21-23 ناۋرىزدا «حان شاتىر» سوسو جانىنداعى الاڭدا ۇلكەن ەتنواۋىل اشىلادى. مۇندا 19 كيىز ءۇي تىگىلەدى, شىعىس بازارى, ساۋدا ورىندارى, التىباقان ورناتىلادى.
ءاربىر كيىز ءۇيدىڭ جانىندا استانا قالاسى تەاترلارىنىڭ ارتيستەرىمەن, ەتنومادەني بىرلەستىكتەردىڭ وكىلدەرىمەن قازاق حالقىنىڭ سالت-داستۇرلەرى كورسەتىلەدى. ساۋدا ورىندارىندا ىستىق شىعىس تاعامدارى ساتىلادى. شىعىس بازارىنىڭ اۋماعىندا كورمە-ساۋدا ۇيىمداستىرىلادى, قولونەر شەبەرلەرى ساندىك قولدانبالى ونەر بۇيىمدارىن جاساۋدى ۇيرەتەدى.
ەلوردا تۇرعىندارى مەن قوناقتارىنا باۋىرساق پەن ناۋرىز كوجە ۇسىنىلادى.
سونىمەن قاتار, استانانىڭ جەتەكشى شىعارماشىلىق ۇجىمدارىنىڭ كونتسەرتتەرى وتەدى. اتاپ ايتقاندا, «قورقىت» ءداستۇرلى مۋزىكا ءانسامبلى, «سارىارقا» حالىق اسپاپتارى ءانسامبلى, استانا قالاسىنىڭ قۋىرشاق تەاترى, استانا قالاسىنىڭ مەملەكەتتىك اكادەميالىق فيلارمونياسىنىڭ سوليستەرى جانە قازاقستاندىق ەسترادا جۇلدىزدارى ءوز ونەرلەرىن ورتاعا سالادى.
بۇدان باسقا, جينالعان قاۋىم قازاقشا كۇرەس, ارقان تارتىس, گىر كوتەرۋ, قوي كوتەرۋ سىندى سپورتتىق جارىستارعا قاتىسا الادى. سونداي-اق, ناۋرىز مەيرامىن مەرەكەلەۋ اياسىندا يتتەر جارىسى مەن توبەت جانە تازىلار كورمەسى وتكىزىلەدى.
21 جانە 22 ناۋرىزدا مەرەكەلىك باعدارلاما «قازاق ەلى» مونۋمەنتىنىڭ الدىنداعى الاڭدا («شابىت» قۇوۋ جانىندا), قالالىق اكىمدىكتىڭ جانىنداعى الاڭدا, ستۋدەنتتىك ساياباقتا («قازاقستان» سپورت كەشەنىنىڭ اۋماعى) جانە «جاستار» تەاترىنىڭ الدىنداعى اۋماقتا (ۆوكزال اۋدانى) ۇيىمداستىرىلادى. ناۋرىز مەيرامىنا ارنالعان حالىقتىق سەرۋەندەر وتەتىن بارلىق الاڭداردا كيىز ۇيلەر تىگىلەدى, التىباقاندار ورناتىلادى, سپورتتىق جارىستار مەن قازاقستاندىق ەسترادا ورىنداۋشىلارىنىڭ قاتىسۋىمەن كونتسەرتتەر وتەدى.
كيىز ۇيلەردە قازاق حالقىنىڭ «باتا بەرۋ», «تۇساۋكەسەر», «ايتىس», «ۇلتتىق ويىندار», «بەتاشار», «كورىسۋ-امانداسۋ», «بەسىككە سالۋ», «ات قويۋ» سىندى داستۇرلەرى كورسەتىلەدى.
استانانىڭ شەت اۋماقتارىندا دا مەرەكەلىك شارالار ۇيىمداستىرىلادى. ناۋرىزدىڭ 18-22-ءسى ارالىعىندا مەرەكەگە ورايلاستىرىلعان كونتسەرتتەر مەن شارالار جەلەزنودوروجنىي, پرومىشلەننىي, ينتەرناتسيونالنىي, كۇيگەنجار, ميچۋرينو, پريگورودنىي, يلينكا, كوكتال-1, كوكتال-2 جانە ءوندىرىس تۇرعىن الاپتارىندا وتەدى.
19 ناۋرىزدا ساعات 15:00-17:00 «الاۋ» مۇز سارايىندا «اسىق Party» اسىق اتۋ جارىسى وتەدى.