مەملەكەت باسشىسى قاتىسۋشىلاردى مەرەيتويمەن قۇتتىقتاپ, وليمپيادالىق قوزعالىستىڭ قازىرگى الەمدەگى ەرەكشە ءرولىن اتاپ ءوتتى.
– ءبىز حالىقارالىق وليمپيادالىق قوزعالىسقا قوسىلدىق. ول تاۋەلسىز جاڭا قازاقستاندى قۇرۋ ءىسىنىڭ ماڭىزدى ءبىر بولىگى بولىپ سانالادى. سەبەبى, وليمپيادالىق قوزعالىس دەگەنىمىز سپورتپەن عانا شەكتەلمەيدى عوي. بۇل – اشىقتىق, بىرلىك, ءوزارا قۇرمەت قۇندىلىقتارىنا, ءتان مەن جاننىڭ جەتىلۋىنە نەگىزدەلگەن ءومىر فيلوسوفياسى. وليمپيادا مودەلى بويىنشا ۋنيۆەرسيادالار, قۇرلىق ويىندارى مەن باسقا دا جارىستار وتكىزىلىپ تۇرادى. وليمپيادا جەڭىمپازدارىنىڭ ۇلگىسى بۇكىل الەمدەگى ميلليونداعان بالانى سپورتپەن شۇعىلدانۋعا جىگەرلەندىرەدى, – دەدى قازاقستان پرەزيدەنتى.
سونىمەن قاتار, ەلباسى ەلىمىزدە حالىقارالىق سپورت شارالارىن دايىنداۋ جانە وتكىزۋ ءتيىستى دەڭگەيدە جۇزەگە اسىرىلىپ وتىرعانىن اتاپ ءوتتى.
– قازاقستان الەمدىك وليمپيادا قاۋىمداستىعىنىڭ لايىقتى مۇشەسىنە اينالدى. ءبىز سپورتتىڭ دامۋىنا جان-جاقتى قولداۋ كورسەتىپ كەلەمىز. كەيىنگى 25 جىلدا تۋىمىز بارلىق وليمپيادادا جەلبىرەپ, سپورتشىلارىمىزدىڭ جەڭىسىنىڭ قۇرمەتىنە ءانۇرانىمىز اسقاقتادى. تاياۋدا ۇلتتىق قۇرامامىز الماتىدا وتكەن قىسقى ۋنيۆەرسيادادا ءوز دەڭگەيىنىڭ بيىك ەكەنىن داۋسىز دالەلدەدى, – دەدى نۇرسۇلتان نازارباەۆ.
مەملەكەت باسشىسى قازاقستاننىڭ الەمدىك سپورت ارەناسىندا ءوز ورنىن بۇدان ءارى بەكەمدەي تۇسەتىنىنە سەنىم ءبىلدىرىپ, سپورتشىلارىمىزعا جاڭا جەتىستىكتەر مەن جەڭىستەر تىلەدى.
سوڭىندا ەلباسى ءىس-شارانىڭ قۇرمەتتى قوناعى – ۇلتتىق وليمپيادا كوميتەتتەرى قاۋىمداستىعىنىڭ پرەزيدەنتى احماد ءال-فاحاد اس-ساباحتى سپورتتى دامىتۋعا قوسقان زور ۇلەسى ءۇشىن قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان مەرەيتويلىق مەدالمەن ماراپاتتادى.