جيىندى كەڭەستىڭ بەلسەندى مۇشەسى نۇرلان دوسىموۆ اشىپ, جۇرگىزىپ وتىردى. ول پرەزيدەنتتىڭ «بولاشاققا باعدار: رۋحاني جاڭعىرۋ» ماقالاسىن جاستارعا ارنالعان ۇندەۋ دەپ قابىلدايتىنىن ايتتى. ويتكەنى, ونداعى تالاپتاردىڭ ءبارىن جاستار ىسكە اسىرۋى كەرەك. سونىڭ ىشىندە ساناسى بيىك, تۋعان ەل مەن جەرگە جانى اشيتىن, سۇيەتىن جاستار عانا وسى ماقالاداعى جوبالاردى ىسكە اسىراتىن بولادى, دەدى ول.
دوڭگەلەك ۇستەلدە كەزەكتى ءسوز ءماجىلىس دەپۋتاتى گەننادي شيپوۆسكيحكە بەرىلدى. ايتا كەتەتىن جايت, وسى دوڭگەلەك ۇستەلگە قاتىسقان 15 شاقتى ادامنىڭ ىشىندە ۇلتى بولەك بولسا دا ونىڭ قازاق تىلىندە ماقالداتىپ, ماتەلدەتىپ سويلەگەن سوزدەرى وزگەلەردەن وزىق بولدى. سونىڭ ىشىندە ول «تۋعان جەر» باعدارلاماسىنىڭ پاتريوتتىق سەزىمدى وياتۋداعى ماڭىزى زور ەكەندىگىنە توقتالدى. بارلىق جاستار ءوزىنىڭ تۋعان جەرىنە, كىشى وتانىنا جاقسىلىق جاساۋعا دايىن بولۋلارى كەرەك. «تۋعان جەردىڭ ءتۇتىنى دە ىستىق» دەگەن قاعيدانى جۇرەگىمىزگە ءتۇيىپ, بارىمىزدە ءوزىمىزدىڭ كىشى وتانىمىزعا قولۇشىن بەرۋگە تىرىسساق, ول جەردىڭ ەكولوگياسىن دا, ينفراقۇرىلىمدارىن دا جاقسارتۋعا بولادى, دەدى ول. ودان ءارى ءوزىنىڭ تازا قازاق اۋىلىندا وسكەنىن ايتقان دەپۋتات ەشقاشان دا قازاق جاستارىنىڭ ساقال قويماعانىن كولدەنەڭ تارتتى. ال قازىرگى كەيبىر جاستار ءداستۇرلى ەمەس اعىمداردى ۇستانىپ, ساقال قويىپ, بالاقتارىن شولتيتىپ جۇرگەندەرى, قىزداردىڭ نيندزيا قۇساپ, كوزدەرىن عانا قالدىرىپ, باسقا جەرىن تۇگەل قارا ماتامەن شىمقاپ جۇرگەندەرى بىزگە جات. وندايدان ءىنى-قارىنداستارىمىزدى اۋلاق بولۋعا شاقىرۋىمىز كەرەك, دەدى ول. باسقا سويلەۋشىلەر دە وزگەرمەلى الەمدە تۋىنداپ جاتقان جاڭا قاۋىپ-قاتەرلەر جاعدايىندا قوعامدىق سانانى وزگەرتۋ – قازاقستاننىڭ دامۋىنا نەگىز بولىپ قالاتىن تۇراقتىلىق, بىرلىك پەن كەلىسىمدى نىعايتۋعا اركەز مۇمكىندىك بەرەدى دەپ سانايتىندىقتارىن ايتتى.
قازىر قازاقستان قوعامى الەۋمەتتىك جاڭارۋ مەن رۋحاني پروگرەسكە باعىت العان ساياسي ۇلتتى قالىپتاستىرۋ جولىندا تۇر. الەمدە الدىڭعى قاتارلى ورىنداردى يەلەنۋ ءۇشىن ءبىزدىڭ ارقايسىمىز ءوز سانامىزدى وزگەرتىپ, ەسكىرگەن تاپتاۋرىنداردان ارىلۋىمىز قاجەت. سوندىقتان دا, مەملەكەت باسشىسىنىڭ ماقالاسىندا ناقتىلانعان تەزيستەر زاڭدى جانە قازىرگى تاڭدا اسا قاجەت بولىپ وتىر. الەۋمەتتىك جاڭارۋدىڭ باستى ەلەمەنتى تەحنولوگيالىق تۇرعىدا ويلاۋدىڭ ساپالى دەڭگەيىنە كوتەرىلۋدى جانە زاماناۋي قوعامنىڭ تالاپتارىنا ساي كەلۋدى, الەۋمەتتىك جانە رۋحاني جاڭارۋدىڭ الدىڭعى قاتارلى ادىستەمەلەرىن مەڭگەرۋدى ماقسات ەتۋمەن قاتار, عاسىرلار بويى جيناقتالعان ۇلتتىق قۇندىلىقتارعا نەگىزدەلگەن باي تاجىريبەنى, سونداي-اق, ۇلتىمىزدىڭ باسقالارعا ۇقسامايتىن باستى ەرەكشەلىكتەرىن ساقتاپ قالۋىمىز دا شارت ەكەندىگىن ەستەن شىعارماۋعا ءتيىسپىز, دەگەن ويلار ايتىلدى.
«جاڭانى ۇيرەنۋ, ءبىلىم الۋعا ۇمتىلۋ, كاسىبي بىلىكتىلىكتى ارتتىرۋ مەن جاڭاشىلدىقتار الدىنداعى قورقىنىشتىڭ جوقتىعى – باسەكەگە قابىلەتتىلىكتىڭ جوعارى ەكەندىگىن كورسەتەدى, ءبىز مۇنى ساقتاپ قانا قويماي, اركەز جەتىلدىرىپ وتىرۋىمىز قاجەت», – دەپ سانايتىندارىن ايتتى دوڭگەلەك ۇستەلگە قاتىسۋشىلار.
جاقسىباي سامرات,
«ەگەمەن قازاقستان»