كولىك جانە كوممۋنيكاتسيا ءمينيسترى بەرىك كاماليەۆ «باتىس ەۋروپا – باتىس قىتاي» جوباسىن ىسكە اسىرۋ بارىسىمەن تانىسۋ ماقساتىندا جامبىل وبلىسىندا.
جالپى, اتالعان جوبا شەڭبەرىندە جامبىل وبلىسى اۋماعىندا 495,3 كم. جولدى قايتا سالۋ بەلگىلەنگەن. قازىرگى تاڭدا قۇرىلىس جۇمىستارى ۇزاقتىعى 263,5 كم. قۇرايتىن التى ۋچاسكەدە جۇرگىزىلۋدە. وندا بەس مەردىگەر كومپانيا جۇمىس اتقارۋدا. جامبىل وبلىسى بويىنشا جوبانى ىسكە اسىرۋ باستالعاننان بەرى 38 ملرد. تەڭگە (2011 جىلى 13,49 ملرد.تن.) يگەرىلدى, 43,2 كم. اسفالت-بەتون جامىلعىسىنىڭ تومەنگى قاباتى جانە 7,3 كم. ۇستىڭگى قاباتى توسەلدى, 156,8 كم. تسەمەنت-بەتون جامىلعى سالىندى.
قازىرگى ۋاقىتتا مەردىگەر كومپانيالار 7 كوپىردى, 4 جول وتپەسى, 2 ءتۇيىندى جوندەۋ بويىنشا جۇمىستار جۇرگىزۋدە. ساپانى باقىلاۋدى قامتاماسىز ەتۋ ءۇشىن 3 تەحنولوگيالىق باقىلاۋشى, جىلجىمالى جول لابوراتورياسى تارتىلدى, 6 نىساندا مەردىگەرلەر ستاتسيونارلى جانە جىلجىمالى لابوراتوريالار ۇيىمداستىردى. ساپار بارىسىندا مينيستر بەرىك كاماليەۆ مەردىگەرلىك كومپانيالاردىڭ باسشىلارىمەن جينالىستار وتكىزدى. مينيستر ءوز سوزىندە جۇمىس كەستەسىن ۋاقىتىلى ورىنداۋ قاجەتتىگىن اتاپ ءوتتى.
«ەگەمەن-اقپارات».