قر پرەمەر-ءمينيسترىنىڭ ءبىرىنشى ورىنباسارى اسقار مامين ەكسپو-2017-گە دايىندىق كەزىندە قاۋىپسىزدىك پەن قۇقىقتىق ءتارتىپتى قامتاماسىز ەتۋ جونىندەگى ۆەدومستۆوارالىق كوميسسيانىڭ (ۆاك) كوشپەلى وتىرىسىن وتكىزدى, دەپ حابارلايدى پرەمەر-ءمينيستردىڭ ءباسپاسوز قىزمەتى.
وتىرىس بارىسىندا قوعامدىق ءتارتىپ كۇزەتى مەن قاۋىپسىزدىكتى قامتاماسىز ەتىپ, جەدەل باسقارۋ ءۇشىن بىرقاتار شارالار كەشەنى قابىلدانىپ, ارنايى, قۇقىق قورعاۋ جانە وزگە دە مەملەكەتتىك ورگاندار مەن ۇيىمداردىڭ باسشىلارى ىشىنەن جەدەل شتاب پەن جۇمىس توبى قۇرىلدى. وسى ورايدا قاۋىپسىزدىكتى قامتاماسىز ەتۋگە جاۋاپتى مەملەكەتتىك ورگانداردىڭ باسشىلارى جۇزەگە اسىرىلىپ جاتقان جۇمىستار تۋرالى ەسەپ بەردى.
جالپى قوعامدىق ءتارتىپ كۇزەتىنە 9 مىڭنان استام قۇقىق قورعاۋ قىزمەتكەرلەرى جۇمىلدىرىلادى جانە كورمە كەشەنىنە كىرەبەرىستەر مەتالل دەتەكتورلارىمەن, رەنتگەن-تەلەۆيزيا قوندىرعىلارىمەن جابدىقتالعان. وسى جەردە بەينەساراپتاۋ, تۇلعانى انىقتاۋ جانە كەلۋشىلەردى تىركەۋ جۇيەسى قولدانىلادى.
سونىمەن قاتار, كورمە نىساندارىندا باقىلاۋ جۇرگىزىپ, جەدەل ارەكەت ەتۋ ماقساتىندا 2 مىڭنان استام بەينەباقىلاۋ كامەرالارى ورناتىلعان, ول استانا قالاسى ءىىد-ءنىڭ جەدەل باسقارۋ ورتالىعىنا شىعارىلعان.
ەكسپو-2017 اۋماعىندا پوليتسيا بولىمشەسى مەن كورمەگە جاقىن ماڭدا ءورت ءسوندىرۋ بولىمشەسى اشىلدى. كورمەنىڭ اشىلۋىنان ءبىر اي بۇرىن قاۋىپسىزدىكتى قامتاماسىز ەتۋ ورتالىعى جۇمىسىن باستايدى.