ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىندە بەلگىلى اقىن اقىلبەك شاياحمەتتىڭ جىر كەشى ءوتتى. ءبىلىم ورداسىنىڭ ۇلكەن اكت زالى اقىن ولەڭدەرىن تىڭداۋعا كەلگەن ستۋدەنت جاستارعا جانە قالا تۇرعىندارىنا تولدى. اقىلبەك قازاق ولەڭىن ومىرىنە بالاعان اقىن عانا ەمەس, جاستاردى بىلىمگە سۋسىنداتۋعا ۇلكەن ۇلەسىن قوسىپ ءجۇرگەن ۇستاز دا. ءسوزىنىڭ سوڭىن «اقىلبەكتى ماقتايمىز دا, اقىلبەكپەن ماقتانامىز دا» دەپ اياقتاعان ۋنيۆەرسيتەت رەكتورى اسقار نامەتوۆ وعان «ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ اكادەميالىق پروفەسسورى» اتاعىنىڭ كۋالىگىن تاپسىردى.
اقىلبەك شاياحمەتتىڭ الپىس اسۋ ۋاقىت ىشىندە 30 كىتابى جارىق كورىپتى. اقىن بالالار پوەزياسىنا دا اتسالىستى. سونىمەن قاتار, ونىڭ دراماتۋرگيالىق جانە زەرتتەۋ شىعارمالارى دا وقىرمانىنىڭ جىلى ءىلتيپاتىنا يە بولعان ەدى. ىبىراي التىنسارين, احمەت بايتۇرسىنوۆ تۋرالى جازعان شىعارمالارى وبلىستىق قازاق دراما تەاترىنىڭ رەپەرتۋارىنان ورىن العان. ارقانىڭ تاق-تاق اقىنى اتانعان نۇرجان ناۋشاباەۆتىڭ شىعارمالارىنان عىلىمي ەڭبەك تە قورعادى. قوستاناي وڭىرىندەگى اۋىز ادەبيەتى مارجاندارىن مىسقالداپ جيناۋدا دا اقىلبەك قوجا ۇلىنىڭ ەڭبەگى زور.
اقىلبەك شاياحمەت ولەڭدەرىن ورىس ءتىلدى وقىرمانعا جەتكىزۋدە اقىن ابدراحمان دوس كوپ ەڭبەك ءسىڭىردى. بيىل نەگىزىنەن ونىڭ اۋدارماسىنان تۇراتىن اقىننىڭ ولەڭدەر كىتابى ورىس تىلىندە جارىق كورمەك. كەشكە جينالعان وزگە ۇلت وكىلدەرى اقىننىڭ ولەڭىن ابدراحمان دوستىڭ جانە ءوزىنىڭ وقۋىندا تىڭدادى. سونىمەن قاتار, كەشتە ورىس بالا باقشالارىنىڭ بۇلدىرشىندەرى, كوللەدجدەردىڭ, ۋنيۆەرسيتەتتىڭ ۇلتى قازاق ەمەس ستۋدەنتتەرى اقىن ولەڭدەرىن قازاق تىلىندە وقىدى. توبىل ءوڭىرىندە انا ءتىلىمىزدىڭ قاناتىن ەركىن جايۋى ءۇشىن كۇرەسكەرلىك ۇستانىمىنان تايماعان اقىننىڭ ارمانى دا وسى ەدى.
ءنازيرا جارىمبەتوۆا, قوستاناي.