...اكىم اۋىلداردى ارالادى
اتىراۋ وبلىسىنىڭ اكىمى بەرگەي رىسقاليەۆ قۇرمانعازى اۋدانىنىڭ ورتالىعىنان 300 شاقىرىمداي قاشىقتاعى ازعىر, ءسۇيىندىك اۋىلدارىن ارالادى. الىستاعى بۇل اۋىلداردا ءتۇيىنى تارقاتىلۋى قيىن ماسەلەلەر جەتەرلىك. سونىڭ ءبىرى – اۋدان ورتالىعىنان قاتىنايتىن جولدىڭ ناشارلىعى. اسىرەسە, جازدا جولدى قۇم, ال قىستا قالىڭ قار باسىپ قالادى. ەكىنشىدەن, اۋىز سۋ جايى دا قينايدى. ۇشىنشىدەن, ەلەكتر ەنەرگياسىن رەسەيدەن الاتىندىقتان, كورشى ەلگە تاۋەلدىلىك تە بايقالادى. تورتىنشىدەن, شالعايداعى بۇل اۋىلدار تۇرعىندارى تابيعي گاز جەلىسى تارتىلعانىن دا قالايدى. بايلانىس پەن مەديتسينالىق قىزمەت ساپاسىنىڭ جاقسارعانى تۇرعىندار ءۇشىن اسا ماڭىزدىلىعىن جويمايدى.
شالعاي اۋىلدارداعى تۇرعىنداردى مازالاعان وسىنداي ماسەلەلەرگە بايلانىستى وبلىس اكىمى ب.رىسقاليەۆ قاجەتتى شارالاردىڭ الىناتىنىن جەتكىزدى. ونىڭ ايتۋىنشا, بيىل ازعىر وڭىرىنە قاتىنايتىن جولدى قۇم, قار باسۋ سەكىلدى كەدەرگىنىڭ الدىن الۋعا 20 ميلليون تەڭگە ءبولىنىپ وتىر. جول تازالايتىن ارناۋلى تەحنيكا دا بولىنبەك. تەلەفون بايلانىسىن جاقسارتۋ ماقساتىندا تالشىقتى جەلى تارتۋعا قارجى قاراستىرىلماق. سونداي-اق سىرقاتتانعان تۇرعىندارداردى اۋدان, وبلىس ورتالىقتارىنداعى ەمدەۋ ورىندارىنا شۇعىل جەتكىزۋگە سانيتارلىق اۆياتسيانى پايدالانۋدى ءتيىستى سالا باسشىلارىنا تاپسىردى.
جولداسبەك شوپەعۇل, اتىراۋ وبلىسى.
...بەلگىلى قالامگەرگە كوشە اتى بەرىلدى
بەلگىلى قالامگەر, قوعام قايراتكەرى كامال سمايىلوۆتىڭ ەسىمى مەن ەڭبەك جولى, اسىرەسە جەزقازعان ءوڭىرى جۇرتشىلىعىنا اسا ىستىق. ۇلىتاۋ اۋدانىنداعى سارلىق اۋىلى تۇلەگىنىڭ حالقىمىزدىڭ اسىل پەرزەنتىنىڭ ءبىرى ەكەندىگىن ماقتانىش تۇتادى.
ەل ءۇشىن ۇلكەن ەڭبەك سىڭىرگەن ءىرى قالامگەردىڭ ءارى قايراتكەردىڭ ەسىمى بۇدان بىلاي جەزقازعان قالاسى كورىكتى كوشەلەرىنىڭ بىرىندە جارقىراپ تۇراتىن بولدى. بۇل جەزقازعاندىقتار مەن ۇلىتاۋلىقتاردىڭ تىلەگى ەدى.
ايقىن نەسىپباي, جەزقازعان.
...جىلجىمالى ەمحانا اۋىلعا كەلدى
بۇل باياناۋىل, اقتوعاي, ماي, ەرتىس, لەبياجى اۋداندارىنىڭ شالعايداعى اۋىلدارىندا تۇراتىن ەكى كۇننىڭ بىرىندە وبلىس ورتالىعىنا كەلىپ دارىگەرلەرگە قارالا المايتىن تۇرعىندار ءۇشىن وبلىستىق دەنساۋلىق ساقتاۋ باسقارماسى تاراپىنان جاسالعان ءتيىمدى كومەك بولىپ وتىر.
وتكەن جىلى دارىگەرلەر وبلىستىڭ بارلىق اۋداندارىن ارالاپ, 10 مىڭنان استام اۋىل ادامدارىن قاراپ, اۋىرىپ جۇرگەن 2,3 مىڭ تۇرعىندى انىقتاعان ەدى. ياعني, جىلجىمالى ەمحانانىڭ فليۋوروگرافيالىق, ستوماتولوگيالىق قۇرىلعىلارى بار ارنايى كەشەنى ارقىلى اۋىلداردىڭ 27 مىڭعا جۋىق تۇرعىنى تەكسەرىستەن وتكىزىلىپ, ەمدەلدى. ال بيىلعى جىلدىڭ ءساۋىر ايىنان باستاپ مامموگرافيالىق كەشەن دە اۋىلداردى ارالاپ, ايەلدەر دەنساۋلىعىن نازارعا الۋدا. وسىنداي قۇرىلعىلارى بار جىلجىمالى ەمحانالىق كەشەن لەبياجى اۋدانىنىڭ اۋىلدارىن ارالادى. ءدارىگەرلەر اۋىل تۇرعىندارىنا ءبىر كۇن عانا ەمەس, الداعى ۋاقىتتا دا وسىلاي كەلىپ-كەتىپ تۇراتىن بولادى.
فاريدا بىقاي, پاۆلودار وبلىسى.