ۇلى جامبىلدىڭ ءان-كۇي كەشى

الماتىداعى جامبىل اتىنداعى قازاق مەملەكەتتىك فيلارمونياسىندا  عاسىر جاساعان جىر الىبىنىڭ تۋعان كۇنىنە ارنالعان ۇلكەن مەرەكەلىك كونتسەرت بولدى. مۇنداي ءان-جىر شاشۋى جىل سايىن, الماتىدا, ۇلى تۇلعانىڭ تۇعان كۇنى قۇرمەتىنە ءوتىپ تۇراتىن ءداستۇر بار.  بيىلعى  كونتسەرتكە دە ادەتتەگىدەي حالىق وتە كوپ جينالدى. ادەتتەگىدەي اقىندار مەن باتىرلار ەلىنەن – ۇزىناعىشتان كەلگەن ءبىر توپ مارتەبەلى مەيماندارعا الدىڭعى قاتاردان ورىن بەرىلدى. بارشا جىر سۇيەر قاۋىم – مەملەكەت جانە قوعام قايراتكەرلەرى, دەپۋتاتتار مەن تانىمال مادەنيەت جانە ونەر مايتالماندارى قازاقتىڭ ءتول قۇجاتىنداي بولعان جىر الىبىنا كورسەتىلگەن قۇرمەتتى شىنايى كوڭىل-كۇيمەن ءبولىستى. شىمىلدىق تۇرىلىسىمەن كورەرمەندى بىردەن وزىنە تارتقان ساحنالىق ەرەكشە قويىلىم جۇرتتىڭ ەسىندە ۇزاققا ساقتالارى انىق. جىر الىبىن ورتاعا الىپ  جايدارى اڭگىمە باستاعان بۇل ەكى تۇلعانىڭ بەينەسىن جازباي تانىعان جۇرت ءزاۋلىم عيماراتتىڭ كۇمبەزىن كەرنەپ دۇرىلدەتە قول سوقتى. جازۋشى ناعاشىبەك قاپالبەك ۇلىنىڭ شىعارماسىنان قۇرىلعان ساحنالىق مولتەك سىردىڭ كەيىپكەرى اقكيمەشەك كيگەن اي ماڭداڭدايلى ايسۇلۋ – بارماعى مايىسىپ كۇي تارتقان قازاقتىڭ داۋلەسكەر كۇيشى قىزى دينا نۇرپەيسوۆا بولسا, قاھارلى داۋىستى قاھارمان كوماندير –  ماسكەۋ تۇبىندەگى شايقاستان ازكەم دامىلداعان ساتىندە تۋعان ەلگە بەت بۇرعان, ۇلى ابىزدىڭ باتاسىن الۋعا اسىعىپ كەلگەن باتىر باۋىرجان مومىش ۇلى ەدى... قوڭىر داۋىستى حالىق ءارتيسى نۇرعالي ءنۇسىپجانوۆ ساحناعا شىققاندا كورەرمەن جۇرت ءتىپتى ورىنان كوتەرىلىپ كەتتى. جۇرت سۇيىكتىسىنە اينالعان ءانشىنىڭ توگىلتە سالعان ۇلى اقىننىڭ «جاناي قۇربىم» انىنە جينالعان قاۋىمنىڭ ىقىلاستى ەكەنى ەرەكشە بايقالدى. جالپى بۇگىنگى كەشتىڭ «جامبىلدىڭ ءان-كۇيلەرى» اتالۋىنىڭ دا ءمانى وسىندا جاتسا كەرەك. قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترى جامبىلدىڭ كۇيى «نارىكبايدىڭ زارىن», مەملەكەتىك حور كاپەللاسى «ۋگاي-ايدى» ورىندادى. تۋما تالانتتار شولپان دارجانوۆا مەن تەيىپ بەيسەمبەكوۆ, ەرمەك شاشتاەۆ پەن دانيا راحىمباي جانە الما امانجولاۆا جامبىل اندەرىن شىرقاتا سالدى. الاتاۋداي الىپتىڭ ەسىمىن ۇلىقتاپ, ابىرويىن اسقاقتاتقان بۇگىنگى ۇرپاعى جامبىل تويىنىڭ كورىگىن وسىلايشا قىزدىردى. تالعات ءسۇيىنباي, «ەگەمەن قازاقستان» الماتى