«قازىرگى ۋاقىتتا وبلىستىق ىشكى ىستەر دەپارتامەنتىنىڭ تەرگەۋ باسقارماسى وسكەمەن قالاسىنىڭ ەكى تۇرعىنىنىڭ ولىمىنە بايلانىستى سوتقا دەيىنگى تەرگەۋ جۇمىستارىن جۇرگىزىپ جاتىر. الدىن الا جاسالعان بولجام بويىنشا قازاعا ۇشىراعان جىگىت پەن استانا تۇرعىنى اراسىندا بۇرىنىراقتا ءوزارا كەلىسپەۋشىلىك بولعان. 30 ناۋرىزدان 31-ىنە قاراعان ءتۇنى استانالىق كەگىن الماق بولىپ, كولىگىنە ءوزىنىڭ كوڭىلىن قالدىرعان جىگىت پەن ونىڭ دوسىن وتىرعىزىپ الىپ, شەشەك اسۋىنا كەلەدى. وسى جەردە كيكىلجىڭ تۋىنداپ, سوڭىندا استانالىق قارۋ قولدانىپ, وسكەمەننىڭ ەكى تۇرعىنىن اتىپ تاستاعان. قازىرگى ۋاقىتتا ەرەكشە اۋىر قىلمىس جاساعانى ءۇشىن استانا قالاسىنىڭ تۇرعىنى قاماۋعا الىندى», - دەدى نۇرلان بيجانوۆ.
وبلىس پروكۋرورىنىڭ ورىنباسارى تەرگەۋ بارىسىندا وقيعا ورنىندا شقو ىشكى ىستەر دەپارتامەنتىنىڭ ۇيىمداسقان قىلمىسقا قارسى كۇرەس باسقارماسىنىڭ قىزمەتكەرىنىڭ دە بولعانى انىقتالعانىن, قازىرگى ۋاقىتتا ونىڭ قاماۋعا الىنىپ, جۇمىستان بوساتىلعانىن جانە قاندى وقيعانى جاسىردى دەگەن ايىپپەن وسكەمەن قالاسىنىڭ ەكى تۇرعىنىنىڭ قاماۋعا الىنىپ, قىلمىسقا قاتىستارىنىڭ بار-جوقتىعى انىقتالىپ جاتقانىن مالىمدەدى.
سونىمەن قاتار, نۇرلان بيجانوۆ كۇدىكتى ءوزى اتىپ ولتىرگەن ادامدارىنىڭ دەنەسىن كولىگىنە سالىپ الىپ, استاناعا بارا جاتقان جولدا تاستاپ كەتكەنىن مويىنداعانىمەن, قوس جىگىتتىڭ ءمايىتى ءالى تابىلماعانىن, تەرگەۋ توبى ىزدەستىرىپ جاتقانىن ايتتى. قىلمىستىق وقيعانىڭ شقو ىشكى ىستەر دەپارتامەنتى مەن وبلىس پروكۋراتۋراسىنىڭ قاتاڭ باقىلاۋىنا الىنعانىن, وسى ىسكە وراي ۆەدومستۆوارالىق كوميسسيا قۇرىلعانىن جەتكىزدى.
وبلىس پروكۋرورىنىڭ ورىنباسارى قاتونقاراعاي اۋدانىنىڭ ۇلكەن نارىن اۋىلىندا ورىن العان قىلمىستىق وقيعاعا بايلانىستى دا تۇسىنىكتەمە بەردى. ەستەرىڭىزگە سالا كەتەيىك, 2 ءساۋىر كۇنى ۇلكەن نارىن اۋىلىندا كۇندىزگى ۋاقىتتا وسى اۋىلدىڭ 1985 جىلى تۋعان تۇرعىنىنا 1990, 1980, 1977 جىلى دۇنيەگە كەلگەن ءۇش جەرگىلىكتى تۇرعىن قارۋلى شابۋىل جاساعان بولاتىن. اۋىلداعى دۇكەندەردىڭ ءبىرىنىڭ جانىندا سوققىعا جىعىلعان جىگىت اۋداندىق ىشكى ىستەر بولىمىندە جۇمىس ىستەيتىن اعاسىن كومەككە شاقىرادى. پوليتسەيلەزدە وقيعا ورنىنا ءوز كولىگىمەن جەتىپ, باۋىرىمەن بىرگە ءۇش جىگىتتى ىزدەپ, كولىك جوندەۋ ورىندارىنىڭ بىرىنەن تابادى. سول جەردە تاعى دا كيكىلجىڭ باستالىپ, ءۇش جىگىتتىڭ بىرەۋى پوليتسەيدىڭ باۋىرىن اتىپ, جارالايدى. وسى كەزدە ىشكى ىستەر ءبولىمىنىڭ قىزمەتكەرى 1980 جىلى تۋعان جىگىتكە قارسى وق اتادى. اۋىر جارالانعان جىگىت ەمحانادا كوز جۇمادى. 1977 جىلى تۋعان تۇرعىن وقيعا ورنىنان قاشىپ كەتكەنىمەن, سوڭىنان قولعا تۇسەدى.
«وسى فاكت بويىنشا قر قك-ءنىڭ 293 بابى, 3 بولىگى «بۇزاقىلىق», ال, پوليتسيا قىزمەتكەرىنە قاتىستى قر قك-ءنىڭ 102 بابى «قاجەتتى قورعانىس شەگىنەن شىعۋ كەزىندە جاسالعان كىسى ءولتىرۋ» بويىنشا سوتقا دەيىنگى تەرگەۋ باستالدى. كەيىننەن ءاىىب قىزمەتكەرىنىڭ ارەكەتتەرى كىسى ءولتىرۋ, ياعني, قر قك-ءنىڭ 99 بابىنا سايكەس قايتا سارالاندى. ول ۇستالىپ, وعان قاتىستى «قاماۋعا الۋ» تۇرىندە بۇلتارتپاۋ شاراسى قولدانىلدى», - دەدى نۇرلان بيجانوۆ.
ازامات قاسىم, «ەگەمەن قازاقستان» وسكەمەن