قاۋلىعا سايكەس, ۋكراينانىڭ كورمەگە قاتىسۋى مەن دايىندىعىن قامتاماسىز ەتۋ ماقساتىندا ۇيلەستىرۋشى كوميتەت قۇرىلدى, ونىڭ توراعاسى بولىپ ۆيتسە-پرەمەر – وڭىرلىك دامۋ, قۇرىلىس جانە تۇرعىن ءۇي-كوممۋنالدىق شارۋاشىلىعى جونىندەگى مينيستر گەنادي زۋبكو تاعايىندالدى. ال كەشە ەلوردادا ۋكراينانىڭ قازاقستانداعى ەلشىلىگىندە ۋكراينا ىستەرى جونىندەگى ۋاقىتشا سەنىم بىلدىرىلگەن وكىل ۆولودىمىر دجيدجورا جۋرناليستەرگە ارنايى بريفينگ وتكىزىپ, ءوز ەلىنىڭ بيىل استانادا وتەتىن اۋقىمدى كورمەگە دايىندىعى جونىندە جان-جاقتى اڭگىمەلەپ بەردى.
ونىڭ ايتۋىنشا, الەمنىڭ باسقا دا ەلدەرى سەكىلدى ۋكراينانىڭ دا بۇل ماڭىزدى شاراعا دايىندىق جۇمىستارى قىزۋ جۇرگىزىلىپ جاتقان كورىنەدى. «ءبىز ءوز مەملەكەتىمىزدىڭ اتىنان قازاقستانعا ەكسپو-2017 حالىقارالىق كورمەسىنە قاتىسۋىمىزعا قولداۋ كورسەتىپ, كومەك قولىن سوزعانى ءۇشىن ريزاشىلىعىمىزدى بىلدىرەمىز. سەبەبى, وزدەرىڭىز بىلەتىندەي, ەلىمىزدە كۇردەلى جاعداي قالىپتاسقان. سوندىقتان, قازاقستاندىق تاراپ ءبىزدىڭ مەملەكەتكە ارنايى پاۆيلون ءبولىپ, ۇلكەن كورمەگە تەگىن قاتىسۋىمىزعا مۇمكىندىك بەرەتىن ورتاق شەشىمگە قول جەتكىزدىك. جالپى, قازاقستان بىزدەن بولەك, ونعا جۋىق ەلگە ءدال وسىنداي جاعداي جاساپ وتىر ەكەن. قازىر ۋكراينانىڭ پاۆيلونىن قۇرۋعا «استانا ەكسپو-2017» ۇلتتىق كومپانياسى سەپتىگىن تيگىزۋدە. پاۆيلوندى دايىنداۋ, قۇرۋ, بەزەندىرۋ, ديزاينىن جاساۋ جۇمىستارىن ءبىز قازاقستانداعى دوستارىمىزبەن بىرلەسە قولعا الىپ جاتىرمىز», – دەدى ۆ. دجيدجورا.
سونداي-اق, ول قازىرگى تاڭدا ۋكراينانىڭ ۇلتتىق پاۆيلونىن دايىنداۋ جانە كورمە اياسىندا بۇل ەلدىڭ ۇلتتىق كۇنىن ۇيىمداستىرۋ باعىتىندا اۋقىمدى جۇمىستار اتقارىلا باستاعانىن جەتكىزدى. ونىڭ سوزىنە قاراعاندا, ۋكراينانىڭ ۇلتتىق كۇنىن وتكىزۋ 15 ماۋسىمعا جوسپارلانىپ وتىر ەكەن. ال بۇل كۇننىڭ اشىلۋىنا ۋكراينانىڭ پرەمەر-ءمينيسترى ۆ.گرويسمان باستاعان دەلەگاتسياسى ارنايى كەلمەك.
سونىمەن قاتار, ول ۋكراينانىڭ ۇلتتىق پاۆيلونىنىڭ اۋماعى شاعىن بولعاندىقتان, وندا نەگىزىنەن مەديا تانىستىرىلىم وتەتىنىنە توقتالدى. «ءبىز كورمەگە قانداي دا ءبىر قۇرىلعىلاردى, يا بولماسا تەتىكتەردى اكەلمەيمىز. ال مەديا تانىستىرىلىم شەڭبەرىندە كورمەگە قاتىسۋعا كەلگەن ۋكراينانىڭ مەملەكەتتىك جانە جەكەمەنشىك كومپانيالارىنىڭ وكىلدەرى ەلىمىزدىڭ مۇمكىندىگىن, ونىڭ ىشىندە جاڭارتىلعان ەنەرگيا كوزدەرىنە قاتىستى قول جەتكىزگەن جەتىستىكتەرىمىزدى بارىنشا كورسەتۋگە كۇش سالاتىن بولادى. الدىن الا ايتاتىن بولسام, اۋقىمدى شاراعا ونداعان كومپانيا قاتىسۋعا ىنتا-نيەت تانىتىپ وتىر», – دەدى ۋكراينا ىستەرى ءجونىندەگى ۋاقىتشا سەنىم بىلدىرىلگەن وكىل.
سونىمەن, ەكسپو-2017 كورمەسىنە قاتىساتىن كومپانيالار ءىشىندە «دتەك», «فۋرلەندەر ۆيندتەحنولودجي», «SYNEKO», «SolarGaps» سەكىلدى ۋكراينانىڭ جەتەكشى ءارى جەكەمەنشىك كومپانيالارى بار.
ءلايلا ەدىلقىزى, «ەگەمەن قازاقستان»