1997 جىلى اتىراۋلىق كۇي قاعانى رىسباي عابديەۆتىڭ شاقىرۋىمەن دينا نۇرپەيىسوۆا اتىنداعى اكادەميالىق قازاق حالىق ۇلت اسپاپتار وركەسترىنە ءانشى بولىپ كەلدى. سودان بەرى جايىقتىڭ و جاعى مەن بۇ جاعىنان عانا اۋەلەپ ءان وزدىرماي, شەت ەل ساحنالارىندا دا تىڭدارماندارىن تاڭ قالدىرىپ ءجۇر. قازىر ونىڭ رەپەرتۋارىندا باتىس وڭىردەگى بارلىق انشىلىك مەكتەپتىڭ 250-دەن استام ءانى بار. ودان بولەك, ءداستۇرلى ونەرمەن بولاشاقتارىن بايلانىستىرعان جاستاردىڭ تالىمگەرى, ۇستازى. مىنە, وسىنداي دارابوز دارىننىڭ ونەرىن باعالاپ, ناسيحاتتاۋ ماقساتىندا اتىراۋ وبلىسى اكىمدىگىنىڭ قولداۋىمەن شىعارماشىلىق كەش ءوتتى. وعان قايرات كاكىموۆتىڭ ونەردەگى سىيلاس دوس-جولداستارى ەلىمىزدىڭ تۇكپىر-تۇكپىرىنەن كەلىپ, جايىق جاعاسىن جاۋھار جىرعا بولەدى. كەزىندە مەملەكەت جانە قوعام قايراتكەرى, حالىق جازۋشىسى ءابىش كەكىلباەۆ قايراتقا «حالىق اۋزىندا ساقتالعان سيرەك ءاندەردى ىرىكتەپ, ءوز داۋىسىڭمەن كۇيتاباققا جازدىر. بۇل – بولاشاق ۇرپاققا قالار باعا جەتپەس قازىنا», دەپ ايتقان ەكەن. سول امانات ورىندالىپ, قايرات كاكىموۆ 132 ءان ەنگىزىلگەن جەكە البومىن شىعاردى. ونەر كەشىندە ونىڭ تۇساۋىن قازاقستان جانە قىرعىزستان رەسپۋبليكالارىنىڭ ەڭبەك سىڭىرگەن قايراتكەرى يليا جاقانوۆ كەسىپ, باتاسىن بەردى. قايرات كاكىموۆتىڭ شىعارماشىلىق كەشىنەن باستالعان ونەر مەرەكەسى «ءان داريا دۇلدۇلدەرى» ءى رەسپۋبليكالىق ءداستۇرلى انشىلەر بايقاۋىمەن جالعاستى.
باقىتگۇل باباش, «ەگەمەن قازاقستان»
اتىراۋ