ول بۇگىندە «وڭتۇستىك» وڭىرلىك ءاسكەري قولباسشىلىعىنىڭ 01731 ءاسكەري بولىمىندە قىزمەت ەتەدى. قىزمەتى – قارۋ-جاراق جانە رادياتسيالىق حيميا-بيولوگيالىق قورعانۋ قۇرالدارىن ءجوندەۋ شەبەر-مامانى. ون جىلعا جۋىق ۋاقىتتان بەرى وسى سالادا قىزمەت ەتىپ كەلە جاتقان اسەل بۇگىندە قارۋ-جاراقتىڭ «ءتىلىن» بەس ساۋساعىنداي بىلەدى. بۇل ىسكە ماشىقتانعان ول قورعانۋ قۇرالدارىن دا ءوزى ءجوندەي بەرەدى. شىنىندا دا قارۋ-جاراقتىڭ قۇپياسىن ءبىلۋ, ونى مەڭگەرۋ تاباندىلىقپەن قاتار تالانتتى قاجەت ەتەدى. كەيدە مۇنداي ازاماتتاردىڭ قابىلەتى تاڭدانىسىمىزدى تۋدىرىپ تا جاتادى. دەگەنمەن, اركىمنىڭ قارىم-قابىلەتى دە ءوزىنىڭ تاڭداعان ماماندىعىنا قاراي كورىنەتىن بولسا كەرەك. ءبىر قاراعاندا, ءاسكەري سالا اسىرەسە, قىز بالاسىنا قول ەمەس بولىپ كورىنۋى دە ءمۇمكىن. بىراق ماماندىققا دەگەن قۇشتارلىقتىڭ ءبارىن دە جەڭەتىنىن اسەل ساۋراننىڭ تاعدىرىنان كورۋگە بولادى.
– اسكەري بولىمدەگى مامانداردىڭ كومەگىمەن از ۋاقىتتا قارۋ-جاراقتىڭ قۇپياسىن مەڭگەرىپ شىقتىم. بۇگىندە بۇل سالا مەن ءۇشىن اسا قيىندىق تۋدىرمايدى. دەگەنمەن, اسكەري سالانىڭ ءتارتىبى وزگەشە. بۇل مەنىڭ ءوز قالاۋىممەن تاڭداعان ماماندىعىم. سوندىقتان دا تەمىردەي ءتارتىپتى تۋ ەتكەن اسكەري ءومىرگە كوزقاراسىم وزگەشە, – دەگەن كەيىپكەرىمىز ماماندىعىمەن ماقتاناتىنىن دا جەتكىزدى.
2001 جىلى تالاس اۋدانى, مايتوبە اۋىلىنان ارمان قۋىپ كەلگەن اسەل اۋەلى م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ «جاراتىلىستانۋ» فاكۋلتەتىنە حيميا-بيولوگيا ماماندىعى بويىنشا وقۋعا تۇسەدى. قىز بالاعا ءتان ماماندىق الىپ, ءبىلىم بەرۋ ىسىمەن اينالىسۋدى ماقسات ەتەدى. الايدا ويلاماعان جەردەن ونىڭ ءومىرى وزگە ارناعا بۇرىلىپ سالا بەرەدى. ۋنيۆەرسيتەتتىڭ ەكىنشى كۋرسىن تامامداعان سوڭ اسكەري قىزمەتكەر مارات الىمبەكوۆكە تۇرمىسقا شىعادى. ءسويتىپ, ونىڭ دا اسكەري سالاعا دەگەن قىزىعۋشىلىعى ويانىپ, اقىرى سوندا اۋىسۋعا تاۋەكەل ەتەدى. ءاۋەلى كىتاپحاناشى بولعان اسەل ساۋران كەيىن اسكەري تارتىپپەن انت قابىلدايدى. جىلدار وتە ءاسكەري بولىمدە مادەنيەت ءۇيىنىڭ باسشىسى لاۋازىمىنا دەيىن كوتەرىلەدى. بۇگىندە جوعارى ءناتيجەلى جۇمىسىمەن كوزگە ءتۇسىپ, ەلىمىزدىڭ قورعانىس سالاسىندا قالتقىسىز قىزمەت ەتىپ جۇرگەن ول – قارۋ-جاراق جوندەۋ شەبەرى. ال جارى مارات – سول 01731 ءاسكەري ءبولىمنىڭ وركەسترىندە اعا نۇسقاۋشى.
قارۋ-جاراق قۇپياسىن بىلەتىن قىز بۇگىندە ءوزى قىزمەت ەتىپ ءجۇرگەن اسكەري بولىمدە ابىرويعا يە مامان. ەندى تەك قانا ەلدىڭ تىنىشتىعىن كۇزەتۋگە ەڭبەك ەتىپ, جوعارى ناتيجەلەرگە قول جەتكىزۋدى ماقسات ەتىپ كەلەدى. ەرلەرمەن بىرگە ەل تىنىشتىعى ءۇشىن تەر توگىپ جۇرگەن زامانداسىمىزدىڭ ءالى دە الار اسۋى الدا.
حاميت ەسامان, «ەگەمەن قازاقستان» جامبىل وبلىسى