وسىنشا قىزمەتىنىڭ ءبارىن «ءانشى» دەگەن ءبىر اۋىز سوزگە سىيدىرعان ەرلاننىڭ ەسىمى قالىڭ قاۋىمعا ۇلتتىق مۋزىكا ونەرىنىڭ ۇلكەن جاناشىرى رەتىندە تانىلعانى راس. ۇلتتىق مۋزىكا مادەنيەتىندە ەرەكشە ورىن الاتىن ارقا مەكتەبىندەگى ءان ۇلگىسىنىڭ نەگىزىن قالاعان ۇكىلى ىبىراي, ءبىرجان سال, اقان سەرى, جاياۋ مۇسا سەكىلدى حالىق كومپوزيتورلارىنىڭ اندەرىن ساحنادا ءۇش ساعاتقا جۋىق تامىلجىتقانىمەن قويماي, ءار ءاننىڭ تاريحىن اڭگىمەمەن ءورىپ, ورەلى تانىمىمەن ەلدى تامسانتتى. ۇلتتىڭ ءان قاينارىنىڭ باستاۋ-بۇلاعىنا ساپار شەككىزە وتىرىپ, باسىنان تالاي قاسىرەتتى وتكىزگەن حالىق تاريحىنا ۇقساس ءان ونەرىنىڭ دە زوبالاڭ تاعدىرى تۋرالى اڭگىمەلەر زالداعى ۇلكەن-كىشىنى تۇگەل تەبىرەنتتى. ساكەن سەيفۋللين, يليا جاقانوۆ, اقسەلەۋ سەيدىمبەك, كاكىمبەك سالىقوۆ, مۇراتحان ەگىنباەۆ سىندى كومپوزيتورلاردىڭ اندەرىن كەزەڭ-كەزەڭىنە ساي كەزەگىمەن شىرقادى.
الماتى تورىندە العاش رەت جەكە شىعارماشىلىق كەشىن ۇيىمداستىرىپ وتىرعان ەرلان تولەۋتايدىڭ ەلۋگە كەلىپ, ەل الدىنا شىعىپ بەرگەن ەسەبىنەن ۋاقىتىنىڭ ءىزدەنىسپەن ءوتىپ كەلە جاتقانىنا, ءان تاعدىرىنا جاۋاپكەرشىلىكپەن قارايتىنىنا كۋا بولدىق. قازاقتىڭ دالاسى سياقتى جازىلىپ جاتقان كەڭ تىنىستى ۇنىمەن, تەرەڭنەن تولعاپ شىرقايتىن ەرلاننىڭ ورىنداۋىنداعى «ارداق», «قاراكەسەك», «شولپان», «ەستايدىڭ قورلانى», «تاۋ ءىشىندە» سەكىلدى اندەر وزىنشە ارلەنىپ, وڭدەلە ءتۇسكەنى اڭعارىلدى.
شىعارماشىلىق كەشتە مەرۋەرت ءتۇسىپباەۆا, روزا القوجا, سەيىل اياعان سىندى قازاق ەستراداسىنىڭ بەلگىلى انشىلەرى ەرلان تولەۋتايدىڭ اندەرىن ورىندادى. جاياۋ مۇسا مەن يمانجۇسىپ, اقان سەرى مەن جارىلعاپبەردىلەر حالىقپەن قانى-جانى ارالاسىپ, مۇددەسىن اشىنىپ قالاي قورعاسا, بۇگىنگى قوعامنىڭ شىندىعى ەرلاننىڭ دا قالامىنان شەر-شەمەن بولىپ توگىلىپ, كوركەمسوز وقۋ شەبەرلەرىنىڭ ورىنداۋىندا بىرىنەن سوڭ ءبىرى وقىلىپ, ونىڭ اقىندىعى انشىلىگىنەن ءبولىپ-جارىپ قاراۋعا كەلمەيتىن ءبىرتۇتاس دۇنيە ەكەنىن بايقاتتى.
سال-سەرىلەردىڭ مۇراتى ۇلتتىق ءان ونەرىن ساقتاۋشى, ورىستەتۋشى, بۇرىنعى جانە قازىرگى ءداۋىردىڭ اراسىن جالعاستىرۋشى بولسا, ءداۋلەسكەر دومبىراشى, ارقالى ءانشى ەرلان تولەۋتاي تابيعي تازا تالانتىمەن سول جاقسىلاردىڭ جۇرناعى ەكەنىن تانىتتى. ءان قازىناسىن كىرپىك قاقپاي كۇزەتۋدى عانا قىزمەتىم دەپ ءبىلىپ, حالىق مۇراسىنا قىلاۋ تۇسىرمەي كەلە جاتقان ەڭبەگىن كورەرمەنى دە ريزاشىلىقپەن باعالاپ, تىك تۇرىپ قول سوقتى.
ايگۇل احانبايقىزى, «ەگەمەن قازاقستان» الماتى