وتكەن بەيسەنبىنىڭ كەشىندە قوس كوماندا العاش رەت سىنعا ءتۇستى. بۇل ويىندا ەسەپ نەبارى 30 سەكۋندتىڭ ىشىندە اشىلدى. تورەشىنىڭ ىسقىرىعى ەستىلىسىمەن العا ۇمتىلعان رەسەيلىكتەر ۆلاديمير بريۋكۆيننىڭ كومەگىمەن ەسەپ اشتى.
كەزدەسۋدىڭ كەلەسى كەزەڭىن ايدىن يەلەرى شيراق باستاعان, الايدا تاعى دا ءبىرىنشى بولىپ گول جىبەرىپ الدى. 34-مينۋتتا الەكسەي ماكليۋكوۆ مەرگەندىگىمەن تانىلىپ, باسىمدىقتى ارتتىرا ءتۇستى. وسىدان كەيىن «تورپەدو» ويىنشىلارى قورعانىستا ساق ويناپ, جۇيەلى ويىن كورسەتتى. ناتيجەسىندە, كەزەڭنىڭ اياقتالۋىنا ساناۋلى سەكۋندتار قالعاندا شىعىسقازاقستاندىقتار ساپىنان ەۆگەني فادەەۆ جالعىز گولدى سالدى.
ماتچتىڭ سوڭعى بولىگىندە قاۋىپتى ساتتەر ۇيىمداستىرىلعانمەن, تابلوداعى كورسەتكىش وزگەرىسسىز قالدى. قورىتىندى ەسەپ – 1:2.
كەلەسى كۇنى وسكەمەندە «تورپەدو» مەن «دينامو» اراسىنداعى ەكىنشى ويىن ءوتتى. ەكى كوماندا تولاسسىز شابۋىلداعانمەن, العاشقى گول تەك 24-مينۋتتا سوعىلدى. دميتري سيدلياروۆتىڭ سوققىسىنان كەيىن قوناقتار العا شىقتى. وسى قارقىندارىنان تايماعان «دينامو» ارادا 30 سەكۋند وتەر-وتپەستەن ەكىنشى شايبانى سوعىپ ۇلگەردى. گولدىڭ اۆتورى – كيريلل پيليپەنكو. ال 35-مينۋتتا دميتري ماركوۆين باسىمدىقتى ارتتىرا ءتۇستى.
ويىننىڭ سوڭعى بولىگىندە وسكەمەندىكتەر ەس جيىپ, قارسى قاقپانى ءجيى تورۋىلداعانمەن, ءبىر عانا گول سوعا الدى. ونى دجوردون ساۋتورن ءوز ەنشىسىنە جازدى. بۇل رەتتە قوناقتار ساپىنان ءبىر ويىنشىنىڭ كەم بولعانىن ايتا كەتكەن ءجون. ەسەپ – 1:3, تاعى دا «دينامونىڭ» مەرەيى ۇستەم بولدى.
17 ساۋىردە كوماندالار بالاشيحادا كەزدەستى. بۇل جولى دا وسكەمەندىكتەردىڭ جولى بولمادى. ويىن قورىتىندىسىندا «تورپەدو» 5:2 ەسەبىمەن جەڭىلىپ قالدى. ءسويتىپ, جالپى ەسەپ 3:0-گە جەتتى. كەزدەسۋلەر ءتورت جەڭىسكە دەيىن عانا جالعاساتىنىن ەسكەرسەك, وسكەمەندىكتەردىڭ ەندى ءۇمىت ۇدەسىنەن شىعۋلارى ەكىتالاي.
قالاي دەسەك تە, كەشە كەشكە كوماندالار بالاشيحادا ءتورتىنشى كەزدەسۋلەرىن وتكىزدى.
ايان ءابدۋالي, «ەگەمەن قازاقستان»