كەشە پارلامەنت سەناتىنىڭ توراعاسى قايرات ءمامي رەسەي فەدەراتسياسى فەدەرالدى جينالىسى فەدەراتسيا كەڭەسى كوميتەتىنىڭ مۇشەسى, تمد پاا بايقاۋشىلار توبى ۇيلەستىرۋشىسىنىڭ ورىنباسارى ۆاديم گۋستوۆ باستاعان تمد پاا-نىڭ پارلامەنت سەناتى دەپۋتاتتارى سايلاۋىن بايقاۋ جونىندەگى دەلەگاتسياسىن قابىلدادى.
پارلامەنت جوعارعى پالاتاسىنىڭ دەپۋتاتتارىن سايلاۋ مونيتورينگىنە قاتىسقانى ءۇشىن تمد پاا ميسسياسىنا ريزاشىلىعىن بىلدىرە كەلىپ, سەنات توراعاسى «دوستاستىق ەلدەرى دەپۋتاتتارىنىڭ تاراپىنان قازاقستانداعى سايلاۋدى بايقاۋ جاقسى داستۇرگە اينالدى», – دەدى.
ق.ءمامي حالىقارالىق دەموكراتيانى, پارلامەنتاريزمدى دامىتۋ جانە تمد پاا-عا قاتىسۋشى مەملەكەتتەر ازاماتتارىنىڭ سايلاۋ قۇقىقتارىنىڭ ساقتالۋى مونيتورينگى ينستيتۋتى ساراپشىلار توبىنىڭ سەنات دەپۋتاتتارىن سايلاۋعا ازىرلىكتى ۇزاق مەرزىمدى مونيتورينگى ءجونىندەگى ارالىق ەسەبىمەن تانىسقانىن جەتكىزدى.
«ەسەپتە سايلاۋ ۇدەرىستەرىنىڭ بارلىق جاعدايى قامتىلعان جانە الداعى سايلاۋعا ازىرلىككە شىنايى باعا بەرىلگەن», دەدى توراعا.
تمد پاا بايقاۋشىلار توبى ۇيلەستىرۋشىسىنىڭ ورىنباسارى ۆاديم گۋستوۆتىڭ ايتۋىنشا, «قازاقستانداعى سايلاۋ الدى ۇدەرىستەرى ايقىن جانە دەموكراتيالىق تۇرعىدا وتۋدە». «ءبىز قازاقستانعا بايقاۋشى رەتىندە زور ىقىلاسپەن كەلەمىز, بۇل ءبىز ءۇشىن پايدالى تاجىريبە», دەپ اتاپ ءوتتى ۆ.گۋستوۆ.
19 تامىزدا ەلىمىزدە پارلامەنت سەناتى دەپۋتاتتارىنىڭ سايلاۋى بولادى. سايلاۋعا قازىرگى كەزدە 68 حالىقارالىق بايقاۋشى تىركەلدى, ونىڭ ىشىندە 8 ادام تمد پاا-دان بولىپ وتىر.
كەزدەسۋگە تمد پاا كەڭەسىنىڭ باس حاتشىسى ميحايل كروتوۆ جانە قىرعىز رەسپۋبليكاسى جوگوركۋ كەنەشى سالىق جانە اقشا-نەسيە ساياساتى كوميتەتى توراعاسىنىڭ ورىنباسارى ۋلۋكبەك كوچكوروۆ قاتىستى.
«ەگەمەن-اقپارات».