كەشە ورتالىق سايلاۋ كوميسسياسى ۇستىمىزدەگى جىلدىڭ 19 تامىزىندا وتەدى دەپ بەلگىلەنگەن قازاقستان رەسپۋبليكاسى پارلامەنتى سەناتى دەپۋتاتتارىنىڭ سايلاۋىنا حالىقارالىق ۇيىمداردىڭ بايقاۋشىلارىن اككرەديتتەۋ تۋرالى ماسەلەنى قارادى.
ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ كۇن تارتىبىندەگى ماسەلەنى جاريا ەتكەننەن كەيىن قاتىسۋشىلار الدىندا وسك ءمۇشەسى تاتيانا وحلوپكوۆا بايانداما جاسادى. ونىڭ حابارلاۋىنشا, ەلىمىز سىرتقى ساياسات ۆەدومستۆوسىنىڭ ۇسىنىسىمەن پارلامەنت سەناتى دەپۋتاتتارىن سايلاۋ بارىسىن باقىلاۋ ءۇشىن ورتالىق سايلاۋ كوميسسياسى جانىنان حالىقارالىق ۇيىمداردان 68 بايقاۋشى ءتىركەلگەن. سونىمەن قاتار, سەنات سايلاۋىنا بايقاۋشى رەتىندە قاتىسۋ ءۇشىن سىرتقى ىستەر مينيسترلىگىندە تۇراقتى نەگىزدە 181 شەتەلدىك بۇقارالىق اقپارات قۇرالدارىنىڭ وكىلدەرى تىركەلگەندىگى بەلگىلى بولدى. ورتالىق سايلاۋ كوميسسياسى ءمۇشەلەرى حالىقارالىق ۇيىمداردىڭ بايقاۋشىلارىن اككرەديتتەۋ تۋرالى كۇن ءتارتىبىندەگى ماسەلەنى ءبىراۋىزدان قابىلدادى.
سالىستىرمالى تۇردە الار بولساق, 2008 جىلعى سەنات دەپۋتاتتارىن سايلاۋدا شەتەلدىك بۇقارالىق اقپارات قۇرالدارىنىڭ 136 وكىلى جانە حالىقارالىق ۇيىمداردان بايقاۋشى رەتىندە 58 ادام تىركەۋدەن وتكەن ەكەن. وسى رەتتە شەتەلدىك بۇقارالىق اقپارات قۇرالدارىنىڭ وكىلدەرى بايقاۋشىلار سياقتى سايلاۋ بارىسىن ەركىن باقىلاي الاتىنىن ايتا كەتۋ كەرەك. بايقاۋشىلاردى اككرەديتتەۋ 13 تامىزدا تولىعىمەن اياقتالاتىن بولادى.
سونداي-اق, كەشە ورتالىق سايلاۋ كوميسسياسىنىڭ توراعاسى ق.تۇرعانقۇلوۆ تمد ميسسياسى شتابىنىڭ باسشىسى – تمد اتقارۋ كوميتەتىنىڭ تاۋەلسىز مەملەكەتتەر دوستاستىعىنا مۇشە مەملەكەتتەردەگى بايقاۋشىلار ميسسياسىنىڭ ۇيىمداستىرۋ-تەحنيكالىق قامتاماسىز ەتۋ ءجونىندەگى ءبولىمىنىڭ باسشىسى ە.سلوبودا مەن وسى ميسسيا شتابىنىڭ مۇشەسى, تمد اتقارۋ كوميتەتىنىڭ ساراپتامالىق-قۇقىقتىق ءبولىمىنىڭ كەڭەسشىسى ە.كوزياكتى قابىلدادى. اتالعان ەكى بايقاۋشى دا ۇشاقتان تۇسىسىمەن كەزدەسۋگە كەلىپتى. ولار وسىندا بايقاۋشى كۋالىگىن الدى. ق.تۇرعانقۇلوۆ وسك تمد ميسسياسىنا سايلاۋ بارىسىن باقىلاۋدا ۇيىمداستىرۋ جونىندەگى اقپاراتتىق جانە وزگە دە كومەكتەردى كورسەتۋگە دايىن ەكەندىگىن ءبىلدىردى.
اسقار تۇراپباي ۇلى.