«قر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق-نىڭ «نوۆىي مير» جشس-ءنىڭ قاتىسۋىمەن تۇسىرگەن «اناعا اپارار جول» ءفيلمى بىشكەكتە وتكەن «اق ءىلبىس» اتتى VI ۇلتتىق كينوجۇلدەسىندە ورتالىق ازيانىڭ ۇزدىك ءفيلمى اتاندى», - دەلىنگەن حابارلامادا.
باس پروديۋسەر ءاليا نازارباەۆا مەن رەجيسسەر اقان ساتاەۆتىڭ بىرلەسىپ شىعارعان «اناعا اپارار جول» اتتى تۋىندىسى ءۇش نوميناتسيا بويىنشا, اتاپ ايتساق, «ورتالىق ازيانىڭ ۇزدىك ءفيلمى», «ورتالىق ازيانىڭ ۇزدىك اكتەرى» (ۇمىتكەر بولعان - اكتەر ءادىل احمەتوۆ), «ورتالىق ازيانىڭ ۇزدىك اكتريساسى» (ۇمىتكەر بولعان - اكتريسا التىناي نوگەربەك) نوميناتسيالارى بويىنشا قاتىسقان. سونداي-اق, وسى جۇلدەلەرگە وزبەكستان مەن تاجىكستاننىڭ كارتينالارى دا ۇسىنىلعان بولاتىن. ۇلتتىق جۇلدەنى رەجيسسەر اقان ساتاەۆقا قىرعىزدىڭ كينورەجيسسەرى, قىرعىزستان رەسپۋبليكاسىنىڭ حالىق ءارتيسى, اتالمىش پرەميانىڭ قۇرىلتايشىلارىنىڭ ءبىرى ارتىقباي سۇيىندىكوۆ جانە لوس-انجەلەستەگى ازيالىق كينوفەستيۆالىنىڭ ۇيلەستىرۋشىسى اسەل شەرنيازوۆا تابىستادى.
«ءتۇسىرۋ توبىن وسى جەڭىسپەن قۋتتىقتايمىن. «اناعا اپارار جول» - ورتالىق ازيانىڭ ۇزدىك ءفيلمى», - دەپ جازدى رەجيسسەر اقان ساتاەۆ Instagram-داعى ءوزىنىڭ پاراقشاسىندا.
ءبىر ايتا كەتەرلىگى, اتالعان كارتينا 38-ءشى حالىقارالىق ماسكەۋ كينوفەستيۆالىندە جانە «ەۋرازيالىق كوپىر» اتتى فەستيۆالگە قاتىسىپ, باس جۇلدەنى يەمدەنسە, اكتريسا التىناي نوگەربەك «ۇزدىك ايەل ادام ءرولى» نوميناتسياسىندا جەڭىسكە جەتتى. ودان بولەك, بۇل تۋىندى بيىل قازاقستان كينوسىنشىلارى قاۋىمداستىعى ۇيىمداستىرعان «سىنشىلار تاڭداۋى» اتالىمىندا ءۇش بىردەي جۇلدەنى يەمدەندى.