بايقاۋدىڭ ەڭ كىشكەنتاي قاتىسۋشىسى التى جاسار ەليسەي مىسين (رەسەي) مەن ارتۋر ميحلين (قازاقستان) «قازاقستان ءۇمىتى» ماراپاتىنا لايىق دەپ تانىلدى. سيمفونيالىق وركەسترمەن ونەر كورسەتىپ ۇيرەنگەن ەليسەي استانا ساحناسىن جاتىرقامادى. سالتاناتتى ماراپاتتاۋ كەشىندە نورۆەگ كومپوزيتورى ەدۋارد گريگتىڭ «I Dovregubbens Hall» «تاۋ كورولىنىڭ ۇڭگىرىندە» كومپوزيتسياسىن ورىنداپ, ساحنامەن قوشتاسقىسى كەلمەي, كوپشىلىكتى ءبىر كۇلدىردى. رەسەيدىڭ ستاۆروپول قالاسىنان كەلگەن ەليسەي – ءبۇكىلرەسەيلىك جانە حالىقارالىق بايقاۋلار مەن فەستيۆالداردىڭ جەڭىمپازى.
– توبەسىندە ۇلكەن شارى بار الىپ باعان ء(سىرا «ءبايتەرەك» بولسا كەرەك) ماعان قاتتى ۇنادى. مۇندا بارلىعى جاپ-جاڭا ەكەن. مەن استاناعا تاعى دا قىدىرىپ كەلگىم كەلەدى, – دەيدى التى جاسار بالاقاي.
بايگەدە باق سىناعان 18 جاسقا دەيىنگى – باستاۋىش, ورتا جانە جوعارى مۋزىكالىق ءبىلىم مەكەمەلەرىندە وقيتىن جاس پيانيستەرگە بايقاۋ شارتى بويىنشا قازاقستاندىق كومپوزيتورلاردىڭ شىعارماسىن ورىنداۋ ءمىندەتتەلگەن بولاتىن. وسى تۇرعىدا قازاقستان كومپوزيتورى ن.مەڭدىعاليەۆتىڭ «دومبىرا تۋرالى اڭىز» اتتى تۋىندىسىن فورتەپيانودا ۇزدىك ورىنداعانى ءۇشىن پەتر اكۋلوۆقا (رەسەي) ارناۋلى سىيلىق تاپسىرىلدى. ون جاسار تالاپكەر وتكەن ا.باكۋلوۆ اتىنداعى II بۇكىلرەسەيلىك جاس پيانيستەر بايقاۋىنىڭ I سىيلىق يەگەرى. جالپى, جارىسقا قاتىسىپ جاتقان جۇلدەگەرلەردىڭ قاي-قايسىسى دا وسال ەمەس.
سالتاناتتى جيىندا ءسوز العان مادەنيەت جانە سپورت ءمينيسترى ارىستانبەك مۇحامەدي ۇلى كوپشىلىكتى فەستيۆالدىڭ ءساتتى اياقتالۋىمەن قۇتتىقتادى.
– الەمنىڭ وتىزعا تارتا ەلىنەن قاتىسقان 130-عا جۋىق بالانىڭ ارقايسىسى ىرىكتەۋ تۋرىندا قازاقستاندىق كومپوزيتورلاردىڭ شىعارمالارىن ورىندادى. ءوز ەلىنىڭ ءىنجۋ-مارجاندارى سانالاتىن جاس مۋزىكانتتاردىڭ ارقاسىندا ۇلتىمىزدىڭ كومپوزيتورلارى الەمگە تانىلا ءتۇستى, – دەدى مينيستر.
ءبىر اپتاعا سوزىلعان مۋزىكالىق بايقاۋدا ءۇمىتكەرلەر تاماشا ونەر كورسەتىپ, بولاشاقتارىنان ءۇلكەن ءۇمىت كۇتۋگە بولاتىندىعىن دالەلدەدى. جاس ەرەكشەلىكتەرىنە قاراي ءبولىنگەن ءۇش توپتىڭ ۇزدىكتەرىنە سىيلىقتار تابىس ەتىلدى.
الەمنىڭ تۇكپىر-تۇكپىرىندەگى تالانتتارعا قولداۋ ءبىلدىرۋ, حالىقارالىق شىعارماشىلىق بايلانىستاردى كەڭەيتۋ ماقساتىندا جاس پيانيستەردىڭ حالىقارالىق بايقاۋى استانادا 2013 جىلدان بەرى وتكىزىلىپ كەلەدى. جوبانىڭ كوركەمدىك جەتەكشىسى – ورىس فورتەپيانو مەكتەبىن جاڭعىرتۋ جولىندا جاڭاشىلدىعى مەن كوركەمدىك تالداۋلارىمەن ەرەكشەلەنەتىن دەنيس ماتسۋەۆ. تالانتتى پيانيستىڭ بىرنەشە جىلدىق گاسترولدىك كەستەسى الدىن الا قۇرىلادى. ول ءبىر ايدا الەمنىڭ جيىرمادان استام ەلىندە كونتسەرت بەرەدى, سولاردىڭ قاتارىندا استانا دا بار.
– فەستيۆالدىڭ فانتاستيكاعا تولى اسەرىن سوزبەن ايتىپ جەتكىزۋ قيىن. بىزبەن بىرگە بولعان بارشاڭىزعا العىسىم شەكسىز. استانا ءبىزدىڭ كونكۋرسىمىزدىڭ اجىراماس ءبىر بولىگىنە اينالدى. بۇگىن استانادا كلاسسيكالىق مۋزىكا ونەرىنىڭ جاڭا جۇلدىزدارى دۇنيەگە كەلدى دەپ سەنىمدى تۇردە ايتا الامىن, – دەپ قاتىسۋشىلار مەن كورەرمەن قاۋىمعا جىلى لەبىزىن ارنادى الەمگە ايگىلى مۋزىكانت.
ايا ءومىرتاي,
«ەگەمەن قازاقستان»
سۋرەتتى تۇسىرگەن ورىنباي بالمۇرات, «ەگەمەن قازاقستان»