قالاداعى «مەديكەر پەدياتريا» جەكەمەنشىك كلينكاسىمەن «جەدەل مەديتسينالىق جاردەم» ستانسالارىنىڭ جۇمىستارىمەن تانىسقان مينيستر ءۇشىنشى نىساندا پاتسيەنتتەرمەن دە اڭگىمەلەسىپ, ودان دارىگەرلەرمەن كەزدەسىپ, جۋرناليستەر تاراپىنان قويىلعان ساۋالدارعا دا جاۋاپ بەردى.
ەمدەلۋشىلەردىڭ ءبىرى مينيستردىڭ الدىندا ەمحانالاردا سالالىق مامانعا بارىپ قارالۋدىڭ اسا قيىن ەكەندىگىن العا تارتتى. وعان جاۋاپ بەرگەن باس دارىگەر التىنشاش تابىلدينا: «پاتسيەنتتىڭ ايتقان ءسوزى راس, سالالىق ماماندارعا ۋچاسكەلىك دارىگەر جازىپ الادى. بۇل ماسەلە ءبىزدىڭ كوپتەگەن پاتسيەنتتەرگە ۇنامايدى, ءبىز ءتۇسىندىرۋگە تىرىسقانىمىزبەن, ولار ونى تۇسىنگىلەرى كەلمەيدى. قولدا ەكگ بولماسا, كارديولوگ مامانعا بارۋدىڭ قاجەتى قانشا؟ قاجەتى بولماسا, ونسىز دا ۇلكەن سالماق سالىنىپ وتىرعان سالالىق مامانعا پاتسيەنتتەردى جىبەرۋ قيسىنسىز», دەدى. باس دارىگەردىڭ جاۋابىن ەستىپ, ماسەلەگە ءمان بەرگەن مينيستر, سالالىق ماماندار تاپشىلىعىنان وسىنداي ماسەلەلەر تۋىنداپ وتىرعانىنا توقتالدى: «ارينە, بۇل – وتە ۇلكەن ماسەلە. بۇگىنگى ءبىزدىڭ باستى ماقساتىمىز – جەكەمەنشىك مەديتسينالىق ورتالىقتار مەن تەگىن مەديتسينالىق قىزمەتتەر جۇيەسىن مەديتسينالىق ساقتاندىرۋ جۇيەسىنە تارتۋ. بۇل ادامداردىڭ سالالىق ماماندى تاڭداپ, ونى ءۇش اي كۇتپەستەن ەمىنەن وتۋىنە مۇمكىندىك بەرەدى. بۇگىندە مەملەكەتتىك مەديتسينالىق مەكەمەلەردە كەزەك كوپ, ماماندار تاپشى, تاريفتەر تومەن, سودان دارىگەردىڭ دە جالاقىسى از. جەكەمەنشىك سەكتور بولسا وتە قارقىندى دامىپ جاتىر, نارىقتىق باعالار تارتىمدى بولعان سوڭ دارىگەرلەر سول جاققا كەتۋدە. مىسالى, بiز بiر ءدارiگەردiڭ كونسۋلتاتسياسىنا 1 مىڭ تەڭگە تولەيمiز, ال جەكەمەنشىك كلينيكادا ول 5-6 مىڭ تەڭگە تۇرادى. ارينە, سوندىقتان ءدارىگەرلەردىڭ بارلىعى جەكەمەنشiك كلينيكادا وتىرعىسى كەلەدi. بىزگە وسى ەكى جۇيەنى بىرىكتىرۋ كەرەك», دەپ اتاپ ءوتتى ە.ءبىرتانوۆ.
كەزدەسۋدە مينيستر بيىلعى جىلدىڭ سوڭىنا دەيىن ەلورداداعى ەمحانالاردىڭ تولىعىمەن ەلەكتروندى فورماتقا كوشەتىنىن ايتتى. قاعازباستىلىقتان ءمۇلدەم باس تارتقىمىز كەلەدى, سوندىقتان دا ونى ءبىر-ەكى جەردە ەمەس, رەسپۋبليكا بويىنشا ءبىر ۋاقىتتا جۇزەگە اسىرۋ ماڭىزدى. «استانا قالاسىنىڭ اكىمى اسەت يسەكەشەۆپەن كەلىستىك, ولار ءوز ەمحانالارىن دايىنداپ قويادى. وسىلايشا, ەلوردانى 1 قاڭتارعا دەيىن تولىعىمەن ەلەكتروندى فورماتقا كوشىرۋدى كوزدەپ وتىرمىز. سەبەبى, مەديتسينا قىزمەتكەرلەرىنىڭ نە جازۋى كەرەك, نە كومپيۋتەرمەن باسۋى كەرەك. بۇل ءبىر جۇمىستى ەكى رەت قايتالاپ ىستەمەۋ ءۇشىن قاجەت», دەپ اتاپ كورسەتتى ە.ءبىرتانوۆ.
كەزدەسۋدە استانالىق بەلدى مەديتسينالىق كلينيكالاردىڭ مەنەدجەرلەرى وزدەرىن تولعاندىرعان بىرقاتار ماسەلەلەردى ءمينيستردىڭ قاپەرىنە سالىپ, جاڭا جۇيەنىڭ ەنۋىنە بايلانىستى كەيبىر مەديتسينالىق كومەك كورسەتۋدىڭ تاريفتەرىنە قاتىستى ساۋالدار قويدى.
انار تولەۋحانقىزى, «ەگەمەن قازاقستان»