«نۇر وتان» پارتياسى ءتوراعاسىنىڭ ءبىرىنشى ورىنباسارى عالىمدارعا, ۇستازدار قاۋىمىنا, اسىرەسە, جاستارعا مەملەكەت باسشىسىنىڭ جاڭا عىلىمي ەڭبەگىن تاباندىلىقپەن مۇقيات زەرتتەپ شىعۋعا كەڭەس بەردى. مۇحتار قۇل-مۇحاممەدتىڭ ايتۋىنشا, بۇل ماقالادا قازىرگى قازاقستاننىڭ باستى رۋحاني قۇندىلىقتارى ايقىن كورىنىس تاپقان.
سونداي-اق, «نۇر وتان» پارتياسى توراعاسىنىڭ ءبىرىنشى ورىنباسارى ەلباسى نازار اۋدارعان ماسەلەلەردىڭ ءدال قازىرگى تاڭدا وتە وزەكتى ەكەنىنە ەكپىن تۇسىرە كەلىپ: «بۇل – ماقالا عانا ەمەس, مازمۇنى تەرەڭ, اۋقىمى وتە كەڭ, ۇلت رۋحانياتىن ءححى عاسىر بيىگىنە كوتەرەتىن رۋحاني جاڭعىرۋ باعدارلاماسى. ەلباسىنىڭ جۇرەك تورىنەن شىققان اسىل سوزدەرى سىزدەرگە – تاۋەلسىز قازاقستان جاستارىنا ارنالعان», – دەدى.
سونىمەن قاتار, بيىل مەملەكەت باسشىسى ءۇش بىردەي تاريحي باستاما كوتەرگەنىن ايتقان پارتيا ءتوراعاسىنىڭ ءبىرىنشى ورىنباسارى: «ءبىرىنشىدەن, ەلباسى ءوزىنىڭ حالىققا ارناعان بيىلعى جولداۋىندا ەلىمىزدى تەحنولوگيالىق دامۋدىڭ جاڭا دەڭگەيىنە شىعاراتىن قازاقستاننىڭ كەڭ اۋقىمدى ەكونوميكالىق جاڭعىرۋىنا جول اشتى. ەكىنشىدەن, ءىرى ەكونوميكالىق قايتا قۇرۋلارمەن قاتار, بىرەگەي كونستيتۋتسيالىق رەفورما ارقىلى مەملەكەتىمىزدىڭ ساياسي جاڭعىرۋىن قولعا الدى. ال ەندى ەلباسى عىلىم, ءبىلىم, مادەنيەت پەن تاريحتى تۇتاستاي قامتيتىن ۇلتتىق رۋحاني جاڭعىرۋ باعدارلاماسىن ۇسىنىپ وتىر», – دەدى.
مۇحتار ابرار ۇلىنىڭ ايتۋىنشا, بارشا قازاقستاندىق, سونىڭ ىشىندە زيالى قاۋىم وكىلدەرى ءاردايىم ۇلت رۋحانياتى مەن ونىڭ قۇندىلىقتارىنا ەرەكشە نازار اۋدارىپ كەلدى. لاتىن الىپبيىنە تەزىرەك كوشۋ مەن تاۋەلسىز زامان جاستارىنىڭ شەتەل تىلدەرىن مەڭگەرۋى قاجەتتىگىنە توقتالدى. ءاربىر جاستىڭ ۇلت رۋحانياتىنىڭ قاينار باستاۋىنان سۋسىنداپ, اتا تاريحى مەن بابالار مادەنيەتىن ارداقتاي بىلگەندە عانا جان-جاقتى جەتىلگەن تۇلعا بولىپ قالىپتاساتىنىنا ايرىقشا ءمان بەردى.
«رۋحاني جاڭعىرۋ دەگەنىمىز, ۇلتتىق سالت-سانا, ادەت-عۇرىپ, ءمادەني داستۇرلەردى بەرىك ساقتاي وتىرىپ, ونى جاڭا زامان جەتىستىكتەرىمەن, جالپىادامزاتتىق قۇندىلىقتارمەن بايىتۋ», دەپ اتاپ كورسەتتى پارتيا قايراتكەرى.
جاھاندانۋ جاعدايىنداعى جالپىادامزاتتىق قۇندىلىقتاردى مەڭگەرۋ ماسەلەسىنە كەڭىنەن توقتالا كەلىپ, مۇحتار قۇل-مۇحاممەد: «ءبىز جاقسىلىقتاردان جاتسىنباۋىمىز كەرەك. مادەنيەت پەن ادەبيەت, عىلىم مەن ءبىلىم سالالارىنداعى بۇگىنگى زامان جەتىستىكتەرى ءبىزدىڭ جاستارىمىزدىڭ دا ورتاق يگىلىگىنە اينالۋى ءتيىس. ابايدىڭ «ادامزاتتىڭ ءبارىن ءسۇي باۋىرىم دەپ» ايتقان فيلوسوفيالىق وسيەتىنىڭ ءمان-ماعىناسى ءدال وسىنداي ۇلتتىق جانە جالپىادامزاتتىق قۇندىلىقتار بىرلىگىندە دەپ ەسەپتەيمىن», – دەدى.
ءسوزىنىڭ سوڭىندا «نۇر وتان» پارتياسى توراعاسىنىڭ ءبىرىنشى ورىنباسارى: «ەلباسى ماقالاسىندا قوعامنىڭ رۋحاني ۇستىنى مەن ۇلتتىق يدەيانىڭ مازمۇنىن قالىپتاستىرۋعا قاتىستى وزەكتى ماسەلەلەرگە ناقتى جاۋاپ بەرىلگەن. «مەملەكەت پەن ۇلت قۇرىشتان قۇيىلىپ, قاتىپ قالعان دۇنيە ەمەس. ول ۇنەمى دامىپ وتىراتىن ءتىرى اعزا ىسپەتتى» دەگەن سوزدەردە ءار بۋىن وكىلدەرىنىڭ ۇلتتىق قۇندىلىقتاردى ءوز زامانىنىڭ ەڭ ۇزدىك, ەڭ وزىق جەتىستىكتەرىمەن بايىتىپ وتىرۋ كەرەكتىگىن جاستارىمىزعا ايقىن ءتۇسىندىرەتىن ونەگە بار. رۋحاني جاڭعىرۋدىڭ باستى باعىت-باعدارى دا وسىندا», – دەدى.
سوندىقتان, مۇحتار قۇل-مۇحاممەد مەملەكەت باسشىسى جاريالاعان بىرەگەي باعدارلامالىق قۇجات بارشا قازاقستاندىقتىڭ جاپپاي قولداۋىنا يە بولاتىنىنا سەنىم ءبىلدىردى.