دەمچەنكونىڭ داۋرەنى اياقتالدى

نەگە دەسەڭىز, وسىدان ءبىراز بۇرىن وتاندىق باق-تاردا قۇراما كوماندانىڭ ايگەرىم يساەۆا, ايگەرىم جەكسەمبينوۆا, ءامينا ەرماحانوۆا, اينۇر كەرەي-بايماحانوۆا جانە ارنا توقتاعان سىندى بۇرىنعى مۇشەلەرى جاننا دەمچەنكو باستاعان جاتتىقتىرۋشىلار شتابىنداعى كەمشىلىك اتاۋ­لىنى ايداي الەمگە جاريا ەتكەن بولاتىن. ءدال وسى ماسەلەنى قاۋزاعان «مانەرلەپ جۇزۋدەگى ءمانسىز اڭگىمە» (№29025; 3.03.2017ج.) اتتى ماقالا ەلىمىزدىڭ باس باسىلىمى «ەگەمەن قازاقستان» گازەتىندە دە جارىققا شىققان ەدى.

مۇندا سۋدا مانەرلەپ ءجۇزۋدىڭ شەبەرلەرى جاتتىقتىرۋشىلار شتابىنداعى ۇزاق ۋاقىتتان بەرى قالىپتاسقان بەرەكەسىز تىرلىكتى قاتتى سىنعا العان بولاتىن. ماسەلەن, ولار سپورتشىلاردىڭ كيىمىنە دەپ بولىنەتىن قاراجاتتىڭ قايدا كەتىپ جاتقانىنان حابارسىز ەكەندىكتەرىن ايتقان ەدى. جاتتىقتىرۋشىلاردىڭ سپورتشىلاردان باس باپكەرگە ارناپ جىلۋ جينايتىندىعى دا وسى اڭگىمەدەن كەيىن اشكەرە بولعان-تىن.

بۇدان بولەك, مانەرلەپ جۇزۋشىلەر ءباسپاسوز ءماسليحاتىن وتكىزىپ, قوردالانىپ قالعان پروبلەمانى ايتىپ قانا قويماي, قازاقستان رەسپۋبليكاسى سۋ سپورتى فەدەراتسياسىنىڭ پرەزيدەنتى تيمۋر ق ۇلىباەۆتان بۇل ماسەلەنىڭ اق-قاراسىن ايىرىپ, شەشىم تابۋىنا كومەكتەسۋىن وتىنگەن بولاتىن.

جاننا دەمچەنكونىڭ ەسىمى سۋ سپورتى سالاسىنان حابارى بار قاۋىمعا جاقسى تانىس. ول 1998 جىلدان باستاپ مانەرلەپ ءجۇزۋ بويىنشا قازاقستان ۇلتتىق قۇراما كومانداسىنىڭ باس جاتتىقتىرۋشىسى بولىپ قىزمەت ەتىپ كەلدى. قۇرامانى جيىرما جىلعا جۋىق ۋاقىت بيلەپ-توستەگەن كەزىندە مامان رەتىندە باعىندىرعان بيىكتەرى دە جوق ەمەس. مىسالى, دەمچەنكونىڭ جەتەكشىلىگىمەن ەل قۇراماسى ازيا ويىندارىندا قولا جۇلدەگە بىرنەشە مارتە قول جەتكىزدى. سونداي-اق, قۇراما كوماندا 2000 جىلدان بەرى وتكەن جازعى وليمپيا ويىندارىنىڭ بىردە-ءبىرىن جىبەرمەي قاتىسىپ كەلدى.

سونىمەن, قۇراما كوماندانى جيىرما جىلعا جۋىق ۋاقىت جۇمسا جۇدىرىعىندا, اشسا الاقانىندا ۇستاپ كەلگەن دەمچەنكونىڭ داۋرەنى اياقتالدى. ەندىگى ماسەلە – مانەرلەپ جۇزۋدەگى ءمانسىز اڭگىمەگە وسىمەن نۇكتە قويىلا ما؟ اڭگىمە سوندا…

قايرات ءابىلدينوۆ, «ەگەمەن قازاقستان»

استانا