ۆەدومستۆونىڭ حابارلاۋىنشا, شقو-دا سۋ تاسقىنىنا بايلانىستى «سەمەي-قاينار» 7-166 شاقىرىم (27 شاقىرىمدى سۋ باستى) جولىندا كولىكتىڭ بارلىق تۇرىنە جول جابىلدى. جولاۋشىلار ۋچاسكەنى «سەمەي-قاراۋىل» جولى ارقىلى اينالىپ وتەدى.
جاڭبىر جانە قاردىڭ جاپپاي ەرۋىنەن كەي وزەندەردەگى سۋ دەڭگەيى ۇنەمى كوتەرىلۋدە. دەگەنمەن, جاعداي تۇراقتى. شقو تجد ءباسپاسوز قىزمەتىنىڭ حابارلاۋىنشا, اتالعان دەپارتامەنتتىڭ جەدەل شتابى تاۋلىك بويى كەزەكشىلىك جۇرگىزەدى.
سەمەيدەگى كۇردەلى اۋا رايى جاعدايىندا «ءورت ءسوندىرۋ جانە اپاتتى قۇتقارۋ جۇمىستارى قىزمەتىنىڭ» كۇشتەرى وتپە جول مەن جەكە تۇرعىن ءۇي اۋماقتارىنداعى قار سۋلارىمەن كۇرەس جۇرگىزۋدە. جەر استى سۋلارىنان 5 مەكەنجايدا جەرتولە مەن جەر تەلىمدەرىن سۋ باسۋ قاۋپى تۋىندادى. سەمەيدىڭ 46 ءورت ءسوندىرۋشىسى تشق-مەن بىرلەسىپ, بارلىعى 40 مىڭ تەكشە مەتر سۋ تارتىپ شىعارىلدى.
سينوپتيكتەردىڭ ايتۋىنشا, شقو-دا جاڭبىر سۋلارىنىڭ تاسۋ قاۋپى ءالى ساقتالادى. سۋ دەڭگەيى كوتەرىلگەن جاعدايدا وبلىستىق توتەنشە جاعدايلار دەپارتامەنتى تۇرعىنداردى 112 نومىرىنە حابارلاۋدى سۇرايدى.