وسىعان وراي قازمەديا ورتالىعىندا وتكەن سالتاناتتى راسىمگە قاتىسىپ, ءسوز سويلەگەن اقپارات جانە كوممۋنيكاتسيالار ءمينيسترى داۋرەن اباەۆ جاقسىلىق جورالعىسىنا جينالعان اعايىن الدىندا اعىنان جارىلا «ەل ارنانىڭ» العاشقى قادامىنا قۇتتى بولسىن ايتتى.
«بۇگىندە تەلەۆيزيا قوعامدىق سانانى قالىپتاستىرۋعا ىقپالى زور قۋاتتى قۇرال ەكەنى بەلگىلى. وسى قۇرالدى ۇلت مۇددەسىنە, ۇرپاق ءتاربيەسىنە ۇتىمدى پايدالانا ءبىلۋ مەملەكەت باسشىسى العا قويعان باستى ءمىندەتتەردىڭ ءبىرى. كورەرمەنگە تەك قانا ءوزىمىزدىڭ وتاندىق كوركەم جانە دەرەكتى فيلمدەردى ۇسىناتىن تانىمدىق ارنا وسى ماقساتتا اشىلىپ وتىر. التىن قورىمىزدى بۇگىنگى ۇرپاق يگىلىگىنە جاراتۋدى كوزدەگەن جاڭا ارنانى ەلدىڭ ارناسى بولسىن دەگەن نيەتپەن «ەل ارنا» اتادىق. جاڭا تەلەارنا ءوتكەن بۋىنعا وڭدى اسەر ەتكەن شاكەن ايمانوۆ, ءماجيت بەگالين, ابدوللا قارساقباەۆ سياقتى مايتالمانداردىڭ تۋىندىلارىن بۇگىنگى ۇرپاققا كەڭىنەن ناسيحاتتاۋعا تاماشا مۇمكىندىك تۋدىرماق. سونىمەن قاتار, ءبىزدىڭ ماقساتىمىز – ءبىلىم, عىلىم, ونەر سالاسىنا ارنالعان دەرەكتى فيلمدەر مەن تانىمدىق باعدارلامالاردىڭ كورەرمەنگە بارىنشا قولجەتىمدى بولۋىنا ىقپال ەتۋ, ەلىمىزدىڭ اقپاراتتىق كەڭىستىگىن ءوز تۋىندىلارىمىزبەن قامتۋ. بۇل ارنانىڭ اشىلۋى كينو سالاسىنداعى جاس ماماندار ءۇشىن دە ۇلكەن قولداۋ دەپ بىلەمىن.
ەندى ولاردىڭ شىعارمالارى حالىقتىڭ نازارىنا كەڭىنەن ۇسىنىلاتىن بولادى. سول ءۇشىن جوبانى ۇيىمداستىرۋ جۇمىستارىنا اتسالىسقان بارلىق ازاماتتارعا العىس ايتا وتىرىپ, جاڭا ارنانىڭ حالىقتىڭ ارناسىنا اينالۋىنا تىلەكتەستىگىمدى ءبىلدىرەمىن», – دەدى داۋرەن اسكەربەك ۇلى سالماقتى ساباقتاعان ويىن تۇيىندەپ.
ءيا, ەگەمەن ەلىمىزدىڭ ەرتەڭى ءبۇگىندە قانداي جاستاردى تاربيەلەپ جاتقانىمىزعا تىكەلەي بايلانىستى. سول سەبەپتى بالاباقشاداعى, مەكتەپتەگى, جوعارى وقۋ ورنىنداعى جەتكىنشەكتەرىمىزدىڭ بويىنا وتانشىلدىق سەكىلدى اسىل سەزىمدى كۇندەلىكتى سىڭىرە بەرۋىمىز كەرەك. بۇل مىندەتتى ءمىنسىز اتقارۋعا ارقايسىمىزدىڭ ۇيىمىزدە تۇرعان تەلەديداردىڭ قوماقتى ۇلەس قوسارى تالاس تۋدىرمايدى. بۇدان شىعاتىن قورىتىندى, كوگىلدىر ەكراننان كورسەتىلەر باعدارلامالاردىڭ كوركەمدىك ساپاسىنا, تاربيەلىك ءمان-ماڭىزىنا باسا نازار اۋدارعانىمىز ابزال. ويتپەسەك, وكىنىشكە ۇرىنىپ, وپىق جەپ قالۋىمىز وپ-وڭاي.
ايتۋلى جوبانى جۇزەگە اسىراتىن «حابار» اگەنتتىگىنىڭ باسقارما ءتورايىمى الماگۇل احمەتجانوۆا تۇساۋكەسەر شاراسىنا كەلگەندەرگە شىن كوڭىلدەن العىسىن ايتىپ, ريزاشىلىعىن جەتكىزدى. ونىڭ بەرگەن مالىمەتى بويىنشا, ەكراندىق ەفيردىڭ 80 پايىزىن زاماناۋي, التىن قوردا ساقتالعان, حالىقارالىق فەستيۆالداردان جۇلدە العان كينوتۋىندىلار قۇرايتىن كورىنەدى. سونداي-اق, كورەرمەننىڭ وي-ءورىسىن كەڭەيتەتىن تانىمدىق سيپاتى مول دەرەكتى دۇنيەلەرگە دە كەڭىنەن ورىن بەرىلمەك. تالاپتىڭ تايىن ەرتتەپ ءمىنگەن تالانتتى جاس رەجيسسەرلەردىڭ شەبەرلىگىن ۇشتاۋعا دا قولايلى جاعداي جاسالماق ەكەن. بۇل, ارينە, قۇپتارلىق قادام.
قازىرگى تاڭداعى قازاق رۋحانياتىنىڭ قابىرعالى وكىلى, فيلولوگيا عىلىمدارىنىڭ دوكتورى مىرزاتاي جولداسبەكوۆ ەلدىك ماسەلەلەرگە ەرەكشە ءمان بەرەتىن ەجەلگى ادەتىنەن جاڭىلماي, جارقىن ءىستىڭ ساتىمەن جالعاسۋىنا جاناشىرلىق تانىتىپ, ءوزىنىڭ اق باتاسىن بەردى. ۇلكەن تەبىرەنىس ۇستىندە «ەل ارنانىڭ» اشىلۋى حالقىمىز كوپتەن كۇتكەن اقجولتاي حابار ەكەندىگىن اتاپ كورسەتتى. «ەگەر مەن ۇمىتپاسام, وسىنداي ايدار تاعىلعان ارنا بۇرىن دا بولعان. بىراق ونىڭ اتى زاتىنا ساي بولمادى. سوندىقتان عۇمىرى قىسقا بولدى.
ەل – حالىق, مەملەكەت دەگەن ءسوز. ەندەشە, بۇل بۇكىل ەلدىڭ مۇددەسىن بىلدىرەتىن ارنا بولاتىنىنا سەنىمىم مول. قۇدايعا شۇكىر, كەزىندە «قازاقفيلم» كينوستۋدياسى كوپشىلىك كوزايىمىنا اينالعان ايشىقتى دۇنيەلەر ءتۇسىردى. سولاردى جۇرت ساعىنادى. ماسەلەن, ءبىز كۇلاش بايسەيىتوۆا, قانابەك بايسەيىتوۆ, عاريفوللا قۇرمانعاليەۆ جانە باسقا سايدىڭ تاسىنداي ساڭلاقتارىمىزدىڭ ساحناداعى ويىنىن كوردىك. سودان راحاتتانىپ, رۋحاني ءلاززات الدىق. ال كەيىنگى تولقىن وكىلدەرى سولاردىڭ ءبارىن بىردەي بىلە بەرمەسە كەرەك. بۇيىرتسا, ەندى «ەل ارنا» وسى ولقىلىقتىڭ ورنىن تولتىرىپ, وسكەلەڭ ورەندەرىمىزگە مادەنيەتىمىزدىڭ مايەگىن ۇسىنباق. جاسىرىپ قايتەيىك, كەيىنگى كەزدەرى تەلەارنالارىمىزدى بايانسىز ماحابباتتى باياندايتىن, جىلاپ-سىقتاۋعا تولى, باسى بار, اياعى جوق شەتەلدىك سەريالدار باسىپ كەتتى. كەلەشەكتە بۇل كەمشىلىكتەردى تۇزەپ, ۇلتىمىزدىڭ اسىل قازىنالارىن ۇلىقتايتىن ۇلاعاتتى كورسەتىلىمدەردى تاماشالاساق, نۇر ۇستىنە نۇر بولار ەدى», – دەپ الاش ارداقتىسى الدىمىزدان اق كۇن تۋارىنا سەنىم ارتتى.
«ەل ارنا» «حابار» اگەنتتىگىنىڭ شاڭىراعى استىندا كوتەرىلگەن ءتورتىنشى وتاۋ ەسەبىندە الەۋمەتتىڭ تالعامىنا تاتيتىن تالاي تۇششىمدى تەلەتۋىندىلاردى ۇسىنارى انىق. ولاردى «Galam TV» ينتەرنەت-تەلەديدارى پورتالىنىڭ, «وTAU TV» ۇلتتىق جەرسەرىكتىك وپەراتورى جەلىسىنىڭ ابونەنتتەرىنە ارنالعان تەگىن پاكەت قۇرامىندا 37-ارنادان, سونداي-اق بۇكىل رەسپۋبليكا اۋماعىندا قولجەتىمدى ساندىق سپۋتنيكتىك حابار تاراتۋدىڭ ەكىنشى مۋلتيپلەكسىنەن كورۋگە بولادى.
مينيستر مىرزانىڭ رۇقساتىمەن ىسكە قوسىلعان جاڭا ارنانىڭ ءتولباسى رەتىندە تۇساۋكەسەرگە قاتىسۋشىلار نازارىنا قازاقتىڭ كورنەكتى كومپوزيتورى ءشامشى قالداياقوۆتىڭ ومىرىنەن سىر شەرتەتىن «ءان-اعا» ءفيلمى ۇسىنىلدى.
سونىمەن, اقپارات الامانىنا جال-قۇيرىعى سۇزىلگەن تاعى ءبىر سايگ ۇلىك قوسىلدى. ولاي بولسا, سول جۇيرىكتىڭ سىندارلى ساتتەردە سۇرىنبەۋىن تىلەيىك, اعايىن!
تالعات باتىرحان, «ەگەمەن قازاقستان»
سۋرەتتەردى تۇسىرگەن
ەرلان وماروۆ, «ەگەمەن قازاقستان»