تەڭىز جاعالاۋى, بولمە ءىشى. وسىنداي ەكى-اق كورىنىستەن تۇراتىن قويىلىمدا ءۇش قانا اكتەر وينايدى. قىرىقتان اسقان قالتالى جىگىتكە امالسىز قوسىلعان بويجەتكەن تولقىنى تۋلاپ, الاسۇرعان تەڭىز جاعاسىندا جانى جاي تاپپاي, ءوزى دە سول تەڭىزدەي الاسۇرادى. ونى «بالاقاي» دەپ اتايتىن باي جىگىت ءبىر مەزەتتە بالىق اۋلاۋعا كەتەدى. مىنە, وسى كەزدە ءوزىن باقىتسىز سانايتىن بويجەتكەن جاعالاۋدا ءدال وزىندەي ومىردەن ءوز ورنىن تاپپاي, دەل-سال كۇي كەشىپ جۇرگەن تەڭىزشى جىگىتتى جولىقتىرادى. سىرلاسادى. اشىق تەڭىزدە جولاۋشىلار مىنگەن كەمەنى قۇتقارامىز دەپ قوس جولداسىمەن بىرگە كاتەرمەن رادياتسيالىق ايماقتى كەسىپ ءوتىپ, ايىقپاس دەرتكە ۇشىراعان ءازيز ەسىمدى جىگىت ونىڭ ءومىرىن, وي-ساناسىن كۇرت وزگەرتەدى. قويىلىم سوڭىندا ۇشەۋى ءۇش جاققا كەتەدى. ءنازيدىڭ نازىك جانىن تەربەگەن, وزىنە ىنتىق ەتكەن جىگىت دۇنيەدەن وتەدى, «ماحاببات دەگەن ەركىندىك. مەن ساعان ۇيلەنبەيمىن, ۇيلەنسەم, ەركىندىگىمنەن ايىرىلىپ قالامىن» دەپ ماسايرايتىن ەسكەندىر اقىر اياعىندا «كەتپە» دەپ قىزدىڭ اياعىن قۇشىپ جالىنعانىمەن, ءوزىنىڭ باقىتى ءۇشىن باتىل قادامعا بەل بۋعان بويجەتكەن باسقا قالاعا كەتەدى.
− مۇنداي تاعدىر قازىر ءبىزدىڭ كوپتەگەن قىزدارىمىزدىڭ باسىندا بولۋى مۇمكىن. بولماسا دا, ءنازيدىڭ ورنىندا بولۋدى ارماندايتىن, ارمانداپ كەتكەن, «ماسەلە – نەكەدە ەمەس» دەپ باي ادامنىڭ قاسىندا ءجۇرگىسى كەلەتىن ارۋلارىمىز از ەمەس. سوندىقتان وسى تاقىرىپ مەنى قاتتى تولعاندىردى. ءوز تاعدىرىن ءوزى وزگەرتكەن قىزدى ساحناعا الىپ شىققىم كەلدى, – دەيدى قويىلىم رەجيسسەرى سايلاۋ قاميەۆ. ول تۇپنۇسقاسى «دۋەل» دەپ اتالاتىن بۇل تۋىندىنىڭ اتىن «ءنازي» دەپ وزگەرتىپ, ورىس تىلىنەن قايتا اۋدارىپ شىققانىن ايتتى.
مۇڭعا تولى مەلودرامادا جاستار تەاترىنىڭ ءۇش اكتەرى – ايدوس نۇرماعامبەتوۆ, ەرجان امانتاەۆ پەن ماقپال ەلتايقىزى ءوز كەيىپكەرلەرىن بارىنشا اشۋعا تىرىستى.
«بۇل قويىلىمعا 18 كۇن دايىندالدىق. ءنازي − پسيحولوگيالىق جاعىنان كۇردەلى ءرول. بۇعان دەيىنگى قويىلىمداردا مىنەزى شايقى, دولى قىز-كەلىنشەكتەردىڭ ءرولدەرىن سومدادىم. بۇگىن وسكەمەندىك كورەرمەندەرگە باسقا قىرىنان كورىندىم دەپ ويلايمىن. ماسەلە – باستى رولدە ەمەس, ونىڭ كۇردەلىلىگىندە, ادام جانىنىڭ ىشكى ءيىرىمدەرىنە تەرەڭ بويلاۋىندا», – دەدى ءنازيدى بەينەلەگەن اكتريسا ماقپال ەلتايقىزى.
«بۇل اكتەردى, اكتريسانى جان-جاقتى اشاتىن قويىلىم. ءۇش ادامنىڭ ءۇش ءتۇرلى پوزيتسياسى بار, ءۇش ءتۇرلى كوزقاراسى بار, ءۇش ءتۇرلى شىندىعى بار. ارقايسىسى ءوزىنىڭ شىندىعىن اشۋعا تىرىستى», دەيدى ەسكەندىر ءرولىن ويناعان اكتەر ايدوس نۇرماعامبەتوۆ.
ازامات قاسىم,
«ەگەمەن قازاقستان»
وسكەمەن