ارداگەرلەر ءار كەز مەملەكەت باسشىسى نۇرسۇلتان نازارباەۆتىڭ ەل باسقارۋداعى ساياساتىن قولداپ, ەلدى بىرلىككە, تاتۋلىققا ۇندەيدى. جاقسىلىققا ۇيىتقى بولىپ كەلەدى. قازىرگى تاڭدا ءبىزدىڭ اۋداندا 2846 زەينەتكەر ەسەپتە تۇرسا, ولاردىڭ اراسىندا 23 ۇلى وتان سوعىسىنىڭ ارداگەرى بار. وزگەلەرى دە ءار سالادا تىنىمسىز ەڭبەك ەتىپ, ءوڭىردىڭ, ەلدىڭ وركەندەۋىنە ەلەۋلى ۇلەسىن قوسقاندار. دەگەنمەن, ارداگەرلەر ۇيىمى قوعامدىق نەگىزدەگى ۇيىمنىڭ ءبىرى بولعاندىقتان, ءىس باسىنداعى باسشىلاردىڭ ادامگەرشىلىگى مەن قامقورلىعىنا ارقا سۇيەيدى.
وسى تۇرعىدان ايتقاندا, ەلىمىزدەگى قاي قوعامدىق ۇيىم بولسا دا مەملەكەتتىڭ جاناشىرلىعىن ايقىن سەزىنىپ كەلەدى. ماسەلەن, يندەر اۋدانىن ءار جىلدارى باسقارعان ەربولات جالەلوۆ پەن الىبەك ناۋتيەۆتىڭ, بۇگىنگى اكىم جانگەلدى راحمەتقاليەۆتىڭ, ورىنباسارلارى دوسجان مەڭدىگەرەەۆ پەن ءاليفوللا بالاحمەتوۆتىڭ تاراپىنان ارداگەرلەردىڭ ءوتىنىش-تىلەگىنە ۇدايى كوڭىل بولىنەدى. سوعان وراي, ارداگەرلەر دە جاس ۇرپاقتى وتانشىلدىق رۋحتا تاربيەلەۋگە, ولاردىڭ بويىندا قازاقستاندىق, وتانسۇيگىشتىك سەزىمدى ورنىقتىرۋعا ىقپال ەتۋدە.
ارينە, سوعىسقا قاتىناسقاننىڭ ءبارى بىردەي ەلگە ورالعان جوق. جات جەردەن توپىراق بۇيىرعاندار قانشاما؟ ولاردىڭ زيراتىن ىزدەۋ, ۇرپاقتارىنىڭ اكە, اتا رۋحىنا زيارات ەتۋىن ۇيىمداستىرۋعا اكىمدىك تاراپىنان كوپ قولداۋ جاسالۋدا. ماسەلەن, ەڭبەك ارداگەرلەرى ج. ومىرباەۆ, س. قازيەۆتەر اكەلەرى جەرلەنگەن جەرگە ادەيى ىزدەپ بارىپ, تاعزىم ەتۋگە مۇمكىندىك الدى. ۇلى جەڭىس مەرەكەسى قارساڭىندا اۋداننان قۇرىلعان ارنايى ەكسپەديتسيا كەڭەس وداعىنىڭ باتىرى اتانعان جەرلەسىمىز بوران نىسانباەۆتىڭ ەرلىكپەن قازا تاپقان جەرىنە – رەسەيدىڭ ورەل وبلىسىنا بارىپ كەلدىك. بۇل ەكى ەلدى ءبىر-بىرىمەن جاقىنداستىرعان ونەگەلى ءىس بولدى دەپ ايتا الامىن.
جۋىردا ءوزىم دە اكە رۋحىنا تاعزىم ەتۋ ءۇشىن دونداعى كالاچ قالاسىنا باردىم. اكەم حاسان 1942 جىلى 3 جەلتوقساندا ستالينگرادتى جاۋدان ازات ەتۋ بارىسىندا وققا ۇشقان. اكەمنىڭ قايدا جەرلەنگەنىن ۇزاق جىل ىزدەدىم. جاسىم 70-تەن اسسا دا ءالى كۇنگە جۇرەگىمدى اكەگە دەگەن ساعىنىش كەرنەيدى. مەن سەكىلدى قانشاما ۇرپاق اكەسىز قالدى, قانشاما ادام باۋىرىنان ايىرىلدى. ەندىگى مەدەت ەتەرىمىز – سوعىستا حابارسىز كەتكەن بوزداقتاردىڭ دەرەگى كەش بولسا دا تابىلىپ جاتقاندىعى. بۇعان اۋداندىق ارداگەرلەر القاسى, اۋدان اكىمشىلىگى ۇيىتقى بولعانى قۋانتادى.
ماقسىم ەلەۋوۆ, يندەر اۋداندىق ارداگەرلەر القاسىنىڭ مۇشەسى.
اتىراۋ وبلىسى.