كەشەگى اقپاراتتارعا قاراعاندا, مۋاممار كاددافيدىڭ رەجىمى قۇلاۋدىڭ از-اق الدىندا تۇر. وتپەلى ۇلتتىق كەڭەس (وۇك) وكىلدەرىنىڭ سوڭعى مالىمەتىنە قاراعاندا, ەل استاناسى تريپولي قالاسىنىڭ 20 پايىزدايى عانا كاددافي اسكەرىنىڭ باقىلاۋىندا قالعان. بىراق, سوعان قاراماي, كوتەرىلىسشىلەر جەڭىستەرىن اشىق تويلاپ جاتتى.
ءتريپوليدى الۋدىڭ شابۋىلى ناتو اسكەري-اۋە كۇشتەرىنىڭ كومەگىمەن جەكسەنبىگە قاراعان تۇندە باستالعان. العاشقى ەكپىنمەن كوتەرىلىسشىلەردىڭ كۇشى تريپوليدەن 27 شاقىرىم جەردە ورنالاسقان كاددافيدىڭ اسكەري بازاسىن باسىپ الدى. مۇنداعى ۇزدىك اسكەردى كاددافيدىڭ ءبىر بالاسى حاميس باسقارعان بولاتىن. جەكسەنبى كۇنى شابۋىلدار ودان ءارى جالعاسىپ, كوتەرىلىسشىلەر ءتريپوليدىڭ ورتالىعىن تۇگەل باسىپ الدى. بىراق پولكوۆنيكتىڭ سەنىمدى اسكەرلەرى دە جانتالاسا قارسىلىق كورسەتتى.
جاڭبىردىڭ زارداپتارى وراسان
ءۇندىستاندا تولاستاماي جاۋعان مۋسسوندىق نوسەرلەردىڭ كەسىرىنەن ونداعان ەلدى مەكەندەر سۋ استىندا قالدى. سوڭعى مالىمەتتەرگە قاراعاندا, 50-دەن استام ادام قازا تاۋىپ, 300 مىڭنان استام ادام باسپاناسىنان ايىرىلعان.
اسىرەسە, باتىس بەنگاليادا جولدار بۇزىلىپ, تەمىر جول قاتىناسى ءۇزىلدى. اۋىل شارۋاشىلىعىنا وراسان زور شىعىندار كەلتىرىلدى. بيحار, اسسام, ۋتتار-پرادەش شتاتتارىنداعى جاعدايلار دا وسىنداي. سوڭعى ءۇش كۇندە تۇسكەن ىلعال مولشەرى 850 مم-گە جەتىپتى. اپاتتىڭ الەگىن جويۋ جۇمىستارىنا ەلدىڭ اسكەري كۇشتەرى تارتىلۋدا.
كيىم ارقىلى جاسالاتىن جارناما
ىستامبۇل قالاسىنداعى اتاقتى سۇلتاناحمەت مەشىتىنىڭ يمامدارى اقشا ءتۇسىرۋدىڭ جەڭىل ءادىسىن ويلاپ تاۋىپتى. ولار مەشىتكە كەلەتىن ءاربىر مۇسىلمان ءۇشىن درەسس-كود ەنگىزىپتى. ونىڭ ءمانىسى: مۇندا كىرەتىن ءاربىر مۇسىلمان مەشىتتىڭ سيمۆوليكاسى كورسەتىلگەن مۇسىلمان كيىمىن اۆتوماتتان الۋعا ءتيىستى ەتىلگەن.
مۇسىلماندىق كيىمدەر كلاسسيكالىق يسلامدىق ۇلگىدە تىگىلگەن ەكەن. جىل سايىن بۇل مەشىتتى كورۋگە 4-5 ملن. تۋريست كەلەتىن كورىنەدى. ولاردىڭ ارقايسىسى وسىناۋ كيىمدى العاندا مەشىتكە از پايدا تۇسپەسى بەلگىلى. ونىڭ ۇستىنە سۇلتاناحمەت مەشىتىنىڭ سىيكادەلىك كيىمدەر ارقىلى تانىلۋى دا ارتا تۇسەرى ءسوزسىز.
جىلدامدىقتىڭ تومەندىگى قۇتقاردى
جەكسەنبى كۇنى مىسىردا ەكى جولاۋشى پويىزى سوعىلعان. قاراما-قارسى كەلە جاتقان پويىزدارعا «كوك جارىق» تەمىر جول قىزمەتى جاۋاپتى جۇمىسشىسىنىڭ قاتەلىگىنەن جاعىلعان بولىپ شىقتى.
ابىروي بولعاندا, پويىزداردىڭ جىلدامدىعى تومەن بولىپ, سونىڭ ارقاسىندا ادام شىعىنىنا جول بەرىلمەگەن. ايتپەسە, ناعىز اپات ورىن الادى ەكەن. تەك 15 ادام جارالانىپ, اۋرۋحانالارعا جەتكىزىلگەن. قازىر ەلدىڭ پروكۋراتۋرا ورگاندارى اسا قاۋىپتى قاتەرگە ۇشىراتا جازداعان قاتەلىكتىڭ سەبەبىن انىقتاۋدا. جاۋاپتى جۇمىسشىنىڭ مىندەتىن اتقارۋشى ادام بىردەن قاماۋعا الىنعان.
تاعى ءبىر ۇشاق اپاتقا ۇشىرادى
لەنينگراد وبلىسىنداعى روپشا كەنتىنىڭ ماڭىنداعى ەگىس الاڭىنا سەنبى كۇنى جەكە مەنشىك ۇشاق قۇلاپ, ءتورت ادام قازا تاپتى. اشىق الاڭعا قۇلاعاننىڭ ارقاسىندا عانا ۇلكەن اپاتتىڭ جولى كەسىلدى, ايتپەسە جارىلعان اۋە كەمەسىنىڭ قىزۋى ۇلكەن زارداپ اكەلەرى ءسوزسىز ەكەن. قازىر ۇشاقتاعى جانداردىڭ كىمدەر بولعانى انىقتالۋدا.
وسى لەنينگراد وبلىسىندا بەس كۇن عانا بۇرىن ءتورت كىسىلىك جەكە مەنشىك ۇشاق اپاتقا ۇشىراعان ەدى. وندا ۇشاق ەلەكتر جۇيەسىنىڭ باعانىنا سوعىلعان بولاتىن. كىنالىلەردى انىقتاۋ بارىسىندا ۇشقىشتىڭ اسپانعا كوتەرىلۋگە ەشقانداي قۇقى بولماعاندىعى انىقتالىپ, بار جاۋاپكەرشىلىك سوعان اۋدارىلعان ەدى.
مۇگەدەكتەر قامقورلىققا ءزارۋ
قىرعىزستانداعى دەنساۋلىعى ءدىمكاس جانداردىڭ قۇقىعىن قورعايتىن قوعامدىق ۇيىمدار ەلدىڭ پرەمەر-ءمينيسترى ا.اتامباەۆقا حات جولداپ, ۇكىمەتتىڭ وزدەرى قولدايتىن جاندارعا ەشقانداي كومەك قولىن سوزبايتىنىن دالەلدەپ بەردى.
حاتتا مۇگەدەك جاندار ءۇشىن جۇمىس ورىندارىنىڭ كۆوتالانبايتىندىعى, سالىنىپ جاتقان ۇيلەردە پاندۋس قاراستىرىلمايتىنى جانە ت.ب جوقتىعى ايتىلعان. قازىر قىرعىزستاندا 133 مىڭ مۇگەدەك جان بار ەكەن جانە ولار جىل سايىن 4-5 پايىزعا كوبەيىپ وتىراتىن كورىنەدى. ال 10 جىلدان كەيىن بۇلاردىڭ سانى 200 مىڭعا جەتپەكشى. قوعامدىق ۇيىمدار وسىنداي جاندارعا قامقورلىقتى پرەمەر-مينيستردىڭ ءوزى تىكەلەي باقىلاۋعا الۋىن وتىنگەن.
قىسقا قايىرىپ ايتقاندا:
• سانكت-پەتەربۋرگتىڭ گۋبەرناتورى ۆ.ماتۆيەنكو مۋنيتسيپالدىق سايلاۋدا 90 پايىزدان ارتىق داۋىس جيناپ جەڭىسكە جەتتى. كەشە ول گۋبەرناتورلىق تاقتى بوساتىپ, فەدەرالدىق كەڭەستىڭ دەپۋتاتتىعىنا ءوتتى. مۇندا ول سپيكەردىڭ تاعىنان ءۇمىت ەتىپ وتىر.
• بريتانيا پرەمەر-ءمينيسترى د.كەمەرون كەشە جۋرناليستەر الدىندا سويلەپ, م.كاددافيدى ليۆيا حالقى سوتتاۋى كەرەك ەكەنىن مالىمدەدى. سونىمەن بىرگە, بريتانيا ۇكىمەتى ونىڭ تۇتقىندالعان ەسەپ-شوتتارىنداعى قاراجاتتى كوتەرىلىسشىلەرگە بوساتا باستايتىنىن جەتكىزدى.
• ماسكەۋدە تاعى دا ورتالىقازيالىق ازاماتتار شەيىت بولدى. 31 جاستاعى وزبەك ايەلى ەكى قىزىمەن بىرگە قىلقىندىرىلىپ ولتىرىلگەن. كۇدىكتى ۇستالىپتى.
• جەكسەنبى كۇنى سيريا پرەزيدەنتى باشار اساد ەلدىڭ تەلەارناسى ارقىلى سويلەپ, ءوزىنىڭ تاقتان كەتپەيتىنىن مالىمدەدى. ول مەملەكەتتىڭ قاۋىپسىزدىك كۇشتەرى ەلدەگى ءتارتىپتى ساقتاي الاتىنىن جاريالادى.
ينتەرنەت ماتەريالدارى نەگىزىندە ازىرلەندى.