتوميريستىڭ ۇلى دا مەرت بولدى. ال كير كوشپەندىلەرگە ەلشى اتتاندىرىپ, ولاردىڭ حانشاسىنا وزىنە تۇرمىسقا شىعۋىن تالاپ ەتەدى. تۇمار كير پاتشانىڭ ۇسىنىسىن قابىلداماي, ونىڭ باسىن قانعا تۇنشىقتىرۋعا ۋادە ەتەدى. وسىدان كەيىن پاتشايىم پارسىلارعا قارسى ۇرىس جۇرگىزىپ, جەڭىسكە جەتەدى. سول كەزدە تۇمار پارسىلاردىڭ پاتشاسى كيردىڭ باسىن شاۋىپ الىپ, قان تولتىرىلعان ساباعا تىعىپ: «اڭساعانىڭ قان ەدى, ءىش ەندى سونى!» - دەپ ايقايلادى. بۇل وقيعانى گرەك تاريحشىسى گەرودوت «ەڭ كەسكىلەسكەن جانە ۇلى شايقاس» دەپ سۋرەتتەگەن.