59 850 000 000 ۇستىمىزدەگى جىلدىڭ التى ايىندا وبلىستا وسىنشاما تەڭگەنىڭ ونەركاسىپ ءونىمى ءوندىرىلدى. بۇل وتكەن جىلدىڭ ءتيىستى كەزەڭىمەن سالىستىرعاندا 162,1 ميلليارد تەڭگەگە كوپ.
مۇنىڭ ءوزى وڭىردە ەكونوميكانىڭ تۇراقتى جانە ۇدەمەلى دامۋىنا بەرىك نەگىز قالانعانىن كورسەتەدى. بيىل جۇزەگە اسىرىلاتىن 53 ۇدەمەلى يندۋستريالىق-يننوۆاتسيالىق جوبانى ىسكە قوسۋ بۇل جۇمىسقا ءبىراز سەرپىن بەرەدى دەپ كۇتىلۋدە. ونىڭ 28-ءى يندۋستريالىق دامۋ كارتاسى اياسىندا جۇزەگە اسىرىلماقشى. قازىردىڭ وزىندە ون جوبا پايدالانۋعا بەرىلدى. بيىل جاڭادان 10,4 مىڭ جۇمىس ورنى اشىلادى دەپ كۇتىلۋدە. وسىنداي جوسپارلى جۇمىستاردى جۇزەگە اسىرۋ ناتيجەسىندە ونەركاسىپ ءوندىرىسى كولەمىن جىل اياعىندا 1 ترلن. 200 ميلليارد تەڭگەگە جەتكىزۋ كوزدەلۋدە.
ساتىبالدى ءساۋىرباي, اقتوبە وبلىسى.
246 000 000 «شارىقتاس» كاسىپورنى وتكەن جىلى وسىنشاما تەڭگەنىڭ ءونىمىن ءوندىردى.
«شارىقتاس» كاسىپورنىنىڭ نەگىزگى قىزمەتى تابيعي تاستى ءوندىرۋ مەن وڭدەۋگە نەگىزدەلگەن. يتاليانىڭ «Pedrini» جانە «Monlevi» فيرمالارىنىڭ قۇرال-جابدىقتارىن پايدالانعان ءوندىرىس ورنىنىڭ ونىمىنە سۇرانىس جوعارى. تاستى وڭدەۋ, قاشاۋ, كەسۋ, جيەكتەۋ, جىلتىراتۋ ءتارىزدى جۇمىسپەن 70 ادام شۇعىلدانادى. زاۋىتتىڭ ءونىم شىعارۋ كولەمى جىل سايىن ارتۋدا. مۇنداعى جىلدىق جوسپار 1072 شارشى مەتر گرانيت, 413 شارشى مەتر ءمارمار جانە 38 مىڭ شارشى مەتر جول كومكەرمەلەرىن شىعارۋ. وتكەن جىلى 246 ملن. تەڭگەنىڭ ساپالى ءونىمى تۇتىنۋشىعا جول تارتسا, بيىلعى 6 ايدا 42 ملن. تەڭگەگە جۋىق ءونىم ءوندىرىلىپتى. نەگىزگى شيكىزات كۇرتى كەنىشىنەن تاسىمالدانسا, گرابرو شاجا جانە بالقاش پەن قورداي كەنىشتەرىنەن اكەلىنەدى.
كۇمىسجان بايجان, الماتى وبلىسى.
194 000 000 اتىراۋدا جىل باسىنان بەرى وسىنشاما تەڭگەنىڭ اۋىل شارۋاشىلىعى ونىمدەرى ساتىلعان 191 جارمەڭكە وتكىزىلدى
وبلىس اكىمى بەرگەي رىسقاليەۆ «اتىراۋ» الەۋمەتتىك-كاسىپكەرلىك كورپوراتسياسىنا بيۋدجەت قارجىسىنا ساتىپ الىنعان تاۋارلاردى حالىققا ۇسىناتىن ارنايى ساۋدا نۇكتەلەرىن اشۋدى تاپسىرعان ەدى. اكىمنىڭ ورىنباسارى سەرىك ايداربەكوۆتىڭ ايتۋىنشا, بۇل كۇندەرى 12 ءتۇرلى تاۋار «كوكتەم», «ناسيحا», «دينا» بازارلارى, سونداي-اق «يدەال», «اتابا» سۋپەرماركەتتەرىندەگى ساۋدا نۇكتەلەرىندە ساتىلىپ كەلەدى. ءار اپتانىڭ سەنبى, جەكسەنبى كۇندەرى اۋىل شارۋاشىلىعى ونىمدەرىن دەلدالسىز جانە ورىن اقىسىز ساتاتىن 191 جارمەڭكە وتكىزىلىپتى. وسى شارا بارىسىندا حالىققا 194 000 000 تەڭگەنىڭ اۋىل شارۋاشىلىعى تاۋارلارى ساتىلعان.
جولداسبەك شوپەعۇل, اتىراۋ وبلىسى.