كەشە ەلوردادا شىۇ باس حاتشىسى مۇراتبەك يماناليەۆ پەن بۇۇ باس حاتشىسىنىڭ ورىنباسارى, بۇۇ-نىڭ ەسىرتكى جانە قىلمىس جونىندەگى باسقارماسىنىڭ اتقارۋشى ديرەكتورى يۋري فەدوتوۆ شىۇ حاتشىلىعى مەن بۇۇ-نىڭ ەسىرتكى جانە قىلمىس جونىندەگى باسقارماسى اراسىنداعى ءوزارا تۇسىنىستىك تۋرالى مەموراندۋمعا قول قويدى.
بۇل قۇجات ەسىرتكىنىڭ زاڭسىز اينالىمىنا, ەسىرتكى پايدالانۋعا, حالىقارالىق تەرروريزمگە, ۇيىمداسقان قىلمىسقا, باسقا دا قىلمىس تۇرلەرىنە قارسى كۇرەس بارىسىنداعى ىنتىماقتاستىققا نەگىزدەلگەن. قول قويۋ راسىمىنەن كەيىنگى سوزىندە شىۇ باس حاتشىسى مۇراتبەك يماناليەۆ بۇل قۇجاتتىڭ الداعى ۋاقىتتا اتالعان ءماسەلەلەر بويىنشا ءوزارا ارەكەتتەستىكتى ءتيىمدى جۇزەگە اسىرۋعا ىقپال ەتەتىنىن اتاپ ءوتتى. «بۇل مەموراندۋمدا حالىقارالىق تەرروريزممەن, زاڭسىز ەسىرتكىمەن, ۇيىمداسقان قىلمىسپەن كۇرەس جۇرگىزۋ ماسەلەلەرى قامتىلعان, – دەدى باس حاتشى. – قىلمىسپەن كۇرەستى بىرلەسكەن تۇردە جۇزەگە اسىرعان ءتيىمدى. قۇجات سوعان نەگىز قالايدى».
ال بۇۇ باس حاتشىسىنىڭ ورىنباسارى يۋري فەدوتوۆ قۇجاتتىڭ شىۇ مەرەيتويىنىڭ قارساڭىندا بەكىتىلگەنىنە توقتالىپ ءوتتى. «ءبىز بۇعان دەيىنگى جىلداردا دا ءوزارا ءىس-قيمىلدى جۇيەلى تۇردە جۇرگىزىپ كەلدىك, – دەدى يۋري فەدوتوۆ وسى تۋرالى. – ەندى الدىمىزدان جاڭا ءمۇمكىندىكتەر اشىلىپ وتىر. بۇۇ-نىڭ ەسىرتكى جانە قىلمىس جونىندەگى باسقارماسى بۇگىندە اۋعانستان, سونداي-اق كورشىلەس ەلدەر ءۇشىن جاڭا وڭىرلىك باعدارلامانى ءازىرلەۋدە. بۇل باعدارلامادا شىۇ-عا ارىپتەس رەتىندە ىنتىماقتاستىقتىڭ ءرولى كورىنىس تاباتىن بولادى.
كەشە, سونداي-اق شىۇ ءوڭىرلىك لاڭكەستىككە قارسى قۇرىلىمى اتقارۋشى كوميتەتىنىڭ ديرەكتورى جەڭىسبەك جۇمانبەكوۆ پەن ۇقشۇ باس حاتشىسى نيكولاي بورديۋجا اتقارۋشى كوميتەت پەن ۇقشۇ اراسىنداعى ءوزارا تۇسىنىستىك تۋرالى حاتتاماعا قول قويدى. بۇل قۇجات وڭىردەگى قاۋىپسىزدىك پەن تۇراقتىلىقتى نىعايتۋعا ىقپال ەتەدى. «ەكى ۇيىم اراسىندا قول قويىلعان بۇل قۇجات, – دەدى ج.جۇمانبەكوۆ ءراسىم سوڭىنان, – لاڭكەستىكپەن جانە لاڭكەستىكتى قارجىلاندىرۋعا قارسى كۇرەستى جانداندىرۋعا ىقپال ەتەدى». نيكولاي بورديۋجا: «ۇقشۇ ءۇشىن ورتالىق ازيا وڭىرىندە لاڭكەستىكپەن كۇرەس ماسەلەلەرى ەڭ ماڭىزدى باعىتتاردىڭ ءبىرى بولىپ تابىلادى. بۇل حاتتاما ءبىزدىڭ كۇش-جىگەرىمىزدى ءارى قاراي ءتيىمدى ۇيلەستىرۋگە مۇمكىندىك بەرەدى. اتالعان پروبلەمانىڭ كۇردەلى ەكەنىن جاقسى بىلەمىز», – دەدى.
ءاليسۇلتان قۇلانباي.