اتالعان ەلدەردىڭ سىرتقى ىستەر مينيسترلەرى اقش-تىڭ مەملەكەتتىك حاتشىسى رەكس تيللەرسوندى سيريانى قولداۋدان باس تارتۋعا كوندىرمەك. تيللەرسون «ۇلكەن جەتىلىك» سامميتىنەن سوڭ سيريا بويىنشا كەلىسسوزدەر جۇرگىزۋ ءۇشىن ماسكەۋگە بارادى دەپ كۇتىلۋدە.
دەگەنمەن, جيىن بارىسىندا G7 رەسەي مەن سيرياعا قارسى جاڭا سانكتسيالار ەنگىزۋگە بايلانىستى ورتاق كەلىسىمگە كەلە المادى. سونىمەن قاتار بۇل ەلدەردىڭ بارلىعى سيريانىڭ پرەزيدەنتتىك بيلىگىنە اساد كەلگەلى جاعدايدىڭ ۋشىعا تۇسكەنىن ايتتى.
بريتان ۇكىمەتىنىڭ وكىلدەرى رەسەي مەن سيرياعا قارسى سانكتسيا ەنگىزۋ ءۇشىن الدىمەن وتكەن اپتاداعى حيميالىق شابۋىلدى تولىعىمەن زەرتتەۋ كەرەكتىگىن ايتۋدا. G7 توبىنىڭ باسقا مۇشەلەرى دە حيميالىق شابۋىلدىڭ ناقتى ءارى بۇلتارتپاس دالەلى بولماي, سانكتسيا سالۋدى كەيىنگە قالدىراتىن بولىپ شەشتى. ال يتاليانىڭ سىرتقى ىستەر ءمينيسترى اندجەلينو الفانو G7 ساۋد ارابياسى, يوردانيا, كاتار مەن تۇركيامەن كەڭەسكەنىن اتاپ ءوتىپ, بۇل كەلىسسوزدەردى «ساياسي جەتىستىك» دەپ باعالادى.
وتكەن اپتادا رەسەي اقش-تىڭ سيرياعا جاساعان شابۋىلىن «اگرەسسيالىق ارەكەت» دەپ ايىپتاعان بولاتىن. سوعان قاراماستان اقش مەملەكەتتىك حاتشىسى ءوزىنىڭ رەسەيلىك ارىپتەسى سەرگەي لاۆروۆپەن, ءتىپتى, پرەزيدەنت ۆلاديمير پۋتينمەن دە كەزدەسۋى مۇمكىن.
ساراپشىلاردىڭ ايتۋىنشا, تيللەرسون اساد پەن ماسكەۋدىڭ اراسىن الشاقتاتا المايدى. سەبەبى, اساد – رەسەيدىڭ تاياۋ شىعىستاعى ماڭىزدى اسكەري جاقتاسى. سونداي-اق رەسەي سيريا پرەزيدەنتىنىڭ بيلىكتە قالۋى ءۇشىن اسكەري, ساياسي جانە قارجىلىق قولداۋ كورسەتىپ كەلەدى.
دايىنداعان گۇلنۇر قۋانىشبەكقىزى,
"ەگەمەن قازاقستان"