ءماجىلىستى اشقان مادەنيەت جانە سپورت ءمينيسترى ارىستانبەك مۇحامەدي ۇلى ەڭ الدىمەن مينيسترلىك قۇرامىنداعى تۋريزم يندۋسترياسى كوميتەتىنىڭ ءتوراعاسى قىزمەتىنە كىرىسكەن ماينۇر مىرزاماديەۆانى تانىستىردى. سوسىن, ەلباسىنىڭ «بولاشاققا باعدار: رۋحاني جاڭعىرۋ» ماقالاسى ءتوڭىرەگىندەگى وي-پىكىرلەرىمەن, الداعى اتقارىلار اۋقىمدى ىستەرمەن ءبولىستى.
«ەلباسى بارلىعىمىزدى كۇشىمىزدى بىرىكتىرۋگە, شىعارماشىلىق زيالى قاۋىمدى, عىلىم اكادەمياسىن, قوعامدىق ۇيىمداردى, جالپى ۇلتتىڭ تاعدىرىنا بەي-جاي قارامايتىنداردى تىعىز بايلانىستا جۇمىس جاساۋعا شاقىردى. ەلىمىزدىڭ مىڭ جىلدىق تاريحىندا ءبىز العاش رەت قوعامدىق سانانىڭ جاڭعىرۋىنا, مادەني گەنەتيكالىق كودتىڭ ساقتالۋىنا باعىتتالعان سىندارلى قادام جاساپ وتىرمىز» دەگەن مينيستر كوپشىلىكتى وسى عاسىرعا قاجەتتى بارلىق قاسيەتتى بويعا جيناقتاۋعا, وزگەرمەيتىن تاپتاۋرىن ۇلگىلەردەن قۇتىلىپ, ءبىلىم مەن قۇزىرەتتىلىكتى ارتتىرۋعا شاقىردى. بۇل ورايدا جاڭالىققا اشىقتىق, حالىقارالىق داعدىلار مەن ءتاجىريبەلەردى ۇيرەنۋ جايى دا قوزعالدى.
ەلباسىنىڭ ەلدىك سانانى جاڭعىرتۋ ءۇشىن ناقتى جوبالار ۇسىنعانى بەلگىلى. لاتىن الىپبيىنە قاتىستى مينيستر تەك ءبىلىم جانە عىلىم مينيسترلىگىمەن بىرىگىپ جۇمىس ىستەيمىز دەگەندى باياندادى. سونداي-اق, ءتيىستى كوميتەتتىڭ جالپى ۇلتتىق ءتۇسىندىرۋ جۇمىسىن اتقارۋ قاجەتتىگى تۋرالى قىسقا قايىردى.
مينيستر ەلباسىنىڭ ماڭىزدى جوبالارىنىڭ ءبىرى – «تۋعان جەردىڭ» جالپىۇلتتىق ءپاتريوتيزمنىڭ ناعىز وزەگىنە اينالاتىنىن مالىمدەدى. «بۇل باعىتتا مينيسترلىك تاراپىنان ماڭىزدى جۇمىس اتقارىلۋدا. بۇگىنگى تاڭدا پارلامەنتتە قارالىپ جاتقان «مادەنيەت تۋرالى» زاڭ جوباسىندا ەكسپەرتتىك كوميسسيا قۇرۋ ارقىلى قوعامدىق ماڭىزى بار ادەبيەتتى كونكۋرستىق نەگىزدە تاڭداۋ جانە اۆتورلىق قالاماقى ءتولەنىپ, ولاردى ساتىپ الۋ بويىنشا نورما كوزدەلگەن.اتالعان نورما ساپالى ادەبي شىعارمالار جاساۋدى ىنتالاندىرۋعا, قازاقستان حالقىنىڭ مادەني مۇراسىن ساقتاۋعا جانە تۋعان جەرىنە, ەلىنە دەگەن سۇيىسپەنشىلىككە باۋلۋعا باعىتتالعان», دەدى مينيستر.
ال ەلباسى ۇسىنعان «قازاقستاننىڭ كيەلى جەرلەرىنىڭ گەوگرافياسى» جوباسى تۋرالى اڭگىمەلەگەندە ا.مۇحامەدي ۇلى تۋريزم سالاسىنىڭ «التىن» ءداۋىرى ەندى باستالعانىن جەتكىزدى. ءتۋريزمنىڭ ەنەرگەتيكا, اگروونەركاسىپتىك كەشەن, ساۋدا, كولىك, يندۋستريالاندىرۋ سەكىلدى اۋقىمدى سالالارمەن بىرگە, دامۋى ءتيىس باسىمدىقتاردىڭ قاتارىندا تۇرعانىن ايتتى. «سوندىقتان, ءمادەنيەت ينستيتۋتى مەن تۋريزم كوميتەتىنە مۇددەلى تاراپتارمەن بىرلەسىپ ءبىر اي ىشىندە ەلىمىزدىڭ كيەلى ورىندارىنىڭ كارتاسىن جاساقتاۋدى تاپسىرامىن. سونداي-اق, ولاردى كەڭىنەن زەرتتەپ, ءارى قاراي ناسيحاتتاۋعا باعىتتالعان جوسپار جاساقتالۋى ءتيىس. ءوز كەزەگىندە مادەنيەت دەپارتامەنتى «Discovery», «National Geographic» تەلەارنالارىمەن بىرلەسىپ قازاقستان تۋرالى عىلىمي-تانىمدىق فيلمدەر سەرياسىن شىعارۋ ماسەلەسىن تياناقتاۋى قاجەت», دەدى ول.
ايتا كەتەيىك, القا ماجىلىسىندە ابايدىڭ «جيدەباي-ءبورىلى» مەملەكەتتىك تاريحي-مادەني ءجانە ادەبي-مەموريالدى قورىق-مۇراجايىنىڭ ديرەكتورى بولات ءجۇنىسبەكوۆ, قازاقستان تۋريستىك قاۋىمداستىعىنىڭ ديرەكتورى ءراشيدا ءشايكەنوۆا, «استانا-وپەرا» تەاترىنىڭ ديرەكتورى عالىم احمەدياروۆ جانە ۇلتتىق اكادەميالىق كىتاپحانانىڭ باس ديرەكتورى ءۇمىتحان مۇڭالباەۆا بايانداما جاسادى.
ايگۇل سەيىلوۆا,
سۋرەتتى تۇسىرگەن ەرلان وماروۆ,
«ەگەمەن قازاقستان»