كەشە پرەمەر-مينيستر كارىم ءماسىموۆتىڭ توراعالىق ەتۋىمەن كەزەكتى ۇكىمەت وتىرىسى بولىپ ءوتتى. وندا ەكونوميكالىق دامۋ جانە ساۋدا ءمينيسترى قايرات كەلىمبەتوۆ «حالىقتىق ءىرو» باعدارلاماسىنىڭ جوباسىمەن تانىستىردى.
ەكونوميكالىق دامۋ جانە ساۋدا مينيسترلىگى ءباسپاسوز قىزمەتىنىڭ مالىمەتتەرىنە سۇيەنسەك, ءبۇگىندە «حالىقتىق ءىرو-عا» «قازترانسويل» اق پەن «كەگوك» اق دايىن دەپ ىرىكتەلىنگەن. ءىرو-عا ۇمىتكەر كومپانيالاردى وسى ۇدەرىسكە دايىنداۋ نەگىزگى 3 بولىمنەن تۇرادى. اتاپ ايتقاندا, الدىن-الا دايىندىق, اكتسيالاردى ورنالاستىرۋعا دايىندىق جۇرگىزۋ, سونىمەن قاتار اكتسيالاردى ورنالاستىرۋ شارالارى بەلگىلەنىپ وتىر. ال حالىق اراسىندا ءجۇرگىزىلگەن ساۋالناما ناتيجەسىنە ءسايكەس تۇرعىندار تاراپىنان اعىمداعى ءىرو-عا سۇرانىس 100-200 ملن. اقش دوللارىنا باعالانعان. ۆەدومستۆو باسشىسىنىڭ ايتۋىنشا, باعدارلامانىڭ نەگىزگى ماقساتى قازاقستان حالقىنىڭ وزدەرى جيناعان قارجىلارىن ءىرى كومپانيالاردىڭ اكتسيالارىنا ينۆەستيتسيا رەتىندە سالىپ, سول ارقىلى اكتسيالارعا يەلىك ەتىپ, جانە وسى باعدارلامانى جۇزەگە اسىرۋ ارقىلى قازاقستانداعى باعالى قاعازدار رىنوگىنىڭ دامۋىن قامتاماسىز ەتۋ.
مۇنىمەن قوسا «سامۇرىق-قازىنا» ءال-اۋقات قورى باسقارما توراعاسىنىڭ ورىنباسارى قۋاندىق بيشىمباەۆتىڭ سوزىنە قاراعاندا, تالداۋ ناتيجەلەرى بويىنشا اتالعان باعدارلاماعا قاتىسۋعا قوردىڭ بىرقاتار ەنشىلەس جانە باعىنىشتى ۇيىمدارى ىرىكتەلىنىپ الىنعان. ولار ءبىرىنشى كەزەكتە اكتسيالاردى ورنالاستىرۋعا دايىندىق دارەجەسىنە قاراي توپتار بويىنشا بولىنسە, ءبىرىنشى توپتاعى «قازترانسويل» جانە «كەگوك» اكتسيونەرلىك قوعامدارىنىڭ ءىرو-عا شىعارىلۋ مەرزىمى 2012 جىلدىڭ 2-3 توقسانى دەپ بەلگىلەنگەن. ەكىنشى توپتاعى «قازترانسگاز», «سامۇرىق-ەنەرگو», «قازتەڭىزكولىكفلوت» اكتسيونەرلىك قوعامدارىنىڭ ءىرو-عا شىعارىلۋ مەرزىمى 2013 جىل دەپ مەجەلەنىپ وتىر. ءۇشىنشى توپتاعى «قازاقستان تەمىر جولى», «قازتەمىرترانس» اكتسيونەرلىك قوعامدارىنىڭ ءىرو-عا شىعۋ مەرزىمى 2014-2015 جىلدار ارالىعى دەپ جوسپارلانعان. سونداي-اق, ءتورتىنشى توپتاعى «قازمۇنايگاز» جانە «قازاتومونەركاسىپ» اكتسيونەرلىك قوعامدارى 2015 جىلدان كەيىن ءىرو-عا شىعاتىن بولادى.
ءوز كەزەگىندە ۇكىمەت باسشىسى كارىم ءماسىموۆ اتالعان باعدارلاما اياسىندا ەلىمىزدىڭ ازاماتتارى وسى حالىقتىق ءىرو-مەن بارىنشا قامتىلۋى قاجەت ەكەنىن اتاپ ءوتتى. پرەمەر-مينيستر قازاقستان حالقىنىڭ وسى باعدارلاماعا قاتىسۋىنا بارىنشا مۇمكىندىك جاسالۋى كەرەكتىگىن دە نازاردان تىس قالدىرمادى. بۇل تۇرعىدا ك.ءماسىموۆ, ەل ازاماتتارىنا اكتسيالاردى ورنالاستىرۋدىڭ قىر-سىرىن بارىنشا ۇعىنىقتى تۇردە ءتۇسىندىرۋ شارالارىن جۇرگىزۋدى تاپسىردى.
ۇكىمەت باسشىسىنىڭ ايتۋىنا قاراعاندا, «حالىقتىق ءىرو» باعدارلاماسىنىڭ جوباسى الداعى سەنبىدە بولاتىن ۇكىمەت وتىرىسىندا قابىلداناتىن بولادى. وعان دەيىنگى ارالىقتا ءتيىستى ۇسىنىستار جاسالىپ, قاجەتتى تولىقتىرۋلار ەنگىزىلمەك.
سونداي-اق, ۇكىمەت وتىرىسىندا پرەمەر-مينيستر كارىم ءماسىموۆ اۋىل شارۋاشىلىعى ءمينيسترى اسىلجان مامىتبەكوۆكە «حالىقتىق ءىرو» باعدارلاماسىنا اۋىل شارۋاشىلىعى سالاسىنداعى كومپانيالاردىڭ قاتىسۋى ماسەلەسىن قاراستىرۋدى تاپسىردى. بۇل تۇرعىداعى ماسەلەلەردى قاداعالاۋدى ك.ءماسىموۆ ءوزىنىڭ ءبىرىنشى ورىنباسارى ومىرزاق شوكەەۆكە جۇكتەدى.
ءابدىراحمان قىدىربەك.