فۋتبولدان قازاقستان ۇلتتىق قۇراماسىنىڭ باس باپكەرى اۋىستى. تالعات ءبايسۇفينوۆتىڭ ورنىنا رەسەيلىك مامان الەكساندر بوروديۋك تاعايىندالدى.
فەدەراتسيانىڭ ءباسپاسوز قىزمەتى تاراتقان مالىمەت بويىنشا, بوروديۋكتى تاڭداۋداعى باستى سەبەپتىڭ ءبىرى ونىڭ ءبىزدىڭ قۇرامامەن جۇمىس ىستەۋگە دەگەن ىقىلاسى كورىنەدى. ول بىرقاتار ۇلتتىق قۇراما مەن وزگە ەلدەردىڭ فۋتبول ۇيىمدارىنىڭ ۇسىنىستارىنان باس تارتىپتى-مىس.
كەلىسىمشارت ءۇش جىلعا ەسەپتەلگەن. جاڭا باپكەرگە جەرگىلىكتى جاس دارىنداردىڭ تالانتىن اشۋ, قۇرامانى جاسارتۋ مىندەتتەرى جۇكتەلدى. قازاقستان فۋتبول فەدەراتسياسى بۇل تاپسىرمانى ءجۇزەگە اسىرۋعا الەكساندر بوروديۋكتىڭ مول ءتاجىريبەسى جەتەتىنىنە سەنىمدى كورىنەدى.
ال تالعات ءبايسۇفينوۆ بولسا, فەدەراتسيانىڭ تەحنيكالىق ديرەكتورى قىزمەتىن اتقارادى. باسشىلىق وسىنداي شەشىم قابىلداپتى. ەندى ول 17 جاستاعى جاسوسپىرىمدەر قۇراماسىنان باستاپ, ۇلتتىق قۇراماعا دەيىنگى كوماندالارمەن جۇمىس ىستەيدى. سونىمەن قاتار, ونىڭ جاڭا قىزمەتىنە فۋتبول كلۋبتارى مەن ورتالىقتاردا قۇراما كوماندا ءۇشىن فۋتبولشىلار دايارلاۋ مىندەتى كىرەدى.
سونىمەن, «بوروديۋك دەگەن كىم, ماماننىڭ قانداي جەتىستىكتەرى بار؟» دەگەن سۇراقتارعا جاۋاپ ىزدەپ كورەيىك.
فۋتبولشى رەتىندە دوپتى ءتاۋىر تەپكەن. شابۋىلشى بولىپ ونەر كورسەتكەن. ۆورونەجدە تۋعان بوروديۋك سپورتتىق مانسابىن جەرگىلىكتى «فاكەل» كومانداسىندا باستاعان. كسرو كەزىندە كارەراسىنىڭ باسىم بولىگىن ءماسكەۋدىڭ «دينامو» كومانداسىندا وتكىزگەن. 1988 جىلى جامبىلدىق ەۆگەني ياروۆەنكومەن بىرگە سەۋل وليمپياداسىندا چەمپيون اتانعان سوڭ, گەرمانياعا اۋىسادى. ويتكەنى «ديناموعا» اناتولي بىشوۆەتس باس باپكەر بولىپ كەلگەن سوڭ, نەگىزگى قۇرامعا ىلىگە المايدى.
گەرمانيادا ەكىنشى بۋندەسليگاداعى «شالكە-04» كومانداسىنىڭ جەيدەسىن كيدى. ەكى ماۋسىمدا 30 گول سوعىپ, كوماندانىڭ سول كەزدەگى سۇرمەرگەنى بولدى. 1993 جىلى «Kicker» جۋرنالىنىڭ تۇجىرىمى بويىنشا چەمپيوناتتىڭ ۇزدىك ءۇش فۋتبولشىسىنىڭ قاتارىنا ەندى. سونان سوڭ, كەلەسى جىلى «فرايبۋرگكە» اۋىسىپ, بۋندەسليگانىڭ قولا جۇلدەسىن جەڭىپ الدى.
سول كەزدەگى گەرمانيا قۇراماسىنىڭ باس باپكەرى بەرتي فوگتستىڭ: «وكىنىشكە قاراي, بوروديۋك نەمىس ەمەس. ايتپەسە, وعان گەرمانيا قۇراماسىنان ورىن تابىلاتىنى انىق», دەپ ايتقانى بار.
باپكەرلىك كارەراسىن 2001 جىلى «كرىليا سوۆەتوۆ» كومانداسىنان باستادى.
2002 جىلى ول رەسەي قۇراماسىنىڭ باپكەرلەر شتابىنا ەندى. ال ءۇش جىلدان كەيىن رەسەيدىڭ جاستار قۇراماسىنىڭ اعا جاتتىقتىرۋشىسى اتاندى. دەگەنمەن ۇلتتىق قۇراماداعى قىزمەتىن توقتاتپادى. گۋس حيددينك, ديك ادۆوكات سەكىلدى تانىمال گوللانديالىق مامانداردىڭ كومەكشىسى بولدى. سول كەزدە باپكەر رەتىندە ءبىراز تاجىريبە جيناسا كەرەك. 2013 جىلى ماسكەۋدىڭ «تورپەدوسىن» رەسەيدىڭ پرەمەر-ليگاسىنا الىپ شىقتى.
ال وتكەن جىلى الماتىنىڭ «قايراتىمەن» ءۇش جىلدىق كەلىسىمشارتقا قول قويدى. ناۋرىزدا قازاقستان سۋپەركۋبوگىن ۇتىپ الدى. بىراق چەمپيوناتتا قاتارىنان ءۇش تۋردا ۇتىلىپ, ءوز ەركىمەن قىزمەتىنەن كەتتى. الايدا, بوروديۋك قىزمەتتەن كەتۋ سەبەبىن تىلشىلەرگە بەرگەن سۇحباتىندا باسقاشا تۇسىندىرگەن ەدى.
«ستارت شىنىمەن ءساتسىز باستالدى. بىراق مەنىڭ قىزمەتىمنەن كەتۋىمنىڭ سەبەبى سپورتتىق تۇرعىدان بولعان جوق. ال ونىڭ ناقتى سەبەبىن جاريالى تۇردە ايتا المايمىن», دەپ ەدى ا. بوروديۋك.
سول كەزدە رەسەيلىك مامانعا «الماتىداعى ساتسىزدىك بولاشاقتا باپكەرلىك بەدەلىڭىزگە سوققى بولىپ تيمەي مە؟», دەگەن ساۋال دا قويىلعان-تىن.
«مۇلدەم ولاي ەمەس. ماعان گاززاەۆ, يارتسەۆ, حيددينك, ادۆوكات, سەمين, يگناتەۆ سەكىلدى وزىمەن بىرگە جۇمىس ىستەگەن باپكەرلەردىڭ پىكىرى عانا ماڭىزدى. سولاردىڭ بەرگەن باعاسى قۇندى. ال قالعان ەلدىڭ نە ايتقانىندا مەنىڭ شارۋام جوق», دەگەن بولاتىن ول.
«قايراتتا» جولى بولماعان باپكەردىڭ قۇراماعا كەلۋى جانكۇيەرلەردىڭ قىتىعىنا ءتيىپ جاتقانى ءسوزسىز. جالپى, رەسەيدەن كەلگەن مامانداردىڭ قازاق فۋتبولىنىڭ كوسەگەسىن كوگەرتىپ جىبەرگەنى شامالى. پولشا مەن رۋمىنيامەن ءوز الاڭىندا تەڭ تۇسۋگە شاماسى جەتكەن ءبايسۇفينوۆتى اياق استىنان الىپ تاستاۋعا نە تۇرتكى بولعانى تاعى ءتۇسىنىكسىز.
ءبىر كەزدەرى باس جاتتىقتىرۋشى بولعان لەونيد پاحوموۆتان ازەر قۇتىلعان ەدىك. تاعى دا سولاي بولىپ جۇرمەسە قايتسىن؟! البەتتە, ءالىپتىڭ ارتىن باعامىز. بالاپاندى قوڭىر كۇزدە سانايتىنى سەكىلدى, بوروديۋكتىڭ دە مۇمكىندىگىن سول كەزدە بايقارمىز...
بەك تولەۋوۆ,
جۋرناليست
استانا