بۇگىنگى جۇمىس ورىندارى جارمەڭكەسىنە سولتۇستىك وڭىرلەردەگى 636 جۇمىس بەرۋشى وڭتۇستىكقازاقستاندىقتارعا ءبىلىم بەرۋ, دەنساۋلىق ساقتاۋ, مەملەكەتتىك باسقارۋ, اۋىلشارۋاشىلىق پەن قۇرىلىس سالالارى بويىنشا 1785 بوس جۇمىس ورنىن ۇسىنۋدا. سونىمەن قاتار,جارمەڭكەگە جەرگىلىكتى 248 جۇمىس بەرۋشى, ونىڭ ىشىندە 30 ءىرى كاسىپورىن 2500 بوس جۇمىس ورىندارىن ۇسىنىپ وتىر.
شاراعا قاتىسقان قر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا مەن وڭتۇستىك قازاقستان وبلىسىنىڭ اكىمى جانسەيىت تۇيمەباەۆ حالىققا ۇسىنىلىپ وتىرعان جۇمىس ورىندارىمەن تانىستى.
حالقى تىعىز قونىستانعان وڭتۇستىك وڭىرىندە العاش رەت ەلىمىزدىڭ 4 ءوڭىرى مەن وقو-نىڭ جۇمىس بەرۋشىلەرىنىڭ بوس جۇمىس ورىندارى جارمەڭكەسىنىڭ ۇيىمداستىرىلۋى كەزدەيسوق ەمەستىگىن ايتقان مينيستر ت.دۇيسەنوۆا بۇگىنگى شارا حالىقتىڭ جۇمىسپەن قامتىلۋىنا سەپتىگىن تيگىزەتىنىنە سەنىم ءبىلدىردى.
«مۇندا ەڭبەك كۇشى ايتارلىقتاي ارتىق بولسا, سولتۇستىك وڭىرلەردە جۇمىس قولىنىڭ تاپشىلىعى سەزىلەدى. سوندىقتان, اتالعان جارمەڭكە, وقو تۇرعىندارىنا ءوز ماماندىعى بويىنشا جۇمىس تابۋعا كومەكتەسەدى دەگەن ءۇمىت بار. وسى ورايدا, مەملەكەت, جول شىعىندارى مەن ءبىر جىل بويى باسپانا جالداۋعا كەتەتىن شىعىندى وتەۋگە سۋبسيديا بولەتىنىن اتاپ وتكەن ءجون. ەڭبەك كۇشى ارتىق وڭىرلەردەن جۇمىس قورى تاپشى ايماقتارعا قونىس اۋدارۋ جۇمىسكەر مەن جۇمىس بەرۋشىنىڭ ءوزارا قىزىعۋشىلىعى بويىنشا ەرىكتى تۇردە جۇزەگە اساتىنىن اتاپ وتكىم كەلەدى», - دەدى شارانىڭ اشىلۋ بارىسىندا تامارا دۇيسەنوۆا.
وسى سىندى ۇقساس جارمەڭكەلەر وڭىردەگى ماقتاارال جانە سارىاعاش اۋداندارىندا 3-4 ءساۋىر كۇندەرى سولتۇستىك وڭىردەگى جۇمىس بەرۋشىلەردىڭ قاتىسۋىمەن ءوتىپ, وندا 200-دەن استام تۇرعىن وتباسىمەن قوستاناي, پاۆلودار, سقو جانە شقو-عا قونىس اۋدارۋعا نيەت بىلدىرگەن.
ءوز كەزەگىندە ءسوز العان وبلىس اكىمى ج.تۇيمەباەۆ حالىقتى بىركەلكى جايعاستىرۋ ماقساتىندا ەڭبەك كۇشى مول ايماقتان, ەڭبەك كۇشى جەتىسپەيتىن رەسپۋبليكامىزدىڭ سولتۇستىك وڭىرلەرىنە ءوز ەركىمەن حالىقتى قونىستاندىرۋ وتە ماڭىزدى قادام ەكەنىن اتاپ ءوتتى.
«ەلباسى نۇرسۇلتان ءابىش ۇلى نازارباەۆ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا ارناعان جولداۋىندا – ەڭبەك نارىعىن جاڭعىرتۋدا باسى ارتىق جۇمىس كۇشى بار وڭىرلەردەن جەتكىلىكسىز جەرلەرگە قونىستاندىرۋعا قاتىستى جاڭا مىندەتتەمە قويدى. سونىمەن بىرگە اۋىلداردان قالالارعا جۇمىس كۇشىن ۇتىمدىلىقپەن تارتۋعا قولداۋ كورسەتۋ كەرەكتىگى جونىندە تاپسىرما بەرگەن بولاتىن. بۇگىن ەلباسى قويعان مىندەتتەردى بىرلەسىپ جۇزەگە اسىرۋ ماقساتىندا وڭىرارالىق بوس جۇمىس ورىندار جارمەنكەسى ۇيىمداستىرىلىپ وتىر. جالپى ءبىزدىڭ وبلىستا تابيعي-كليماتتىق جانە گەوگرافيالىق جاعدايىنىڭ قولايلىعى ادام يندەكسىنىڭ دامۋىنا وڭ اسەرىن تيگىزەدى. وبلىستا حالىق سانى سوڭعى ون جىلدا جىل سايىن 2 پايىزعا ءوسىپ, بۇگىندە 3 ميلليونعا جۋىقتادى. ونىڭ ىشىندە اۋىلدى جەردەگى تۇرعىندار 1 ملن 571 مىڭ ادامعا جەتىپ, جالپى حالىقتىڭ 54,9 پايىزىن قۇراپ وتىر»,-دەدى اكىم.
ايتا كەتەيىك, 2016 جىلى وڭتۇستىك قازاقستان وبلىسىنان 146 وتباسى سولتۇستىك قازاقستان (125 وتباسى), قوستاناي (18 وتباسى) جانە شىعىس قازاقستان (3 وتباسى) وبلىستارىنا قونىس اۋدارعان بولاتىن.