ورتالىق قىتايدا ورىن العان جول-كولىك اپاتى سالدارىنان 41 ادام قازا تاۋىپ, تاعى التى ادام ءارتۇرلى دەنە جاراقاتتارىن العان. وقيعا جۇما كۇنى تاڭەرتەڭ بولعان.
حەنان پروۆينتسياسىنىڭ سينيان قالاسىندا جولمەن جۇيتكىپ كەلە جاتقان اۆتوبۋستا تابان استىنان ءورت شىققان. ازىرگە ونىڭ سەبەبى, سالدارى انىقتالۋدا. ەڭ باستى جورامال سالوندا تەز تۇتاناتىن ماتەريال بولدى دەگەنگە سايادى. ءبىر بەلگىلىسى اۆتوبۋستا 35 ورىندىق بولسا, جولاۋشىلار سانى 47 كورىنەدى.
گرەكياعا 158, 6 ميلليارد ەۋرو بەرەتىن بولدى
ەۋرونىڭ دوللارعا شاققانداعى باعامى سوڭعى ەكى اپتا ىشىندە ءبىرشاما كوتەرىلدى. اتالعان ۆاليۋتانىڭ مۇنشالىقتى سەنىمگە يە بولۋى حالىقارالىق ۆاليۋتا قورىنىڭ قاتىسۋىمەن ەۋروايماق ەلدەرى باسشىلارىنىڭ سامميتىمەن بايلانىستى دەلىنۋدە.
اتالعان جيىندا وڭىردەگى قارجىلىق تۇراقتىلىقتى ساقتاۋ جونىندەگى قوسىمشا شارالار جوسپارى بەكىتىلدى جانە گرەكياعا كومەك كورسەتۋ ماقساتىندا قۇنى 158,6 ميلليارد ەۋرو بولاتىن ۇشجىلدىق باعدارلاما قابىلداندى. توتەنشە سامميت ەۋروپا وداعىنىڭ پرەزيدەنتى حەرمان ۆان رومپەيدىڭ باستاماسىمەن وتكەن.
كاددافي ب ۇلىكشىلەرمەن كەلىسسوز جۇرگىزبەيدى
ليۆيا باسشىسى مۋاممار كاددافي ب ۇلىكشىلەرمەن كەلىسسوز جاسامايتىندىعىن مالىمدەدى. قازىرگى تاڭدا ليۆيالىق ديكتاتوردىڭ تاعىنان بەيبىت جولمەن كەتۋى تۋرالى ءارتۇرلى قاۋەسەتتەر ايتىلىپ ءجۇر.
ءتىپتى, اقش مەمدەپارتامەنتى مەن فرانتسيا ۇكىمەتى كاددافي وكىلدەرىمەن كەزدەسىپ, وسى ماسەلە بارىسىن تالقىلاعان دەگەن اقپارات تا تاراپ ۇلگەرگەن. الايدا, تريپولي بۇل ماسەلەدە وپپوزيتسيامەن كەلىسسوزدەردىڭ بولۋى مۇمكىن ەمەستىگىن ءجيى قايتالاپ كەلەدى. سويتسە دە كاددافي جاقتاستارى تۇيىقتان از شىعىنسىز شىعۋعا تىرىسۋدا.
قوعامدىق كولىك قاتىناسىن ءبىر تاۋلىككە توقتاتتى
يتاليادا كولىك سالاسىنىڭ كاسىپوداق ۇيىمدارى ەرەۋىلدى باستادى. وسى ەلدىڭ تەمىر جول كولىگى قىزمەتكەرلەرىنىڭ ەرەۋىلگە شىعۋىنان پويىزدار, مەترو, قالالىق اۆتوبۋستار مەن ترامۆايلار توقتاعان.
سوڭعى رەت كولىك ترانسپورت قىزمەتكەرلەرى مۇنداي جالپىۇلتتىق اكتسيانى ۇستىمىزدەگى جىلدىڭ 31 ناۋرىزى مەن 1 ءساۋىر ارالىعىندا وتكىزگەن-ءدى. ەرەۋىلگە شىعۋدىڭ باستى سەبەبى, جەرگىلىكتى كولىك سالاسىنا بولىنەتىن قارجىنىڭ قىسقارۋى, سونداي-اق جاڭا ەڭبەك شارتىن جاساۋ جونىندەگى جۇمىستىڭ تۇرالاپ قالۋىندا جاتىر. كولىك سالاسىنىڭ كاسىپوداق ۇيىمدارى وسى ماسەلەلەردى شەشۋدى تالاپ ەتۋدە.
291 ميلليارد دوللار جۇمسالادى
سوڭعى بەس جىلدا جاپونيا ۇكىمەتى تسۋنامي زارداپتارىن جويۋ ءۇشىن 19 تريلليون يەن (291 ميلليارد دوللار) جۇمساۋدى كوزدەيدى. نەگىزىنەن بۇل قارجىلار ءۇستىمىزدەگى جىلدىڭ 11 ناۋرىزىندا سۋ شايعان ينفراقۇرىلىمداردى قالپىنا كەلتىرۋ ءۇشىن قاجەت.
مۇنشالىقتى قارجى كوزىن تابۋ ماقساتىندا ۇكىمەت شىعىنداردى قىسقارتىپ, مەملەكەتتىك اكتيۆتەردى ساتۋدى ماقسات ەتىپ وتىر. سونىمەن قاتار, سالىق كولەمى دە ءبىرشاما ارتاتىنىن بولادى. قازىرگى تاڭدا اتالعان قارجىلىق قۇيىلىمعا قاجەتتى سوما ءبىر اي ىشىندە تولىق انىقتالىپ, شەشىم قابىلدانادى دەپ كۇتىلۋدە.
بەيرەسمي كەلىسسوزدەر جۇرگىزىلەتىن سياقتى
بۇعان دەيىن ارالارى ءبىر جىلىپ, ءبىر سۋىپ تۇرعان سولتۇستىك كورەيا مەن وڭتۇستىك كورەيا وڭتۇستىك-شىعىس ازيا مەملەكەتتەرى قاۋىمداستىعىنىڭ كەزەكتى فورۋمىندا بەيرەسمي كەلىسسوزدەر جۇرگىزەدى دەپ كۇتىلۋدە. مۇنداي اقپاراتتى اق ۇيدەگى مالىمەت كوزى حابارلاعان.
Associated Press اگەنتتىگىنىڭ حابارلاۋىنشا, بۇل ەكى ەل اراسىنداعى ءوزارا ىقپالداسۋعا دەگەن قادام. سولتۇستىك كورەيانىڭ يادرولىق باعدارلاماسى جونىندەگى كەلىسسوزدەر وسىدان ءدال ەكى جىل بۇرىن توقتاپ قالعان بولاتىن. ەندى وسى ماسەلەدەگى كەلىسسوزدەر اقش, قىتاي, رەسەي, جاپونيا جانە وڭتۇستىك كورەيا ديپلوماتتارىنىڭ قاتىسۋىمەن قايتادان جالعاسىن تاباتىن بولادى.
قىسقا قايىرىپ ايتقاندا:
*مەكسيكا بيلىگى ورتالىق كەرەتارو شتاتىندا سينتەتيكالىق ەسىرتكى دايىنداۋ ءۇشىن جاسىرىلعان 839,5 توننا جانە 340 مىڭ ليتر بولاتىن شيكىزات تاركىلەگەن.
ء*وز ءداۋىرىنىڭ ەڭ ءبىر تانىمال بريتان سۋرەتشىسى ليۋسەن فرەيد 88 جاسقا كەلگەن شاعىندا ومىردەن وزدى. اتاقتى سۋرەتشى ءپسيحواناليزدىڭ نەگىزىن قۇرعان اتاقتى زيگمۋند فرەيدتىڭ نەمەرەسى. ول 1922 جىلى بەرليندە ومىرگە كەلگەن.
*كانادا بىرنەشە جىلعا سوزىلعان كەلىسسوزدەردەن كەيىن كاسىپكەر لاي ءچانسيندى قىتايلىق تەرگەۋشىلەردىڭ قولىنا تاپسىردى. وعان قحر اۋماعىنا اۆتوكولىكتەردى, تەمەكى مەن مۇناي ونىمدەرىن جانە وزگە دە تاۋارلاردى كونتراباندالىق جولمەن كىرگىزدى دەگەن ايىپ تاعىلىپ وتىر.
*بريتانيانىڭ وليمپيادا كوميتەتى «مەردوك» كورپوراتسياسىمەن وليمپيادانى جاريالاۋ ءۇشىن جاسالعان كەلىسىم-شارتتى بۇزاتىندىقتارىن مالىمدەدى.
ينتەرنەت ماتەريالدارى نەگىزىندە ازىرلەندى.