يندۋستريالدى-يننوۆاتسيالىق دامۋ باعدارلاماسىنىڭ العاشقى بەسجىلدىعىن جۇزەگە اسىرۋ بارىسىندا ماشينا جاساۋ ەلىمىزدەگى ەڭ قارقىندى دامىعان سالا بولدى. بۇرىن-سوڭدى ەلىمىزدە شىعارىلماعان جاڭا جوعارى تەحنولوگيالى ونىمدەر پايدا بولدى. ولار: لوكوموتيۆتەر, ەلەكتروۆوزدار, جولاۋشىلار ۆاگوندارى, تىكۇشاقتار, اۆتوكولىكتەر, دەپ جازدى قر ينۆەستيتسيالار جانە دامۋ ءمينيسترى جەڭىس قاسىمبەك ءوزىنىڭ فەيسبۋكتەگى پاراقشاسىندا.
اتالعان سالانى جان-جاقتى دامىتۋ ءۇشىن جىل سايىن قازاقستان ماشينا جاساۋشىلارىنىڭ فورۋمىن وتكىزۋدى داستۇرگە اينالدىردىق. وتكەن جىلدىڭ قىركۇيەك ايىندا الەمنىڭ 20 ەلىنەن 100-دەن استام دەلەگات قاتىسىپ, وتاندىق ماشينا جاساۋ سالاسىن دامىتۋ تۋرالى كەلەلى جيىن بولدى. بۇل سالادا شەتەلدىك مايتالمان ماماندارمەن تاجىريبە الماسۋ ءبىز ءۇشىن اۋاداي قاجەت.
سوڭعى جىلدارى وسى سالاداعى ءوندىرىس كولەمى تومەندەگەن, بىراق تومەندەۋ قارقىنى بىرتىندەپ باياۋلاپ كەلەدى. 2015 جىلمەن سالىستىرعاندا نەگىزگى ءونىم تۇرلەرىندەگى ءوندىرىس كولەمى ءبىرشاما ارتقان. ماسەلەن, جۇك اۆتوكولىكتەرى, تىركەمەلى جۇك ۆاگوندارى, ەلەكترلى ترانسفورماتورلار مەن كوندەنساتورلار, تالشىقتى وپتيكالىق كابەل جانە اككۋمۋلياتور وندىرىسىندە ءوسىم بار.