«جاڭعىرۋ اتاۋلى بۇرىنعىداي تاريحي تاجىريبە مەن ۇلتتىق داستۇرلەرگە شەكەدەن قاراماۋعا ءتيىس. كەرىسىنشە, زامان سىرىنان سۇرىنبەي ءوتكەن وزىق داستۇرلەردى تابىستى جاڭعىرۋدىڭ العىشارتتارىنا اينالدىرا ءبىلۋ قاجەت. ەگەر جاڭعىرۋ ەلدىڭ ۇلتتىق-رۋحاني تامىرىنان ءنار الا الماسا, ول اداسۋعا باستايدى», دەلىنگەن وندا.
ۇلتتىق رۋحاني-تامىر... باعانالى بايتەرەكتىڭ بۇتاعىن جەل شايقاپ, داۋىل تەربەتكەن تالاي. زامانالار جەلى, عاسىرلار داۋىلى.
سول تامىرى تەرەڭ بايتەرەك سوناۋ كوشپەندىلەر وركەنيەتىنەن امان جەتىپ XXI عاسىردىڭ باستاۋىنان ءنار الىپ كۇنگە قاراپ جاپىراعىن جايىپ تۇر. بۇل كەزەڭ – جەر-جاھاڭدا اقىل-ويدىڭ الامانعا تۇسكەن ۋاقىتى.
«جاڭا تۇرپاتتى جاڭعىرۋدىڭ ەڭ باستى شارتى – سول ۇلتتىق كودىڭدى ساقتاي ءبىلۋ. ونسىز جاڭعىرۋ دەگەنىڭىز قۇر جاڭعىرىققا اينالۋى وپ-وڭاي», دەلىنگەن ەلباسىمىزدىڭ وسى ەڭبەگىندە. تۇيتكىلدى شەشەر ءتۇيىندى وي وسى. ۇلتتىڭ بولمىسىن, ەلدىڭ تۇتاستىعىن ساقتاۋ – سىزگە دە, بىزگە دە سىن. شىندىق ءىزدەگەن بوپ شىعانعا شىقپاي, «جانىم – ارىمنىڭ ساداعاسى» دەيتىن قازاقي قاعيدانىڭ اۋىلىنان الىس قونباساق قۇداي تىلەۋىمىزدى بەرەر.
وسى وي تولعاۋدىڭ ءۇشىنشى بولىگى «ۇلتتىق بىرەگەيلىكتى ساقتاۋ» دەپ اتالىپتى. وندا: «ۇلتتىق سالت-ءداستۇرلەرىمىز, ءتىلىمىز بەن مۋزىكامىز, ادەبيەتىمىز, جورالعىلارىمىز, ءبىر سوزبەن ايتقاندا ۇلتتىق رۋحىمىز بويىمىزدا ماڭگى قالۋعا ءتيىس», دەلىنگەن.
وسى ساناتتاعى «قازاقستانداعى 100 جاڭا ەسىم» يدەياسى, «تۋعان جەر» باعدارلاماسى ەل مەن جەردىڭ ەرتەڭىن ويلاعان ارنالى تولعانىستاردىڭ جەمىسى. جاقسىلىقتار مەن يگىلىكتەر جاريا بولۋعا ءتيىس. جاقسى ادامدار, جومارت جۇرەكتى جاندار جانىمىزدا ءجۇر. ءبۇگىنگى كۇننىڭ كەيىپكەرلەرىن ناسيحاتتاۋ, بۇگىنگى كۇننىڭ ءبۇتىن ءسوزىن ايتۋ – مىندەتتىڭ ۇلكەنى.
جاقىندا «قازاقستان» تەلەارناسىنىڭ «ايتۋعا وڭاي» باعدارلاماسىنا قوناق ەتىپ شاقىردى. تۋعان جەرىنە كومەگى تيگەن ازاماتتار ءجونىندە حابار ەكەن. سولاردىڭ ءىشىندە مەنىڭ اۋىلداسىم, سوناۋ جاڭاارقانىڭ «جەڭىس» اۋىلىنان كەلگەن قايرات كوپباەۆ دەگەن ءىنى-باۋىرىمدى كورىپ, قۋانىپ قالدىم. جەكە قوجالىق يەسى, جىلقىشى قايرات اۋىلعا سپورت كەشەنىن سالىپتى. ونىڭ قۇنى 110 ميلليون تەڭگە ەكەن. تۇساۋكەسەرىن جاساپ, اۋىل اكىمىنە وتكىزىپ بەرىپتى. «ودان ساعان تۇسەر نە پايدا بار؟» – دەگەن تەلەجۇرگىزۋشى سۇراعىنا: «اۋىلدىڭ بالالارىنا كەرەك ەمەس پە؟» – دەپ ك ۇلىم قاعادى قايرات باۋىرىم. مىنە, «تۋعان جەر» يدەياسىنىڭ قولداۋشىسى, مىنە, بۇگىنگى كۇننىڭ كەيىپكەرى.
«گۇلستان» جۋرنالىنىڭ رەداكتورى, بەلگىلى كاسىپكەر گوزەل قۇلجاباەۆا قارىنداسىمىزبەن كوپتەن ارالاسىپ تۇرامىن. ءوز اۋىلى «باسشي», «نۇرىم» دەگەن ەلدى مەكەندەردەن بىرنەشە باق ورناتقان, گۇلگە بولەگەن. قازاقستاندا ونىڭ كاسىبىنەن ۇلگى الىپ جۇرگەندەر دە كوپ. ارمانى – قازاقتىڭ جەرىن گۇلگە كومكەرۋ, باققا وراۋ.
كەشەگى بۇقار جىراۋ بابامىز: «ءبارىڭىز ءبىر ەنەدەن تۋعانداي بولىڭىز: جات جانىنان ءتۇڭىلسىن, اينالا الماي ات ءولسىن, ايىرا الماي جات ءولسىن», – دەپ بەكەر وسيەت ايتىپ كەتتى دەيسىز بە؟
«بولاشاققا باعدار: رۋحاني جاڭعىرۋ» سارا دا دارا جولدىڭ باستاۋىندا ەل كوشباسشىسىنىڭ ۇكىلى ءۇمىتى, ايالى ارمانى.
«كەمەدەگىنىڭ جانى ءبىر» دەيدى قازاق. ۇلتتىڭ كودىن ساقتاۋ دەگەن ءسوز – ۇلتتى ساقتاۋ دەگەن ءسوز. ەكى ءداۋىر مەن ەكى عاسىر توعىسىندا جاڭعىرۋدىڭ جاڭا باعىتىن ەلباسى ءوزى ۇسىنىپ وتىر.
مەنىڭ دە, سەنىڭ دە وتانىڭ – قازاقستان, باۋىرىم! ودان باسقا تۇگىمىز دە جوق.
بارىمىز دا, باعىمىز دا, باقىتىمىز دا – قازاقستان!
بولاشاقتىڭ باعدارى بارشامىزدىڭ ارمانىمىزدى ايالاسىن.
عالىم جايلىباي,
اقىن, قازاقستاننىڭ ەڭبەك سىڭىرگەن قايراتكەرى, قازاقستان جازۋشىلار وداعى باسقارما
توراعاسىنىڭ ءبىرىنشى ورىنباسارى