– ازامات باۋىرجان ۇلى, قازاقستان فۋتبول فەدەراتسياسى شەشىمىمەن «اتىراۋ» فۋتبول كومانداسىنان توعىز ۇپاي الىنىپ تاستالدى. بۇل سپورتشىلاردىڭ عانا ەمەس, جانكۇيەرلەردىڭ دە نارازىلىعىن تۋدىرعان جاعداي بولدى. اڭگىمەمىزدى وسىدان باستاساق. قانداي شارالار قولعا الىنىپ جاتىر؟
– بۇل شەشىم, نەگىزى فيفا-دان كەلىپ ءتۇستى. 2012 جىلدان بەرى جيناقتالعان قارىز نەگىزگى سەبەپ بولىپ وتىر. مۇندا ماسەلەنىڭ ءبارى رەسپۋبليكالىق فەدەراتسيا شەشىمىندە كورسەتىلگەندەي ەمەس, ءبىزدىڭ كىنارات-تالابىمىز بار. زاڭگەرلەر حالىقارالىق سوتتا ءبىزدىڭ قۇقىعىمىزدى قورعايدى. بۇل جاعداي كوماندانىڭ كوڭىل-كۇيىنە, ويىن ناتيجەسىنە كەرى اسەرىن تيگىزدى. ۇپايلاردى كەرى الۋ ءۇشىن بارلىق مۇمكىندىكتەردى قاراستىرىپ جاتىرمىز.
– جالپى, ايماقتاعى سپورتتىق نىسانداردىڭ حال-احۋالى قانداي جاعدايدا؟
– اتىراۋ وبلىسىندا 984 سپورتتىق نىسان بار. جىل سايىن بۇل سان كوبەيىپ كەلەدى. مىسالى, وتكەن جىلى قۇرمانعازى اۋدانىنىڭ شورتانباي, بايدا اۋىلدارىندا, اتىراۋ قالاسىنىڭ ماڭىنداعى قىزىلبالىق, اقجار ەلدى مەكەندەرىندە جاڭا سپورت كەشەندەرى پايدالانۋعا بەرىلدى. وبلىس ورتالىعىندا تەننيس كورتى اشىلدى.
نەگىزى, وڭىردە سپورتىمىز ورگە جىلجىپ كەلەدى. اتىراۋ سپورتىندا توقىراۋ جوق دەپ سەنىممەن ايتۋعا بولادى.
– الايدا, سول تەننيس ورتالىعى سالتاناتتى تۇردە اشىلعانىمەن, بۇگىنگە دەيىن جۇمىسىن باستاماي تۇر. بۇعان نە سەبەپ؟
– بۇرىن اتىراۋدا ۇلكەن تەننيس وينايتىن ورىن بولمادى. تاۋەلسىزدىكتىڭ 25 جىلدىعىنا وراي جاڭا سپورت نىسانى بوي كوتەردى. كەشەندە سەگىز كورت بار, ونى 300 كورەرمەن ءبىر ساتتە تاماشالاي الادى. قازىر ءتيىستى راسىمدەر جۇرگىزىلىپ, قۇجاتتار جاساقتالىپ جاتىر. ءبىر ايدان كەيىن نىسان وبلىستىق باسقارما بالانسىنا بەرىلەدى, جۇمىس تا سول كەزدە باستالادى.
– بايداركا جانە كانوە ەسۋ سپورتى ەلىمىزدە تۇڭعىش رەت اتىراۋدا اشىلعان ەدى. قازىر بۇل سپورت ءتۇرى ەلەۋسىزدەۋ قالىپ بارادى. رەسپۋبليكالىق سايىستار وتپەيتىن بولدى, جاقسى سپورتشىلار كەتىپ قالدى, قۇرال-جابدىقتار جاڭارتىلماعان...
– ءيا, وليمپيالىق سپورت ءتۇرىن دامىتۋ كۇن تارتىبىندەگى ماڭىزدى ماسەلە. بۇل باعىتتا دا ءبىراز جۇمىستاردى قولعا الىپ جاتىرمىز. قىس مەزگىلىندە جاتتىعۋلاردى ۇزبەۋ ءۇشىن بىزدە مۇمكىندىك قاراستىرىلماعان, سوندىقتان ەسكەكشىلەرىمىز وقۋ-جاتتىعۋ جيىندارىن تاشكەنتتە وتكىزۋگە ءماجبۇر.
– بيىل جىلىوي اۋدانىنىڭ اقكيىزتوعاي, شوقپارتوعاي اۋىلدارىندا, جاڭا قاراتون اۋىلىندا دەنە شىنىقتىرۋ-ساۋىقتىرۋ كەشەندەرىنىڭ قۇرىلىسى اياقتالادى ەكەن. تاعى قانداي جاڭا نىساندار بوي كوتەرەدى؟
– باستى جاڭالىقتىڭ ءبىرى – دارىندى سپورتشىلارعا ارنالعان مەكتەپ-ينتەرنات سالىنادى. 300 ورىنعا نەگىزدەلگەن نىسان قۇرىلىسى بيىل باستالادى. 200 ورىندىق جاتاقحانا اۋىلدان كەلگەن سپورتشىلارعا ارنالادى, قالعان ءجۇز ورىندا وبلىس ورتالىعىندا تۇراتىن بالالار جاتتىعادى. بازادا بارلىق سپورتپەن كاسىبي تۇرعىدا اينالىسۋعا مۇمكىندىك بولادى. بولاشاقتا چەمپيوندار ورداسىنا اينالادى دەگەن ءۇمىت بار. اتىراۋ قالاسىندا كۇرەس تۇرلەرىنە ارنالعان سپورتتىق كەشەننىڭ دە قۇرىلىسى باستالادى. قالاعا قاراستى اۋىلدىق وكرۋگتەر اۋماعىندا كروسس-فيت جانە كۇرەس تۇرلەرىمەن شۇعىلدانۋعا ارنالعان جەدەل قۇراستىرمالى سپورتتىق زالدار قۇرىلىسىن جۇرگىزۋ جوسپاردا بار.
– الداعى ۋاقىتتا وبلىس اۋماعىندا قانداي جارىستار وتەدى؟
– 19 ساۋىردە تاەكۆوندودان تۇڭعىش رەت جاستار اراسىندا ازيا چەمپيوناتى جايىق جاعاسىندا ۇيىمداستىرىلادى. ەركىن, گرەك-ريم كۇرەسى, ايەلدەر كۇرەسىنىڭ قازاقستاننىڭ جاستار ويىندارى, بوكستان يساتاي-ماحامبەت اتىنداعى حالىقارالىق جارىس, توعىزقۇمالاقتان جاستار اراسىنداعى ەل كۋبوگى, دجيۋ-دجيتسۋدان رەسپۋبليكالىق جاستار ويىندارى, دزيۋدودان ەل چەمپيوناتى بولادى. «اقبيداي» اۋىل سپورتى ويىندارىنىڭ وبلىستىق سپارتاكياداسى دا شىلدە ايىندا وتەدى دەگەن جوسپار بار.
اڭگىمەلەسكەن
باقىتگۇل باباش, «ەگەمەن قازاقستان» اتىراۋ