كەشە قازاقستان رەسپۋبليكاسى پرەزيدەنتى اكىمشىلىگىنىڭ باسشىسى اسلان مۋسين جۇمىس ساپارىمەن اقتوبە وبلىسىنا كەلدى. ول وبلىستىق ءماسليحاتتىڭ كەزەكتەن تىس XXX سەسسياسىنا قاتىسىپ, مەملەكەت باسشىسى نۇرسۇلتان نازارباەۆتىڭ اقتوبە وبلىسى اكىمى قىزمەتىنە ارحيمەد مۇحامبەتوۆتى ۇسىنعانىن جەتكىزدى. دەپۋتاتتار ەلباسى ۇسىنىسىن ءبىراۋىزدان قولدادى.
سودان كەيىن پرەزيدەنت اكىمشىلىگىنىڭ باسشىسى وبلىستىق اكتيۆ جينالىسىنا قاتىستى. اسلان مۋسين اكتيۆ جينالىسىنا قاتىسۋشىلار الدىندا ەلباسى جارلىعىمەن اقتوبە وبلىسىنىڭ اكىمى ەلەۋسىن ساعىندىقوۆتىڭ باسقا قىزمەتكە اۋىسۋىنا بايلانىستى جۇمىسىنان بوساتىلعانىن, ال ونىڭ ورنىنا ارحيمەد مۇحامبەتوۆتىڭ تاعايىندالعانىن ءمالىمدەدى. اسلان ەسبولاي ۇلى ءوز سوزىندە ەلەۋسىن ساعىندىقوۆتىڭ وبلىستى باسقارعان جىلدارى ءوڭىردىڭ ەكونوميكالىق-الەۋمەتتىك دامۋىنا ءوزىندىك ۇلەس قوسقانىن, ءبىرتالاي شارۋالاردى تىندىرۋعا باستاماشى بولعانىن اتاپ ءوتتى. وعان ەلباسى اتىنان راحمەت ايتتى. بۇعان دەيىن اقتوبە قالاسىن ءۇش جىل باسقارعان ارحيمەد مۇحامبەتوۆتىڭ اقتوبەلىكتەرگە جاقسى تانىستىعىن دا جاسىرمادى. ءوز كەزەگىندە ءسوز العان ەلەۋسىن ناۋرىزباي ۇلى وبلىستىڭ ەل ەكونوميكاسىنداعى جەتەكشى ءرول اتقاراتىنىنا توقتالا كەلىپ, كوپتەگەن كورسەتكىشتەر بويىنشا ىلگەرىلەۋگە قول جەتكىزىلگەنىن تىلگە تيەك ەتتى. ءوزى ءوڭىر تىزگىنىن قولعا العاننان بەرى ەلباسى تاراپىنان ۇدايى قولداۋ كورسەتىلگەنىن, جەرگىلىكتى بيلىك تە ءوزدەرىنە بەرىلگەن تاپسىرمانى ابىرويمەن ورىنداعانىن جەتكىزدى. اقتوبەلىكتەردىڭ بىرلىگى مەن ىنتىماعى تالاي تابىستى جوبالاردى جۇزەگە اسىرۋعا العىشارت جاساعانىن ايتا كەلىپ, وسى جىلداردا ىنتىماقتاسا جۇمىس ىستەگەندەرى ءجانە قولداپ وتىرعاندارى ءۇشىن جەرلەستەرىنە ريزاشىلىعىن ءبىلدىردى.
جاڭا تاعايىندالعان وبلىس اكىمى ارحيمەد مۇحامبەتوۆ وزىنە كورسەتىلگەن ەلباسى سەنىمىن اقتايتىنىن, قولداۋ بىلدىرگەن جەرلەستەرىن جەرگە قاراتپايتىنىن جەتكىزدى.
اكتيۆ جينالىسىندا ءسوز العان ەڭبەك ارداگەرلەرى, حالىقارالىق «قازاق ءتىلى» قوعامى وبلىستىق ۇيىمنىڭ توراعاسى كەمەيدوللا تولەۋباي, وبلىستىق مۇگەدەكتەر قوعامىنىڭ توراعاسى فەدور چەمودانوۆ, «بەيبىتشىلىك جانە كەلىسىم» كەڭەسى وبلىستىق فيليالىنىڭ توراعاسى كەلدىباي ەسپاعامبەتوۆ, ەلەۋسىن ساعىندىقوۆقا ءوڭىر تىزگىنىن قولعا العان كەزەڭدە اتقارعان جۇمىستارى ءۇشىن العىس سەزىمدەرىن بىلدىرسە, جاڭادان تاعايىندالىپ جاتقان وبلىس اكىمى ارحيمەد مۇحامبەتوۆكە جاڭا قىزمەتىندە تابىس, ساتتىلىكتەر تىلەدى.
اكتيۆ جينالىسىن قورىتىندىلاعان اسلان مۋسين ءوڭىردىڭ ەكونوميكالىق مۇمكىندىگى مول ەكەنىن ايرىقشا اتاپ ءوتتى. ەلەۋسىن ساعىندىقوۆ وبلىس اكىمى بولىپ تۇرعاندا ءبىراز شارۋالاردىڭ تىندىرىلعانىن العا تارتتى. الايدا, وبلىس ەكونوميكاسىنىڭ 80 پايىزى تاۋ-كەن, مۇناي وندىرۋگە تاۋەلدى بولىپ وتىرعانىن, ەگىنشىلىكتىڭ قۇرىلىمىن وزگەرتۋ قاجەتتىگىن, اۋىلدىق جەرلەردى اۋىز سۋمەن قامتاماسىز ەتۋدىڭ كەنجە قالعانىن, جەرگىلىكتى جولداردىڭ ءجوندەۋ كۇتىپ تۇرعانىن وزەكتى ماسەلەلەر رەتىندە كوتەردى. اسىرەسە, قىلمىسكەرلىكتىڭ كەمىمەي وتىرعانىن, ونىڭ ىشىندە اۋىر قىلمىس جاساۋشىلىقتىڭ بەلەڭ العانىن, ءدىن ماسەلەلەرىندە دە تۇيتكىلدەر بار ەكەنىن قاداپ ايتتى. ول وسى جانە باسقا دا وزەكتى ماسەلەلەردى شەشۋگە جاڭادان تاعايىندالعان وبلىس اكىمى ارحيمەد مۇحامبەتوۆتىڭ ىسكەرلىگى مەن بىلىكتىلىگى, قارىم-قابىلەتى جەتەتىنىنە سەنىم ءبىلدىردى. بۇعان دەيىن اقتوبە قالاسىن ءۇش جىل باسقارعان جاڭا اكىمنىڭ تاۋەلسىزدىك جىلدارى شىڭدالعان باسشىلاردىڭ جاڭا تولقىنىنا جاتاتىنىن ەسكە سالدى.
سودان كەيىن پرەزيدەنت اكىمشىلىگىنىڭ باسشىسى اسلان مۋسين قۇقىق قورعاۋ ورگاندارى باسشىلارىمەن جيىن وتكىزىپ, بۇل باعىتتاعى ەلباسى تاپسىرماسىن جەتكىزدى, سالاداعى وزەكتى ماسەلەلەردى تالقىلادى.
ساتىبالدى ءساۋىرباي, اقتوبە وبلىسى.