وبلىستى مەكەندەگەن 90-نان استام ۇلت تاتۋ-ءتاتتى ءومىر سۇرۋدە. قازىر وبلىستا ون سەگىز ۇلتتىق-مادەني ورتالىق جۇمىس ىستەيدى. ولار ۇلتارالىق تاتۋلىق پەن بىرلىكتى, تۇراقتىلىقتى قالىپتاستىرۋعا وزىندىك ۇلەستەرىن قوسىپ كەلەدى. ەتنومادەني بىرلەستىكتەر وبلىس كولەمىندە وتكىزىلەتىن شارالارعا تۇراقتى تۇردە قاتىسادى. بۇل ورتالىقتار ەلباسىنىڭ بيىلعى قازاقستان حالقىنا جولداۋىن شالعايداعى ەلدى مەكەن تۇرعىندارىنا تۇسىندىرۋدە اۋقىمدى جۇمىستار اتقارۋدا. ولاردىڭ ۇستىمىزدەگى جىلى وتكىزەتىن بارلىق مادەني شارالارى ەل تاۋەلسىزدىگىنىڭ 20 جىلدىعىنا ارنالىپ وتىر. وبلىس باسشىلىعى تاراپىنان ەتنومادەني بىرلەستىكتەرگە ءار كەزدە قولداۋ كورسەتىلىپ كەلەدى. بۇعان 2008 جىلى پايدالانۋعا بەرىلگەن «دوستىق» ءۇيى دالەل بولادى.
قازىر بۇل عيمارات كوپتەگەن ۇلتتاردىڭ باسىن بىرىكتىرگەن ىنتىماعى بەرىك شاڭىراق. سونداي قولداۋ-كومەكتىڭ ءبىرى – ۇلتتىق-مادەني ورتالىقتارعا جىل سايىن بەرىلەتىن 75 مىڭ تەڭگە كولەمىندەگى وبلىس اكىمىنىڭ گرانتى بولىپ تابىلادى. جاقىندا وبلىس اكىمى ەلەۋسىن ساعىندىقوۆ بارلىق ەتنومادەني بىرلەستىكتەر جەتەكشىلەرىنە گرانتتاردى تاپسىرىپ, ولاردىڭ تاتۋلىقتى نىعايتۋ, ءتىلدى, ۇلتتىق سالت-ءداستۇردى, مادەنيەتتى دامىتۋ جولىندا اتقارعان جۇمىستارىنا العىس ايتىپ, الدا دا شىعارماشىلىق تابىس تىلەدى. ءوز كەزەگىندە «قازاقستان كورەيلەرى قاۋىمداستىعى» رەسپۋبليكالىق بىرلەستىگى اقتوبە فيليالىنىڭ توراعاسى كونستانتين تسحاي, «سۆياتلو» پولياك ەتنومادەني قوعامدىق بىرلەستىگىنىڭ ءتورايىمى ەلەنا تسىبۋلسكايا مەن «ەللادا» گرەك ەتنومادەني قوعامدىق بىرلەستىگىنىڭ مۇشەسى اناستاسيا تايلاحيدي ەلىمىزدى مەكەندەگەن بارلىق ۇلتتاردىڭ ءتىلىن, مادەنيەتى مەن سالت-ءداستۇرىن دامىتۋعا جاعداي تۋعىزىپ, ولاردى قولداپ وتىرعان ەلباسى نۇرسۇلتان نازارباەۆقا شەكسىز العىسىن ءبىلدىردى. ەلباسىنىڭ پرەزيدەنتتىك سايلاۋدا باسىمدىقپەن جەڭىسكە جەتۋى نۇرسۇلتان ءابىش ۇلىنىڭ حالىق الدىنداعى بەدەلىنىڭ جوعارى ەكەنىن كورسەتكەنىن ماقتانىشپەن جەتكىزدى.
ساتىبالدى ءساۋىرباي.
اقتوبە وبلىسى.