كەشە اتالمىش مينيسترلىككە قارايتىن «كاسىپقور» حولدينگى» كوممەرتسيالىق ەمەس اكتسيونەرلىك قوعامىنىڭ ءباسپاسوز ءماسليحاتى بولىپ, ەلىمىزدە ءۇشىنشى جىل قاتارىنان وتكىزىلىپ كەلە جاتقان WorldSkills Kazakhstan جوباسى تۋرالى كەڭىنەن باياندالدى.
جوبانىڭ ماقساتى – جۇمىسشى ماماندىقتارىنىڭ ءمارتەبەسىن ارتتىرۋ جانە شەبەرلىك داعدىلارىن دامىتۋ. WorldSkills كاسىپتىك ءبىلىمنىڭ دامۋىنا وڭ اسەرىن تيگىزەدى. ونىڭ چەمپيوناتتارى ەكى جىلدا ءبىر رەت ءار مەملەكەتتە وتەدى. وعان 22 جاسقا دەيىنگى كوللەدج جانە ۋنيۆەرسيتەت ستۋدەنتتەرى, بىلىكتى جاس ماماندار, سونىمەن قاتار, تانىمال ماماندار, كاسىپقويلار, وندىرىستىك وقىتۋ شەبەرلەرى مەن تاپسىرمالاردى ورىنداۋدى باعالايتىن ساراپشى رەتىندەگى نۇسقاۋشىلار قاتىسادى. ءۇمىتكەرلەر 76 قاتىسۋشى مەملەكەتتىڭ وڭىرلىك كاسىپتىك چەمپيو-
ناتتارىنان ىرىكتەلەدى. ولار ءوزدەرىنىڭ شىنايىلىققا بارىنشا جاقىن تاپسىرمالاردى شەشە وتىرىپ, جەكە جانە ۇجىمدىق ساپاسىن, تەحنيكالىق قابىلەتتەرىن كورسەتەدى.
كوماندالار ناتيجەلەرى تەك قاتىسۋشىلاردىڭ جەكە كاسىبي ساپاسىن عانا ەمەس, سونداي-اق, جەكە كاسىپتىك دايىندىق دەڭگەيى مەن قاتىسۋشىلار كەلگەن ەلدىڭ قىزمەت كورسەتۋ ساپاسىنىڭ دەڭگەيىن دە كورسەتەدى. 2014 جىلى قازاقستان WorldSkills اسسوتسياتسياسىنا 76-شى قاتىسۋشى مەملەكەت بولىپ تىركەلدى. 2015 جىلى قازاقستاندا WorldSkills Kazakhstan ۇلتتىق چەمپيوناتى وتكىزىلدى. 2016 جىلعى ۇلتتىق چەمپيونات ناتيجەسىندە قۇرىلعان ۇلتتىق قۇراما مۇشەلەرى EuroSkills حالىقارالىق چەمپيوناتىنا «كىرپىش قالاۋ», «قۇرعاق قۇرىلىس پەن سىلاق جۇمىستارى», «پليتامەن قاپتاۋ», «دانەكەرلەۋ جۇمىستارى», «ەلەكتر-مونتاج جۇمىستارى» بويىنشا قاتىستى. WorldSkills Kazakhstan ميسسياسى – كاسىپتىك باعدار مەحانيزمىن, مامانداردى دايارلاۋ جانە ەڭبەك ءونىمدىلىگىن ارتتىرۋدى قوسا العاندا, حالىقارالىق ستاندارتتار نەگىزىندە تەحنيكالىق ماماندىقتار بويىنشا ءوندىرىس ورىندارى سالاسىن جوعارى تەحنولوگيالىق ماماندارمەن قامتاماسىز ەتۋ مەحانيزمىن قۇرۋعا ۇلكەن ۇلەس قوسادى», دەدى ءبىلىم ءجانە عىلىم مينيسترلىگى تەحنيكالىق جانە كاسىپتىك ءبىلىم دەپارتامەنتى حالىقارالىق جوبالار جانە سەرىكتەستىك باعدارلاماسىنىڭ باسشىسى راۋزا شيرگاتوۆا.
جيىن بارىسىندا «كاسىپقور» حولدينگى» كوممەرتسيالىق ەمەس اكتسيونەرلىك قوعامىنىڭ باسقارما ءتوراعاسى نۇرعالي رىمعالي ۇلى بۇل رەتتە حولدينگتىڭ اتقارىپ جاتقان جۇمىستارىنا دا توقتالىپ ءوتتى.
«جاڭا يندۋسترياعا ءوندىرىستى كوتەرەتىن, جۇمىس بەرۋشىلەردىڭ تالابىنا ساي كەلەتىن ماماندار قاجەت. سوندىقتان ءبىز, ءبىرىنشىدەن, ءبىلىم بەرۋدىڭ مازمۇنىنا قارايمىز. سەبەبى, وندىرىستەگى تەحنيكالىق ءوزگەرۋگە بايلانىستى مازمۇن دا ءوزگەرەدى. وسىعان بايلانىستى ءبىلىم مازمۇنى دا سودان قالماي قاتار ءجۇرىپ وتىرۋى كەرەك. ەكىنشى – وقۋ-ءادىستەمەلىك قۇرالدارمەن تولىق قامتۋ. ءۇشىنشى – ساباق بەرەتىن ينجەنەر-پەداگوگتاردىڭ ءبىلىم دەڭگەيىن كوتەرۋ جانە جۇمىس بەرۋشىلەرمەن قويان-قولتىق بايلانىس جاساۋ», دەدى ول.
سونىمەن قاتار, ول دۋالدى وقىتۋدىڭ ءمانى مەن ماڭىزىنا توقتالىپ, كەڭىنەن ءتۇسىندىرىپ ءوتتى. «قازىرگى ۋاقىتتا ەلىمىزدە 400-دەن استام كوللەدج دۋالدى وقىتۋمەن اينالىسادى. 2300-دەي جۇمىس ورىندارى ستۋدەنتتەردىڭ ءتاجىريبەدەن وتۋىنە اتسالىسۋدا. ول بىلىكتى مامان دايارلاۋدا ماڭىزدى قادام دەي الامىن. سول سەبەپتى ءبىز بيىلدان باستاپ دۋالدى وقىتۋعا قاتىساتىن جۇمىس ورىندارىنا ادىستەمەلىك كومەك كورسەتكىمىز كەلەدى», دەدى نۇرعالي رىمعالي ۇلى.
راۋان قايدار,
«ەگەمەن قازاقستان»