الماتىدا پرەمەر-ءمينيستردىڭ ءبىرىنشى ورىنباسارى ومىرزاق شوكەەۆتىڭ قاتىسۋىمەن تۇرعىن-ءۇي كوممۋنالدىق شارۋاشىلىعىن مودەرنيزاتسيالاۋ ماسەلەسىنە ارنالعان كەڭەس بولىپ ءوتتى.
ءو.شوكەەۆ مەملەكەتتىك ماڭىزى زور بۇل جۇمىستى جۇزەگە اسىرۋدىڭ ءتيىمدى تەتىكتەرى مەن ناقتى جولدارىنا كەڭىنەن توقتالدى. بيۋدجەت ەسەبىنەن قارجىلاندىرىلاتىن مەملەكەتتىك باعدارلاما اياسىندا تۇرعىن ءۇيدى جانە كوممۋنالدىق جۇيەلەردى جوندەۋ جۇمىستارى بيىلعى جىلدىڭ جاز ايلارىندا باستالماق. كوپتەن كۇتكەن بۇل ءماسەلەگە وراي ۇكىمەتتە ەكى بىردەي باعدارلاما جاساعان. تۇرعىن ءۇي-كوممۋنالدىق سالانى جاڭعىرتۋ جانە «اقبۇلاق» باعدارلاماسىن جۇزەگە اسىرۋ ءۇشىن مول قاراجات بولىنۋدە. باعدارلامانى جۇزەگە اسىرۋدىڭ ءۇش ءتۇرلى باعىتى مەن تەتىگى بار. ماسەلەن, جارتىسىنا جۋىعى ەسكىرگەن كوممۋنالدىق جۇيەلەردى جوندەۋ جۇمىستارى بيۋدجەت جانە تاريفتەردىڭ بىرتىندەپ ءوسۋى ەسەبىنەن وتىز پايىزعا جۋىق كولەمدە قارجىلاندىرىلادى. الماتىعا جۇمىس ساپارى اياسىندا قالاداعى بوستاندىق اۋدانىندا بولعان ءومىرزاق شوكەەۆتىڭ پىكىرىنشە, الماتى قالاسىنداعى جىلۋ جۇيەلەرىن جانە ەسكىرگەن ۇيلەردىڭ بىرىنە جىلۋ قوندىرعىسىن اۋىستىرۋدا جاقسى تاجىريبە جيناقتالعان. مۇنداي قوندىرعىلار ەلەكتر قۋاتىنىڭ 50 پايىزىن ۇنەمدەۋگە مۇمكىندىك بەرەدى.
جيىندا الماتى قالاسىنىڭ اكىمى احمەتجان ەسىموۆ ۇكىمەت قابىلداعان باعدارلامانى ءدايەكتى تۇردە جۇزەگە اسىرۋدى باقىلاۋ ءۇشىن تۇرعىن ءۇي ينسپەكتسياسىن قۇرۋدى جەدەلدەتۋ قاجەتتىگىن ەسكەرتىپ ءوتتى. ءبىر قۇپتارلىعى, الماتى قالاسىندا قازىردىڭ وزىندە ينجەنەرلىك كوممۋنيكاتسيانى پايدالانۋ جانە ونىڭ جاعدايىن باقىلاۋ مەن مونيتورينگكە ارنالعان ءبىرتۇتاس اقپاراتتىق جەلى جاساقتالۋدا.
اتاپ ايتارلىعى, تۇرعىن ءۇي-كوممۋنالدىق شارۋاشىلىعىن مودەرنيزاتسيالاۋ باعدارلاماسىن ىسكە اسىرۋ ءناتيجەسىندە ەلەكتر جانە جىلۋمەن جابدىقتاۋ جۇيەلەرىنىڭ ەلۋ پايىزى جاڭارتىلماق. قازاقستانداعى ينجەنەرلىك جەلىلەردى جوندەۋ «جول كارتاسى» نەگىزىندە جۇرگىزىلەدى.
باقىت بالعارينا.
الماتى.