قوس بوكسشىنىڭ ايقاسى اقش-تىڭ كوننەكتيكۋت شتاتىنداعى انكاسۆيلل قالاسىندا ءوتتى. ولار كۋبالىق ساليۆان باررەر (18-1, 13 كو) مەن امەريكالىق پول پاركەر (8-1, 4 كو) اراسىنداعى كەزدەسۋدىڭ اندەركارتىندا كۇش سىناستى.
اشكەەۆ-كەمەرون ايقاسى جەتىنشى راۋندتىڭ ەكىنشى مينۋتىندا توقتاتىلدى. وتانداسىمىز گونگ داۋىسى ەستىلىسىمەن قارسىلاسىن قىسپاققا الۋمەن بولدى. وڭتايى كەلگەندە قارسىلاسىن جويقىن سوققىلارىمەن قارسى الىپ ءجۇردى. التىنشى راۋندتا كەمەروندى تەكسەرۋ ءۇشىن دارىگەر شاقىرتىلدى. ال جەتىنشى راۋندتا مادياردىڭ سەريالى سوققىلارىنان كەيىن تورەشى جەكپە-جەكتى ۋاقىتىنان بۇرىن توقتاتۋ تۋرالى شەشىم قابىلدادى.
كەزدەسۋ بارىسىندا مادياردىڭ قاباعى جارىلدى. بىراق بۇل كەزدەسۋدى ارى قاراي جالعاستىرۋىنا ەش كەدەرگى بولمادى.
28 جاستاعى وتانداسىمىز شارشى الاڭداعى سەگىزىنشى جەكپە-جەگىندە جەڭىسكە جەتىپ وتىر. ونىڭ تورتەۋىندە قارسىلاسىن نوكاۋتقا ءتۇسىردى. ال 34 جاستاعى كەمەرون كارەراسىندا ءۇشىنشى رەت جەڭىلدى. ەنشىسىندە 10 جەڭىس (بەس نوكاۋت) بار. ماديار اشكەەۆپەن جۇدىرىقتاسىپ, كەزدەسۋىن العاش رەت مەرزىمىنەن بۇرىن اياقتادى.
ماديار اشكەەۆ كەزەكتى جەڭىسىنەن كەيىن ءوز ديۆيزيونىنداعى BoxRec رەيتينگىندە بىردەن 56 ورىنعا كوتەرىلىپ, 106-ورىنعا تۇراقتادى.
«ءبىرىنشى راۋندتا باستارى سوعىلىپ, اشكەەۆتىڭ قاباعى جارىلدى. بىراق قازاقستاندىق بوكسشى ونى شىبىن شاققان قۇرلى كورمەدى. قالعان راۋندتاردا جويقىن سوققىلارى كوبەيمەسە, تولاستاعان جوق. كەمەرون بىلىكتى, سولاقاي بوكسشى. ارينە, قارسىلاسىنىڭ قارقىنىنا تايسالىپ قالعان جوق. بىراق شاماسى جەتپەدى. ال اشكەەۆ سول جاق حۋكپەن امەريكالىقتىڭ ەكى بۇيىرىنە, باسىنا سوققىلارىن ءدال تيگىزدى. التىنشى راۋندتا كەمەروننىڭ دارىگەرگە كورىنۋىنە تۋرا كەلدى. دارىگەردىڭ رۇقساتىنان كەيىن جەكپە-جەك ارى قاراي جالعاستى. بىراق ۇزاققا سوزىلا قويمادى. ماديار قارسىلاسىن بۇرىشتان بۇرىشقا قۋالاپ ءجۇرىپ, سوققىلاۋمەن بولدى. ناتيجەسىندە, رەفەري جەكپە-جەكتى جەتىنشى راۋندتىڭ 1:06 مينۋتىندا توقتاتتى», – دەپ جازدى KO Fantasy Boxing باسىلىمىنىڭ تۋيتتەر جەلىسىندە.
ماديار اشكەەۆ جەكپە-جەك جايلى vesti.kz باسىلىمىنا پىكىر ءبىلدىردى.
«ايقاس جوسپار بويىنشا وتپەدى. العاشقى راۋندتا-اق قارسىلاسىم باسىمەن ۇرىپ جىبەردى. سالدارىنان ازداپ جاراقات الىپ قالدىم. وسىدان كەيىن تورەشىلەر كەزدەسۋدى مەرزىمىنەن بۇرىن توقتاتپاس ءۇشىن قارقىنىمدى ارتتىردىم.
ۇزىلىستە كاتمان قاباعىمنان اققان قاندى توقتاتتى. باپكەرىم كەمەروننىڭ اياعى سىر بەرە باستاعانىن بايقاپ, جىلدام قوزعالۋىم كەرەكتىگىن ايتتى. سونداي-اق, مەيىرىم نۇرسۇلتانوۆتىڭ دا رينگتە نە ىستەۋ كەرەكتىگىن ايتقانىن ەستىدىم. قانشا دەگەنمەن, شەت جاقتان ءبارى كورىنىپ تۇرادى عوي», – دەدى ماديار اشكەەۆ.
ايتا كەتەيىك, وسى كۇنگى بوكس كەشىندە تاعى ءبىر قازاقستاندىق مەيىرىم نۇرسۇلتانوۆ شارشى الاڭعا شىقتى. ول مەكسيكالىق حاۆەر ولۆەرامەن كۇش سىناسىپ, ەكىنشى راۋندتا تەحنيكالىق نوكاۋتپەن جەڭىسكە جەتتى.
رەفەري ەكىنشى راۋندتا مەيىرىمنىڭ جويقىن سوققىلارىنان كەيىن كەزدەسۋدى توقتاتۋىنا تۋرا كەلدى. جەرلەسىمىز كاسىپقوي بوكستا ەكى كەزدەسۋ وتكىزىپ, ەكەۋىندە دە جەڭىسكە جەتىپ وتىر. العاش رەت ول 2016 جىلدىڭ قاراشا ايىندا امەريكالىق گەنري بەكفوردپەن التى راۋندتىق كەزدەسۋ وتكىزىپ, تورەشىلەردىڭ شەشىمىمەن جەڭىسكە جەتكەن بولاتىن.
BoxRec رەيتينگىندە ول 13 ورىنعا كوتەرىلىپ, 436-ورىنعا توقتادى.