جۇرگىزۋشىلىك كۋالىگىن العان سوڭ جاستىق جالىنمەن العاش «گاز-51» كولىگىنىڭ رۋلىنە وتىرادى, ءمىندەتى – اۋىلدارعا نەمەسە كورسەتىلگەن مەكەندەرگە حات, نان, تاۋارلار تاسۋ. ىسىنە تياناقتى قىزعا كەيىن جاڭا كولىكتەر بەرىلە باستايدى, سۋ جاڭا «ۋاز»-دىڭ دا العاشقى ءجۇرگىزۋشىسى بولادى.
قازىرگى تاڭدا نەسىپحان اپا وبلىستىق تەمىر جول قويماسىندا ەڭبەك ەتەدى, قويماعا كەلەتىن تاۋارلاردى قابىلداپ, قاجەتتى ورىنعا جەتكىزەدى. ال كولىك بۇزىلسا, ونى جوندەۋ اجە ءۇشىن قيىن شارۋا ەمەس, كەز كەلگەن بولشەكتى ءوزى ءجوندەپ, موتوردى شاشىپ قايتا قۇراستىرۋ ول ءۇشىن ۇيرەنشىكتى جاعداي. ءتىپتى, بۇل شارۋالاردا الدىنا جان سالمايدى دەۋگە بولادى.
ۇجىمى ونى ءوز ىسىنە تياناقتىلىعى, شيراقتىعى ءۇشىن قاتتى قۇرمەتتەيدى جانە وتباسىندا كەلىن جۇمساپ, نەمەرە ءتاربيەلەگەن اجە رەتىندە سىيلى. ءوز ورتاسىنا كوڭىلدى قۇربى, تۋىستارىنا اقىلشى اپا, ارداقتى انا, ۇجىمدا كوپ اڭگىمە ايتىپ بۇلدانبايتىن, جۇمىسىنا جاۋاپكەرشىلىكپەن قاراپ, تاپسىرىلعان تاپسىرمانى بار نيەتىمەن ورىندايتىن نەسىپحان اجە ءوزى قازىر ءجۇرگىزىپ جۇرگەن «گازەل» كولىگىن ۇرشىقشا ءيىرىپ, زىرعىپ ءجۇر. تىڭ, دەنساۋلىعى دا جاقسى.
– مەن سىيىمدىلىعى ۇلكەن, مىنەزى قالىپتى ءوز كولىگىمدى جاقسى كورەمىن. بىراق, ادامدار ماعان جاسىما بايلانىستى سۇراقتار قويىپ, «نەگە ۇيدە وتىرمايدى ەكەن؟» دەپ جاناشىرلىق تانىتىپ جاتادى. بالالارىمنىڭ دا كولىك ايداپ, جۇك تاسىعانىمدى قالاماعان كەزدەرى بولدى. ال مەن دەنساۋلىق بار كەزدە قوعامعا پايدالى ءىس جاساۋ كەرەك دەپ ويلايمىن, – دەيدى ول.
گۇلايىم شىنتەمىرقىزى, «ەگەمەن قازاقستان»
ماڭعىستاۋ وبلىسى